Yosia di nok nibou ndig mem timiei Yehuda nya
(2Taw. 34:1-2)
22
1 Tirigi Yosia de njap ug ei ari bingwam muhwindaningai lene ita noni nok nibou ndig mem timiei Yehuda nya. Ninyeng tak kep yok ei minu ndig Yerusalem mem ari bingwam ningot ningai ba, gom. Nipmem ninyeng Yedida ba, Yedida nicig ninyeng Adaya leu Bozkat. 2 Yosia niyai munti nya hagom bit leu nok TUHAN nicuk noti ba, noni yai bram nide pung Nibou Ndig Daud niyai kepti nya hagom bibit Allah nihyet hagom cem.Imam Hilkia ngat TUHAN de srat nikos tutti di pror pima
(2Taw. 34:8-28)
3 Tirigi Yosia ninyeng tak kep timiei Yehuda nya mem ari bingwam simnaimuhwidip brimigtehiningai tu lene noni cuk Safan di nide sekertaris gi gom di Azalya nipmot lene Mesulam nignyon ug ei TUHAN De Ig bipai binoni, 4 <<Aug ngat Imam Nibou Ndig Hilkia ba, ahig ser noni tut mitiei di imam nya itug ndei tirigi itindei ser tungwatu nya ei dimbou hui ei TUHAN De Ig dima nimangti. 5 Ma acuk noni bipia suar noni kes mitiei dima hagom bak yo di inyeng tak kep TUHAN De Ig ningat leu binhyepo ibigo, 6 tukan biei nya kin tukan di ingot ig kan nya kin tukan tig nya yahagom imuhup ba, iba bihi bipek biei ner kin tig mma nok gi dem mem ibikinding TUHAN De Ig hanyen cem. 7 Mindor di inyeng tak kep midyai dima ingon sren-srau. Gima rino disuar yoni ibuhup hanyen bida tut mitiei dima bi.>>
8 Gima rino Safan ndat kep nibou ndig nicukti bak Hilkia leu api Hilkia pai bak bipia noni ngat TUHAN de srat niggai serti ei TUHAN De Ig. Noni yai srat dima bak Safan leu api Safan kwop nibokti. 9 Ba, ngkwei hanyen bipai bak nibou ndig <<Ade awak nya imbus mitiei ei TUHAN De Ig pima hagom bigyai bak mindor di inyeng tak kep midyai nikinding TUHAN De Ig hanyen tu.>> 10 Lene noni binut bu bipai <<Dipwoi srat gom di Hilkia yai bida kwei. Lene noni kwop srat dima nibokti bak nibou ndig.>>
11 Tirigi nibou ndig miap nihyet dima rino noni rik nide sinsun ei nonti him lewo ningon buhun bibor. 12 Bicuk Imam Hilkia kin Ahikam di Safan nipmot kin Akhbor di Mikha nipmot kin Safan di sekertaris gi gom kin Asaya di ya kui noni bipai biyok, 13 <<Ma je juug ba, jiya hacan mem dani kin timiei Yehuda nya yahagom ei TUHAN Noho bei bijihig ser Noni tut srat dini nibimbiti nya hagom. TUHAN ningon sibui sut nye lewo idigup bat-idigai bat nya igyai mun tunggwei sut srat nikos tutti dini nicuk nyeti tu.>>
14 Lene Hilkia kin Ahikam kin Akhbor kin Safan kin Asaya yahagom yuug hig ser Hulda. Sop dini ne nabi sop rin ba, noni bong ei hanjop di nijep ei minu ndig Yerusalem. Nijjep ninyeng Salum lene Salum nicig ninyeng Tikwa ba, Tikwa nicig ninyeng Harhas. Salum yai midyai ninyohou ig gudan di sinsun nibon midut jo keyam eisi ei TUHAN De Ig. Yo dini ipai sut mun di pek kep mem yok pima hagom bak Hulda. 15 Lene noni sok nihyet ei yok dip bak nibou ndig, 16 bindat kep TUHAN nihyet di tri tut <<Da di TUHAN midikes hukum ei timiei minu ndig Yerusalem yahagom dip bit leu nok gi ipas ei srat nicukti di na di nibou ndig akwop tu. 17 Yoni ikou sut Da leu api ibon midut bak nung nya. Igyai mun tunggwei sut dihyet dima bibindei ba, dingon sibui sut yok. Bit bon diluei dingonti tut kan bi. 18 Noro Da di TUHAN dinok mben Israel ide Allah dipai bak nibou ndig Yosia nongkom <Angig atingou mem nikos tutti ei srat dimati ba, 19 attin ser ade sisar ba, akuk na biDa lene arik ade sinsun rok na him cem apim ba, ayai nggwei kibor ba, amiap tut notou midikes hukum ei timiei minu ndig Yerusalem nya bitut ide minu ndig dip cem tu. Midibindei ba, mporo tungwatu nya igyai ngkek ttin ningat minu ndig Yerusalem. Lene yoni mindat kep minu dima ninyeng tirigi ibimbriom yam. Noro dingig ditingou mem ade nadi tu. 20 Gima rino midibet hukum di micut ei minu ndig Yerusalem dip dima ei bibou ayaijo ngwig hon ug e leu binhyepo abong kei agwam kei kikau ug bipek ayaijo ningwig honti.> >>
Lene yo dima ingkwei sut nimbot kepti dima bipai sut bak nibou ndig Yosia.