Hizkia nggwen buhun bibor noro kei hanyen
(Yes. 38:1-8, 21-22; 2Taw. 32:24-26)
20
1 Nibou Ndig Hizkia nggwen buhwei di buhun bibor ba, mbigom mimai hak ei nijam dima. Noro Nabi Yesaya di Amos nipmot su no bicem lene pai bak <<TUHAN sok nihyet mem Na Di Anyeng Jei leu binhyepo anyohou dimig ade mun di bitut nanti hagom ei leu mporo akei hanyen kan bi. Jei bi lene Na di Anyeng Jei amai hak ug ri.>>2 Lene Hizkia kiek noho birok dring lene ngat nadi bipai, 3 <<TUHAN e, ma ayok ngon kep bipia diba dingon gom kin dingon sren biyai midyai nok awak mem Na kikau. Dibrim dingkek ba, dita dibou ei gima dibit angon kanti kikau.>> Pai nok leu api ba ningon di ngguk bibor bipim nggruet.
4 Tirigi Yesaya kiju bikes Hizkia ei bimbut leu noni lene tirigi hei leu nibou ndig de ig him gi nahacanti bigyo lene TUHAN cuk, 5 bingkwei hanyen ndam Hizkia di ninyeng tak kep TUHAN de limwa nya bitri tut TUHAN nihyet di sok ei no dip bak <<Dani ne TUHAN Allah di adigai Daud kuk no bak ri. Ba, dimiap ade nadi bidingat ayai nggwei di kibor cem tu. Midibindei ba, akei hanyen leu api ug ei njap nitindur can bu lene akiju ba, aug coi Ditde ig ug ri. 6 Midikum ei ade njap cemti bidem ari bingwam simnaimuhwidip bu. Miditeu nani kin minu ndig Yerusalem leu nibou ndig mem mben Asyur ninda nsi. Diya ser minu ndig dini tug hon dinyeng di jeisi kin Ditde gi preu di dipreu ei bak Ditde awak di Daud cem.>>
7 Yesaya tri TUHAN nihyet dima bak leu lene cuk nibou ndig de awak nya biyuug puk biei ara ningat leu api yoho binem-nnai lene ikrau bibidip nibou ndig nide buhwei leu api noni kei hanyen. 8 Lene Nibou Ndig Hizkia hig ser noni <<Mindei rinok bindo mem da leu binhyepo dikan tut bipia TUHAN miyai gi kei bida ba, njap nitindur can bu lene midikiju ba, dicoi ug ei TUHAN De Ig hanyen cem i?>>
9 Lene Yesaya buhup hanyen bak <<TUHAN miyai bindo biNa Di Anyeng Jei gi bindo tut bipia Noni yai mun bipek kep nipreu eisi mem na. Nogindini ma ando igbit gi tou rino ajoi sut i? Ajoi sut mun di bindo tut jam mpia yaisi di Ahas bibon pima ningwes mbut bei nibiho ug ei niciusi simnai e? He ma ningwes su jou hanyen kep ninghim dip ug ei niciusi simnai e?>>
10 Lene Hizkia buhup <<Krop kei mem mpia yaisi ningwes dima mbut bei nibiho ug ei niciusi simnai lewo gima bit leu nok niyai kepti. Gima rino ma abindei ba, su jou hanyen kep ninghim dip ug ei niciusi simnai.>>
11 Lene Yesaya ngat nadi bak TUHAN lene TUHAN bindei ba, mun di bindo tut mpia yaisi ningwes dima su jou hanyen kep ninghim dip ug ei niciusi simnai.
Nibou ndig mben Babel cuk yo di igya kui noni yuug ngat Hizkia
(Yes. 39:1-8)
12 Ei nijam dima Merodakh-Baladan di nok nibou ndig mem mben Babel di nicig ninyeng Baladan miap tut bipia Nibou Ndig Hizkia sindi kei hanyen tu. Lene cuk yo di igya kui noni ibou poi mem gima ittei srat kin munkwas di yai mem noni. 13 Hizkia cigit yok kwei dima lene ndo nide mun di nyeng tut nya hagom biyok. Mun di nyeng tut di ndo biyok nya rino mas kin perak kin biei ngat di ui-gwang kei nya kin mun di ibindei njita nyop kei nya kin minggwen di tentara ide nya hagom. Nibou Ndig Hizkia giku mun nyeng gom leu ndigban di jo ei nide ig nibou ndig kin gi jo bidem nide minu ninyeng tak kepti cem leu yok bi. Noro ndo hagom biyok. 14 Lene Nabi Yesaya bisau ndam Nibou Ndig Hizkia bihig ser <<Yo dima ikwei leu hantou i? Ipai mindei bina i?>>
Hizkia buhup <<Ikwei leu minu Babel di ting bibor.>>
15 Lene Yesaya hig ser nibou ndig <<Ando mindei biyok di ingat ei ade ig nibou ndig i?>>
Lene Hizkia buhup <<Ingat bidem ndigban nyeng hagom. Digiku mun nyeng gom ei gudanti ei ditde ig nibou ndig leu yok bi. Noro dindo hagom nyahan biyok tu.>>
16 Lene Yesaya pai bak nibou ndig <<TUHAN pai bipia 17 tto bou midem leu api tungwatu nya mipian ndigban di anyeng tut nya hagom ei ade ig nibou ndig kin ndigban di adigup bat-adigai bat nya inju keyam leu nimbie him kikau kwei bipek ammani kep hagom ug ei minu Babel. Hi di mijo cem bi. 18 Mporo yo dima mikat yo di intun nani him ibou poi lene yuubon yok mem gima igyai midyai ei nibou ndig mem mben Babel de ig nibou ndig.>>
19 Lene Nibou Ndig Hizkia buhup <<TUHAN nisokti di apai bida dima cem kei. Nibou ndig buhup nok gima lewo kan bipia nide ninyeng tak kep limwa nyati mimpung tut nibong kei nigwam keisi mem nijam di niyaisi jo dima lene gima dem.>>
Nibou Ndig Hizkia niyaijo ningwig honti
(2Taw. 32:32-33)
20 Nipas kep tut Nibou Ndig Hizkia niyai munti nindigsi nya bitut mimbri di kui ningkek kin nibon minyei utti kin nibindei ris minyei ug ei minu ndig dimati cem hagom jo ei srat Nibohon Nibou Ndig Mben Yehuda Nyati. 21 Hizkia mai leu lene nipmot Manasye kui bigwam nok nibou ndig mem mben Israel biya luei nohoti.