SRAT NIBOU NDIG NYA GI NIGOM
Nibou ndig Daud wer andig-ndau
1
1 Nibou Ndig Daud wer andig-ndau su. Mbro nok gino nide awak nya iba ban binggai kep noni lo, noni digok bibor. 2 Gima rino yo di igya kui noni ipai binoni <<Andigpoi e, asindui sut ba, ninggok sop gwam nitta pilei gom kwei mem gima nyohou na di Andigpoi bibong simiak na leu binhyepo adigok bi.>> 3 Lene imbut bigya bidem minu Israel nisurti-nipekti binggok sop gwam nitta pilei gom di ubbu ngat. Tirigi yuug krau Sunem lene ingat sop di Abisag leu api ibuwak noni kwei bak nibou ndig. 4 Sop dini ubbu ngat. Noni gwam ser nibou ndig binyohou noni nok gi kei noro igyem njita tut yam bi sren.Adonia ndo nonti nok nibou ndig
5 Lene Adonia di nipmem ninyeng Hagit bungwam mem gima ndo nonti nok nibou ndig biya luei nicig Daud nohoti. Gima rino noni tin ei nide kroba pran kin kuda nya kin tentara di igya kui noni ibou ningot muhwi. 6 Noni mpig bou kep nonti ningon kanti noro nicig Daud ningon buhun tut noni tut nide mun di yai tunggwei nya bi sren. Noni ubbu ngat ba, ya luei Absalom di Daud nipmot mighumbou di mai su pima nohoti cem. 7 Lene noni brim ningkek kep Yoab di Zeruya nipmot kin Imam Abyatar bibindei ba, yahacem itti kin noni. 8 Noro Imam Zadok kin Benaya di Yoyada nipmot kin Nabi Natan kin Simei kin Rei kin tentara di igya ser Nibou Ndig Daud yahagom itti kin Adonia bi.
9 Njap poi ser lene Adonia bon midut bibui domba kin sapi nikre kin sapi pmot di nehen pap nya bindig kep hum ei mpia ttou nsi gom di ninyeng Tig Wou dideu minyei bousi En-Rogel. Lene noni nduk Nibou Ndig Daud nipmot bat nindigsi nya kin nibou Yehuda nya di igya kui nibou ndig yahagom kwei ba, ibon midut bit noni. 10 Noro noni nduk nikinjoi Salomo kin Nabi Natan kin Benaya kin tentara di igya ser nibou ndig yahagom bikwei bit yok bi.
Mben Israel ita Salomo nok nibou ndig
11 Lene Natan ug ngat Salomo nipmem Batsyeba bihig ser noni <<Amiap tut Adonia di Hagit nipmot di ndo nonti nok nibou ndig di nijep bu tu e? Noro tut gima lene Nibou Ndig Daud kan tut bi! 12 Gino na di Sindig kin apmot Salomo jeni jicuon jiyaisi lene disok kep jeni leu binhyepo, 13 jibipbur ba, juug ngat Nibou Ndig Daud lene ma jihig ser noni <Andigpoi e, nipou apreu ei mem da bipia dipmot Salomo miya luei ahoti nok nibou ndig di nijep bi e? Nggon rima Adonia ndo nonti nok nibou ndig di miya luei ahoti hanyen i?> >> 14 Lene Natan binut bu bipai <<Hammi tirigi na di Sindig ahig ser nibou ndig nok gima ba, akes ahyet bigyo rino midihwou tau kep je leu binhyepo disum dihyet eisi ba, dihyet mitot kep na di Sindig ahyet bu bak.>>
15 Gima rino Batsyeba ug ngat nibou ndig ei nghim nsi. Daud wer andig-ndau leu su ba, sop gwam nitta pilei mben Sunem pima nyohou hati tut noni. 16 Lene Batsyeba kuk no ei nibou ndig nimig him leu api nibou ndig hig ser noni <<Akwei ngat da tut mindei i?>>
17 Gima rino Batsyeba buhup <<Andigpoi e, nipou lene apreu ei mem da tug hon ade TUHAN Allah ninyeng bipia dipmot Salomo miya luei ahoti nok nibou ndig di nijep bu. 18 Noro Adonia sindi ndo nonti nok nibou ndig di nijep bu nding leu na di Andigpoi ayai him tu. 19 Noni bon midut bibui sapi nikre kin domba nya kin sapi pmot di nehen pap mang bibor bindig kep hum leu api nduk apmot bat nindigsi nya kin Imam Abyatar kin Yoab di nibou pran yahagom kwei ba, ibon midut bit noni. Noro noni nduk apmot di Salomo cem bibit yok bi. 20 Andigpoi e, mben Israel yahagom ingon ya mem gima ando igbit ade nikos tutti tut no di miya luei ahoti bu. 21 Gi bi ne gino na di Andigpoi amai leu su lene yo dima mibibon dipmot nyeni nok yo di yaham imbuk kep nibou ndig di nijep.>>
