Yosia cok tut kwar nya bingwig
(2Taw. 34:3-7, 29-33)
23
1 Mpe dima lene nibou ndig Yosia nduk nibou timiei Yehuda nya kin nibou minu ndig Yerusalem nya yahagom kwei 2 ei TUHAN De Ig. Yoni yuum imam nya kin nabi nya kin ide limwa di inyeng kin yuhui mbum cem yahagom ei mpia dima. Lene nibou ndig kiju biya ei yahagom yoho bei bindat kep srat bokti leu srat nikos tutti di Hilkia ngat ei TUHAN De Ig pima biyok. 3 Tirigi noni ya kui dihim gom di ipigig sut ei mem nibou ndig bipreu ei mem TUHAN bipia miba ningon titut kin ninnei titut bibit TUHAN nihyet kin nicuk Nide limwa nyati hagom. Lene preu ei bipia noni miyai kep midyai po nidigup bat-nidigai bat nya ipreu sut ei nipou su pima bit leu nok gi ipas ei srat niggai serti dima. Lene nide limwa nya cem ipreu sut ei mem TUHAN bipia yoni mibit Nide gi preu ei mem yoti.4 Lene Yosia cuk Imam Nibou Ndig Hilkia kin imam di igya kui noni kin yo di igya ser dimbou hui dima leu binhyepo icat kwar Baal kin kwar Asyera kin kwar ham mpia-bbed him nya bitut imbumbati nya hagom leu TUHAN De Ig. Noni bindei ba, indig imbumbati dima yok hagom kep hum ei minu ndig Yerusalem nisai ma kwei dideu Mbang Briep Kidron biket hum pimbang dima hagom biyuug sut ug ei minu ndig Betel. 5 Lene noni nduk imam di nibou ndig timiei Yehuda nya ita yok mem gima ibon midut ei nimbar hum dok di kwar pima ideti bidem minu Yehuda kin minu di gahai minu ndig Yerusalem cem kwei bicut inyeng imam leu yok. Imam dini yok ibon midut bak Baal kin mpia njap kin bed mmun kin singmur kin hambong kin ham nindigsi nya hagom tu. 6 Noni bindei ba, icat kwar Asyer ningat leu TUHAN De Ig bittei ug ei Mbang Briep Kidron bindig kep hum leu api idram ningum bindung-ndiem leu api igimahap hagom ug ei nimai jui dip nya. 7 Noni nggek tut ninsi di sop kin pinai di ibou sibui nya ibong ser ei TUHAN De Ig. (Sop dima yok ibien ban ei nghim nsi dima mem gima tungwatu nya ibinggai yok tirigi ikuk yok bak kwar Asyera.) 8 Noni cuk yo di igya kui noni ba, ikat imam nya kwei leu minu ndig hagom ei minu Yehuda bibindei ba, map kui nimbar hum dok di ibon midut eisi nya hagom. Lene noni bindei ba, tungwatu nya inggek nimbar hum dok nya di ipigig ser mem ninnei rom kambir di jo dideu dimbou pmem di Yosua tu ei ngug tig minu ndig Yerusalem. Mpe di pima ne Yosua ninyeng tak kep minu ndig Yerusalem. Dimbou pmem dima jo ei yo di icoi kak Dimbou Pmem Nitu inda prak. 9 Yosia cuon ser imam pima yok leu binhyepo ibon midut nok imam ei TUHAN De Ig bu au. Noro sindui sut yok ba, igyem roti di dwoi bi bit isut bat imam nindigsi nya.
10 Noni bindei ba, map kui Tofet ei Mbang Briep Hinom di nok mpia di mem ibon midut bak kwar Molokh eisi ser nhyepo hi ndig nimunggwom kep hum eisi bak kwar dima bu bi. 11 Noni bindei ba, ijji kuda nya di nibou ndig mem timiei Yehuda nya tin ei mem gima ibikuk yok bak mpia njap pima hagom bingwig leu api ndig kroba pran di ibikuk yok bak kwar dima cem. (Kroba pran dima jo keyam ei mpia di jo bas hak ei TUHAN De Ig dideu dimbou pmem kin Natan Melekh di ya kui nibou ndig de nghim.)
