Manasye di nok nibou ndig mem timiei Yehuda nya
(2Taw. 33:1-20)
21
1 Mpe di Manasye kui bigwam nok nibou ndig mem timiei Yehuda nya lene nide njap ug ei ari bingwam simnaibrimigcan tu. Noni bong ei minu ndig Yerusalem leu api ninyeng tak kep timiei Yehuda nya kikau mem nijam ari bingwam ningot muhwi ba, muhwi. Nipmem ninyeng Hefzibah. 2 Manasye bon sisar tut TUHAN. Lewo noni yai bram mben di TUHAN jji yok leu minu Kanaan ei mpe di po mben Israel icoi ei minu dima igyai kepti di kinei bibor nya. 3 Manasye win mpia di tungwatu nya ikuk yok bak kwar eisi nya hagom di nicig Hizkia ya kep binggek ningwig pima hanyen. Lene win nimbar hum dok nya mem gima bibon midut nya bak Baal. Lene bibon kwar sop Asyera bit leu nok Ahab di nok Nibou Ndig mem mben Israel nibon kepti pima cem. Manasye kuk no bak ham mpia-bbed him nya cem. 4 TUHAN pai ei su bipia minu ndig Yerusalem ne mpia di Noni ningat rin eisi ri. Lene minu ndig Yerusalem nok mpia di ibon midut bak Noni eisi cem ri. Mbro nok gima lo, Manasye win nimbar hum dok mem kwar nya ei TUHAN De Ig. 5 Manasye win nimbar hum dok nya ei mpia di jo bas hak can ei TUHAN De Ig nibiho mem gima bikuk no bak ham mpia-bbed him nya. 6 Lene bibui nipmot hi bindig ei nimbar hum dok dimati ba, bikuk no bak kwar nya cem. Noni brim ningkek mem nung nya igyai kepti nya kin nipui mun nimbot kepti tug hon ham mpia-bbed him nya kin nikan tut nisindemti nya di jo nding leu tungwatu nya igyai him kin ninggok tut ninnei nitrowai nya leu binhyepo indo bindo binoni cem. Manasye bon sisar nindig bibor tut TUHAN apino TUHAN gga bibor drek dip nide sisar di nindig bibor di noni bon dima. 7 Manasye ttei kwar sop Asyera ningwes bitas pijum ei TUHAN De Ig. Noro TUHAN pai sut Nide Ig dima bak Daud kin nipmot Salomo nipou su <<Ditde ig kin minu ndig Yerusalem di didimig leu keret Israel simnai brimigcan ide hanjop nya dini ne mpia di dindo ei nok gumihyep nibon midut eisi bak Dani ri. 8 Gino limwa Israel ice tut bibit Ditde nicuk yokti nya hagom ba, ibit Ditde niggai serti nya po Ditde awak Musa yai biyok pima cem lene midisindui sut ba, tungwatu nya mijji yok leu minu di diyai bak idigup bat-idigai bat nya bi.>> 9 Noro timiei Yehuda nya igibit TUHAN nihyet bi. Manasye bindei ba, ibon kep sisar di kinei bibor nya. Ibon sisarti dima kinei bibor bidor tunggwei mben di TUHAN jji yok leu minu Kanaan ei mpe di po limwa Israel icoi ei ide minu pima ide sisar di ibon kep nya.10 Gima rino TUHAN pai nihyet tug hon Nide awak di nabi nya, 11 <<Nibou Ndig Manasye niyai munti nya kinei bibor. Niyai munti nya kinei bibor dor njiriek mben Kanaan ibon munti nya bu. Noni bindei ba, timiei Yehuda nya icut ei sisarti tug hon kwar di ikuk yok bak nya. 12 Gima rino Da di TUHAN Allah di mben Israel ikuk yok bak midibindei ba, hukum di buhun bibor micut igkep minu ndig Yerusalem kin minu Yehuda ri. Apino yo di mimiap tut mun dima midigit tut nindig bibor. 13 Midikes hukum ei minu ndig Yerusalem dip noyam kin gi dikes ei Samaria kin Ahab di nok Nibou Ndig mem mben Israel bitut yo di intun noni him nya dip cem. Midicok tut minu ndig Yerusalem bipwoi-pwau noyam kin den di ipiap bipwoi bikiek bidis hek mpia. 14 Midikes Ditde limwa niken-ken di igwam yo nya ei ba, yoni minok mikwau mem ide siceu nya di igyem kep yok bisar ba, igya bidem ide minu nya hagom bipos ide ndigban nya hagom ningwig cem. 15 Midikes hukum dima yok ei Ditde limwa nya dip drek dip sisar di ibon tut Da cem. Ibibon Ditde nigga biborti habiei tirigi idigup bat-idigai bat nya yehei leu minu Mesir kikau kwei bipek ammani kep cem.>>
16 Ter leu gima lene Manasye yai nimai bak yo di ingon kwes imang bibor bibindei ba, inggrom biyam bidem minu ndig Yerusalem nisurti-nipekti. Noni bindei ba, timiei Yehuda nya ibon sisar tut TUHAN tug hon gi ikuk yok bak kwar nya.
17 Nipas kep tut Nibou Ndig Manasye nibon munti nindigsi nya kin nibon sisarti nya hagom jo ei srat Nibohon Nibou Ndig Mben Yehuda Nyati. 18 Manasye mai leu lene itig ei Uza de miai mitou nghousi di jo simiak nibou ndig de ig leu api nipmot Amon kui bigwam nok nibou ndig mem timiei Yehuda nya biya luei nohoti.
Amon di nok nibou ndig mem timiei Yehuda nya
(2Taw. 33:21-25)
19 Tirigi Amon kui bigwam nok nibou ndig mem timiei Yehuda nya lene nide njap ug ei ari bingwam nyatungwagom ba, can. Noni bong ei minu ndig Yerusalem ba, ninyeng tak kepti mem nijam ari bingwam can. Nipmem ninyeng rino Mesulemet ba, noni ne Harus di timiei minu ndig Yotba nipmisop ri. 20 Lene Amon bon sisar tut TUHAN noyam kin nicig cem. 21 Noni yai bram nicig niyai munti nya bikuk no bak kwar di nicig cem kuk no bak nya. 22 Niyai munti dem igbit TUHAN ningon kanti bi. Noro ba nghim bak TUHAN Allah di nidigup bat-nidigai bat nya ikuk yok bak.
23 Yo di igya kui Nibou Ndig Amon igyok ingon gom mem gima yaham imbuk kep noni. Leu api igyai nimai bak ei nide ig nibou ndig. 24 Noro timiei Yehuda nya ikes hukum nimai ei yo di igyai nimai bak Nibou Ndig Amon dima dip. Leu api ita nipmot Yosia nok nibou ndig bu.