SRAT NIBOU NDIG NYA GI NIGOM
NIHYET GI BIBIE TUT
Srat Nibou Ndig Nya Gi Nigom binut Srat Samuel Gi Nigom kin Gi Nican nipai mun tut mben Israel ei nijam di ide nibou ndig nya inyeng tak kep yok. Srat dini bon nide hanjop nsi nindig ningai. 1) Nibou Ndig Salomo ya luei nicig Daud nohoti ba, ninyeng tak kep mben Israel titut yam niabiati nicig mai leu su. 2) Salomo niyai midyaisi nya nok nibou ndig kin nide midyai di nindig bibor nya. Mun di bon ninyeng rino Salomo nyohou dimig midyai ningot TUHAN De Ig ei minu ndig Yerusalem. 3) Mben Israel ikwas yam nok canti ba, iba nitok biyam hanyen bu. Nibou ndig bihi inyeng tak kep keret Israel simnai di ibong bei mpia nijjai sindam lene nibou ndig bihi inyeng tak kep timiei Yehuda nya di ibong bei mpia nibiho sindam kikau ug bipek nijam muhwindatai nahacanti nipou tirigi Yesus srek bigyo.
Srat Nibou Ndig Nya Gi Gom kin Gi Can binai sut gino bikwop nibou ndig nya yahagom ingon gom tut TUHAN. Gino ingon gom tut TUHAN lene gima bindei ba, mben Israel ingon nddong ba, ibong kei igwam kei cem. Noro gino ibit TUHAN nihyet bi ba, ikuk yok bak kwar nya lene gima bindei ba, mun di buhun cut igkep yok. Nibou ndig nya di inyeng tak kep mben Israel di ibong bei mpia nijjai yahagom israwir lewo ingon gom tut TUHAN bi. Noro nibou ndig nya di inyeng tak kep timiei Yehuda nya bihi israwir lene bihi ingon gom tut TUHAN.
Nipai mun tut Tuhan de nabi nya bon ninyeng ei Srat Nibou Ndig Gi Gom. Nabi dima yok ibrim ingkek ba, isok kep mben Israel ngkiem leu binhyepo ikuk yok bak kwar nya ba, ingkek ndok tut Allah nihyet bi. Nipui mun tut Nabi Elia kin imam Baal nya di isrep huk yam (pasar 18) ya bibie mem nipui mun nindigsi nya.
Nirop Ninda Ndigsi
Nibou Ndig Daud de ninyeng tak kepti ningwig honti 1:1--2:12
Mben Israel ita Salomo nok nibou ndig 2:13-46
Nipui mun tut Nibou Ndig Salomo 3:1--11:43
a. Nijam nitriti 3:1--4:34
b. Salomo ngot TUHAN De Ig 5:1--8:66
c. Nijam ningwig honti 9:1--11:43
Mben Israel ikwas yam nok canti 12:1--22:53
a. Mben Israel nya di ibong bei mpia nijjai yaham imbuk kep Rehabeam 12:1--14:20
b. Nipui mun tut nibou ndig nya di inyeng tak kep minu dip Yehuda kin nibou ndig mben Israel nya 14:21--16:34
c. Nipui mun tut Nabi Elia 17:1--19:21
d. Nijam dino Ahab nok nibou ndig mem mben Israel nya 20:1--22:40
e. Nijam dino Yosafat nok nibou ndig mem Yehuda nya ba, Ahazia nok nibou ndig mem mben Israel 22:41-53