12 Noni bindei ba, tungwatu nya inggek nimbar hum dok nya di nibou ndig timiei Yehuda nya di nipou nya ibon ei nibou ndig Ahas de ig bou ninjek dip kin nimbar hum dok di Nibou Ndig Manasye bon ei mpia di jo bas hak ei TUHAN De Ig hacem. Noni bindei ba, idram nimbar hum dok dini yok binnir-wap leu api icom hagom ug ei Mbang Briep Kidron. 13 Noni bindei ba, map kui nimbar hum dok di Salomo bon dideu minu ndig Yerusalem bei mpia nipriti dideu Nungug Zaitun bei mpia nibiho cem. Salomo pigig ser nimbar hum dok dini ei mem mben Sidon ide kwar Asytoret kin mben Moab ide kwar Kamos kin mben Amon ide kwar Milkom noro hagom bindei ba, tungwatu nya igyai ngkek ttin. 14 Yosia bindei ba, inggek cou nibiyok ngon kep kwar nya kin kwar nisop Asyera hagom leu api ibindei suwok tug hon gi idis nimai njum bidem ei mpia dima.
15 Yosia nggek mpia di ipigig sut ei di Nibou Ndig Yerobeam di Nebat nipmot bon ei minu ndig Betel pima. Noni ne nibou ndig di ris mben Israel ug ei sisarti habiei ei nimbie him pima ri. Yosia nggek nimbar hum dok dima lene dram tig nikiou nya hagom binnir-wap ba, ndig ide kwar nisop Asyera cem.
16 Lene Yosia put-put nyen ser mpia dima bingat lo, hak mihyeti di itig nimai eisi no rinaha ei nungug tou dima. Gima rino noni bindei ba, iket nimai njum kwei ba, indig kep hum ei nimbar hum dok dimati cem. Tug hon niyai munti dima lene noni bindei ba, map kui nimbar hum dok dima bit leu nok nabi gom nipaisi mimbrek tu tirigi Nibou Ndig Yerobeam ya kui nimbar hum dok bibon midut bit nide limwa nya. Lene noni put-put nyen bu bingat hak mihyeti gom kin bu. 17 Bihig ser tungwatu nya <<Tou rino itig ei hak mihyeti gom dima i?>>
Lene mben Betel ibuhup <<Itig nabi di kwei leu minu Yehuda di tri tut mun di abindei ba, cut igkep nimbar hum dok dini ei njap di ammani tu rino itig ningut eisi a.>>
18 Lene Yosia pai biyok <<Ma jingget nide hak mihyeti ba, jiket nimai njum au.>>
Gima rino nabi dima kin nabi di kwei leu Samaria cem injum mijo nyahan nijoti.
19 Lene Nibou Ndig Yosia bindei ba, tungwatu nya inggek tut nimbar hum dok di nibou ndig mben Israel ipigig ser ei mem kwar nya hagom ei minu Israel cem. Lewo nibou ndig dima yok ibindei ba, TUHAN ningon sibui sut Nide limwa nya. Yosia bibon kwar nya ei minu Israel cem hagom dem kep nok gi po bibon ei minu ndig Betel pima. 20 Noni bindei ba, imam nitrowai nya yahagom itug ndei nimai ei ide nimbar hum dok dip di ibon midut eisi nya bindig nimai njum nya cem eisi. Lene noni ngkwei hanyen ug ei minu ndig Yerusalem.
Yosia yok ngon kep Njap Ndig Paskah
(2Taw. 35:1-19)
21 Mpe dima lene Nibou Ndig Yosia cuk nide limwa nya leu binhyepo igyok ngon kep Njap Ndig Paskah bibinggei sut ide TUHAN Allah bit leu nok srat nikos tutti pima nicuk yoti. 22 Gi nipou tirigi nikei nya inyeng tak kep mben Israel kikau kwei bipek njap dini kep lene nibou ndig mem mben Israel hi gi yok ngon kep Njap Ndig Paskah di noyam kin Paskah di Yosia yok ngon kep dini bi sren. 23 Nibou Ndig Yosia ninyeng tak kep kikau ug bipek ari bingwam simnaimuhwidip brimigtehiningai leu api mben Israel sindi ikinyon ei Njap Ndig Paskahti leu binhyepo ibinggei sut TUHAN.