22 Nipou tirigi Batsyeba kes nihyet bigyo lene Nabi Natan kwei krau nibou ndig de igya. 23 Leu api hi pai sut nikweisi bak nibou ndig leu api Batsyeba om no leu nibou ndig noho bei lene Nabi Natan coi bingat noni ba, kuk no ei nibou ndig nimig him. 24 Lene noni hig ser nibou ndig <<Andigpoi e, atri tut bipia Adonia miya luei ahoti nok nibou ndig di nijep bu tu e? 25 Njap di ammani noni ug bon midut bibui sapi nikre kin domba nya kin sapi pmot di nehen pap mang bibor bindig kep hum tu. Noni nduk apmot bat nindigsi nya kin Yoab di nibou pran kin Imam Abyatar yahagom bibon midut bit noni. Nogindini yahagom igyem pesta ba, igyai nillei lene imbos-hi-mbos cem bitri tut <Adonia e, ma ayaijo ninno!> 26 Noro Andigpoi e, noni nduk dani kin Imam Zadok kin Benaya kin Salomo cem bi. 27 Andigpoi e, acuk noni tut niyai munti dima hagom lo, ando igbit no di miya luei ahoti bak nibou nya di igya kui na di Andigpoi bi e?>>
28 Lene Nibou Ndig Daud pai binoni <<Aom na mbigom leu api acuk Batsyeba coi kwei biya doho bei.>> Lene Batsyeba coi hanyen kwei biya ei nibou ndig noho bei. 29 Lene noni pai bak Batsyeba <<Dipreu ei mem nani tug hon TUHAN di niyaijo di teu da bidingwes ngun leu mun di buhun di cut igkep da hagom pima, 30 apmot Salomo miya luei dohoti nok nibou ndig di nijep bu bit leu nok dipreu sut ei mem nani tug hon TUHAN di nok mben Israel ide Allah ninyeng pima ba, gima midem igbit mem noni njap di ammani.>>
31 Lene Batsyeba kuk no ei nibou ndig nimig him bipai <<Andigpoi Nibou Ndig Daud e, ma ayaijo ninno!>>
32 Lene Nibou Ndig Daud sok nihyet bak Zadok kin Natan kin Benaya bikwei ngat noni. Tirigi ikwei ya ei noho bei lene, 33 noni pai biyok <<Ma juug sin nibou di igya kui da nyati lene ma jikes dipmot Salomo ba, bri bigwam ditde bagal dip leu api jibuwak noni ug ei minyei bousi Gihon. 34 Lene ma Imam Zadok kin Imam Natan ita noni nok nibou ndig di nijep mem mben Israel ei mpia dima. Jimiep pun mbrei lene jimbos bijipai <Na di Nibou Ndig Salomo e, ma ayaijo ninno ug o!> 35 Lene ma jinjei bit noni hanyen kwei tirigi noni kwei gwam ei ditde banggo mbrei dip. Noni miya luei dohoti nok nibou ndig di nijep lewo didimig noni ei nok nibou di ninyeng tak kep mben Israel kin Yehuda nya tu.>>
36 Lene Benaya buhup <<Andigpoi e, igbit ri! Handei kon ba, ade TUHAN Allah nihyet tot kep ahyet di asimbot dat dima! 37 Nnaba TUHAN ningat rin bit Salomo bit leu nok Noni ningat rin bit na di Andigpoi. TUHAN mibindei ba, Salomo de ninyeng tak kep limwa nyati mbut sindem bibor njiriek na di Andigpoi anyeng tak kep ade limwa nyati.>>
38 Lene Zadok kin Natan kin Benaya kin tentara di igya ser nibou ndig yuug sin Salomoti ba, ikes noni bigwam ei Nibou Ndig Daud de mindhe bagal dip leu api ibuwak noni ug ei minyei bousi Gihon. 39 Zadok hit ampou tut mini zaitun di noni yai kwei leu TUHAN De Prak Meng bisiber ei Salomo nibou nggram him. Lene imiep pun leu api tungwatu nya yahagom imbos-hi-mbos bipai <<Na di Nibou Ndig Salomo e, ma ayaijo ninno!>> 40 Lene yahagom ibit Salomo bingkwei hanyen. Imbos-hi-mbos ba, imiep porei nya lene nibimbi bindei ba, tereu nok dihyei ugwa-kwei.