Yosia nggek tut mben Israel igyai kepti di kinei nindigsi nya
24 Mpe dima lene Nibou Ndig Yosia jji yo di nung kui yok kin yo di iko kep inda nya yahagom bitut kwar di tungwatu nya ikuk yok bak ei ide ig bitut nimbumbati nya hagom leu minu ndig Yerusalem kin minu Yehuda cem leu binhyepo mben Israel igyai kepti nya tunggwei sut niggai serti nya di Musa pas ei sratti di Hilkia ngat ei TUHAN De Ig pima bi. 25 Nibou Ndig Yosia ba ningon titut bibit nikos tutti ei Srat Musati tug hon gi ba nide niyai munti nya kin nisindemti bikuk no bak TUHAN nok gi kei bibor dor njiriek nibou ndig mben Israel di nipou nya kin gi igya abia kep noni cem yahagom.
26 Noro TUHAN no ningon sibui sut mben Israel drek dip nibou ndig Manasye niyai munti nya pima lene bit bon Noni luei ningonti tut kan bi. 27 Noni tri tut <<Midibibon timiei Yehuda nya bit leu nok gi dibibon mben Israel pima. Midijji yok bingwig leu diyai him lene midikou sut minu ndig Yerusalem po didimig ei mem Danti kin TUHAN De Ig po dipai sut bipia suar tungwatu ikuk yok biDa eisi.>>
Nibou ndig Yosia niyaijo ningwig honti
(2Taw. 35:20--36:1)
28 Nipas kep tut Nibou Ndig Yosia niyai munti nya hagom jo ei srat Nibohon Nibou Ndig Mben Yehuda Nyati. 29 Mpe dino Yosia ninyeng tak kep timiei Yehuda nya ne nibou ndig Nekho leu minu Mesir njei sut nide tentara nya bikak puig ug ei Minyei Efrat nyai leu binhyepo injei siceu bit nibou ndig mben Asyur. Yosia kin nide tentara ikon pran bit tentara Mesir ei Megido noro Yosia tug ndei nimai ei pranti dima. 30 Lene yo di igya kui noni ikon ningut bikes ei kroba pranti bingkwei sut hanyen kwei ei minu ndig Yerusalem leu api itig ei jui dip nibou ndig nya ide.
Lene timiei Yehuda nya idimig Yoahas di Yosia nipmot bita noni nok nibou ndig nijep bu.
Yoahas di nok nibou ndig mem timiei Yehuda nya
(2Taw. 36:2-4)
31 Tirigi Yoahas de njap ug ei ari bingwam nyatungwagom ba, ningai lene noni kui bigwam nok nibou ndig mem timiei Yehuda nya. Noni bong ei minu ndig Yerusalem leu api ninyeng tak kep timiei Yehuda nya ug ei ninsi bed ningai. Nipmem ninyeng rino Hamutal ba, noni ne Yermia di timiei Libna nipmisop ri. 32 Yoahas cem bon sisar tut TUHAN noyam kin nidigup bat-nidigai bat nya. 33 Ninyeng nibou ndig mem timiei Yehuda nya cut ei mpe di Nekho di nibou ndig mben Mesir pima kat noni binggam ei minu ndig Ribla ei hanjop Hamat. Lene Nibou Ndig Nekho bidip huk timiei Yehuda nya leu binhyepo imbus perak kilo sribu ningai ba, sratus bitai kin mas kilo ningot ningai ba, bitai nok belasten di suar igo bak noni. 34 Nibou Ndig Nekho ta Elyakim di Yosia nipmot nok nibou ndig mem timiei Yehuda nya ba, biluei ninyeng Elyakim ei ninyeng Yoyakim bu. Leu api Nekho kat Yoahas buug sut ug ei minu Mesir leu api nide njap ug hon nohonti ei sirima.
Yoyakim di nok nibou ndig mem timiei Yehuda nya
(2Taw. 36:5-8)
35 Nibou Ndig Yoyakim dahat nide limwa nya tut mitiei bit leu tungwagom-gom nisindemti mem gima bigo belasten gau yonti bak nibou ndig mben Mesir bit leu nibidip hukti pima.
36 Tirigi Yoyakim de njap ug ei ari bingwam nyatungwagom ba, muhwi lene noni kui bigwam nok nibou ndig mem timiei Yehuda nya. Noni bong ei minu ndig Yerusalem ba, ninyeng tak kep timiei Yehuda nya mem nijam ari bingwam simnaibrimiggom. Nipmem ninyeng rino Zebuda ba, noni ne Pedaya di timiei Pedaya nipmisop ri. 37 Yoyakim cem bon sisar tut TUHAN noyam kin nidigup bat-nidigai bat nya.