41 Tirigi Adonia kin nisut bat nya igyem ide pesta bingwig rino imiap nibimbi dima. Yoab miap pun mbrei tibim lene noni hig ser yok <<Mindei ripek kep mem timiei minu dini di bindei dino ighyet kui yam nok gima i?>> 42 Nipou tirigi noni hig ser yok ba, kes nihyet tut bigyo lene Yonatan di Abyatar nipmot tau kwei. Adonia hig noni <<Acoi kwei. Dikan tut bipia akwei sut nihyet di kei lewo angon singat.>>
43 Noro Yonatan buhup <<E bi. Nibou Ndig Daud ta Salomo biya luei nohoti nok nibou ndig di nijep bu tu!>> 44 Nibou ndig Daud cuk Zadok kin Natan kin Benaya kin nide tentara di igya ser noni ba, iba nibou ndig Daud nide mindhe bagal bibuwak Salomo ba, 45 Zadok kin Natan ita noni nok nibou ndig di nijep ei minyei bousi Gihon tu. Lene yahagom imbos-hi-mbos bingkwei hanyen ei minu ndig dini tu apino tungwatu nya imbos-hi-mbos nindig bibor a. Nogindi pa ighyet dima tibim ei jitingou nsi tu. 46 Nogindini Salomo ne nibou ndig di nijep ri. 47 Gima he bi lewo yo di igya kui Nibou Ndig Daud induk yam ei Andigpoi dima noho bei bipigo noni bipai <Nnaba ade Allah bindei ba, Salomo ninyeng jei dor njiriek na di Andigpoi anyeng di jei. Nnaba Salomo de ninyeng tak kepti mbut sindem bibor dor njiriek na di Andigpoi anyeng di tak kep ade limwa nyati.> Lene Nibou Ndig Daud kuk no bak Allah ei nibongti, 48 bipai <<Jikwei ba, inggei sut mben Israel ide TUHAN Allah lewo Noni ta no di ntun dani him biya luei dohoti nok nibou ndig di nijep ei njap di ammani tirigi dimai bigyo tu.
49 Lene Adonia nisut bat nya ittin tut ba, yahagom ikiju bigya lene ikes noni ei bintek gimahap bimbut leu noni. 50 Lene Adonia cem ttin tut Salomo nindig bibor buug ei TUHAN De Prak Meng bikrau nimbar hum dok nikoisi nya.>>a 51 Lene hi pai bak Nibou Ndig Salomo bipia Adonia ttin tut noni buug krau nimbar hum dok nikoisi lene simbot dat <<Midikes nikoisi dini ei ba, dimbut leu prak meng dini bi bibou Nibou Ndig Salomo ba neheng bipreu ei mem da bipia noni miyai nimai bida bi ug e.>>
52 Lene Salomo buhup <<Gino Adonia ningon gom tut da lene noni mitug ndei hukum hi bi. Gi bi lene noni mitug ndei nimai.>> 53 Lene Nibou Ndig Salomo sok nihyet bak tungwatu nya leu binhyepo ibuwak Adonia kwei leu nimbar hum dok nijoti. Noni kwei ngat nibou ndig bikuk no ei nimig him lene nibou ndig pai binoni <<Nna ba angkwei hanyen ug ei ade ig hak ug!>>