Elia kin Obaja yuum yam
18
1 Tirigi mpia ngei ndung kikau mem ari bingwam ningai tu lene TUHAN cuk Elia <<Ma aug ndo nanti bak Nibou Ndig Ahab leu api midibindei ba, mpia but hanyen.>> 2 Leu api Elia kiju bimbut.Ei nijam dima ne ninggum hwen timiei Samaria nya bibor. 3 Gima rino Ahab hig Obaja kwei ngat noni. (Obaja ne mindor mem Ahab nide ig bei nsi nya hagom ri. Noni ba ningon di gom bikuk no bak TUHAN cem. 4 Tirigi Izebel kinyon ei niyai nimai bak TUHAN de nabi nyati lene Obaja jem nabi nya ibou sratus gom kwei bikwas yok ei nimpung can biku ibou ningot muhwi ei dihyei nyem gom lene ku ibou ningot muhwi bu ei dihyei nyem gom bu. Lene noni ba njita kin minyei binyohou yok cem.) 5 Mpe dima lene Ahab pai bak Obaja <<Akwei ba, suug nggok ser minyei bousi kin minyei pmot nya di pingge hak bigyo ug e. Mpaba misitau kep minta nok gi dem mem gima sibinyohou side kuda kin mindhe bagal nya. Leu binhyepo sibui mindhe ningot gom leu mindhe side nya ikieti bi.>> 6 Ikwas minu dima imbut eisi tut yam bice tut yam tut imbutti leu su lene ikwas yam bigyok igyai kep hanjop nsi nya hagom.
7 Tirigi Obaja mbut kak puig sinon rino noni kin Elia yuum yam kros. Obaja ngat igbit Elia apino ba ningwak bikik dihyei ei nimig him lene hig ser noni <<Ningat ne nani Nabi Elia rin e?>>
8 Lene Elia buhup <<Igbit ri. Dani ne Elia ri. Ma angkwei hanyen ba, apai bak ade nibou ndig bipia dikwei su.>>
9 Noro Obaja buhup <<Dibon mun ndei tunggwei sut na di Andigpoi dima bindei ba, ma acuk da hanyen ndam Nibou Ndig Ahab leu binhyepo noni yai nimai bida i? 10 Diba neheng bipai tug hon ade TUHAN Allah di niyaijo ninyeng bipia nibou ndig nggok ser na kikau ug ei dihyei nisurti-nipekti tu. Tirigi nibou ndig hi buhup nihyet bipia abong ei nide minu dima bi lene Ahab bidip huk ba, suar nibou ndig dima ba neheng bipai bipia noni kin nide limwa nya ingat angat ei nide minu dima bi sren. 11 Nogindini acuk da ba, duug pai binoni bipia akwei krau minu dini tu e? 12 Notou mem da gino duug pai akweisi binoni lo, TUHAN Ninnei teu na ug ei minu hiter di dikan tut bi i? Tirigi nibou ndig kwei nggok ser na lo, ngat angat bi lene noni miyai nimai bida drek dip. Ma ayok ngon kep bipia habiei dimien kwei bipek ammani kep lene diba dingon gom bikuk da bak TUHAN. 13 Akan tut bipia tirigi Izebel kinyon ei niyai nimai bak TUHAN de nabi nyati lene dijem ibou sratus gom kwei bidikwas yok ei nimpung can bidiku ibou ningot muhwi ei dihyei nyem gom lene diku ibou ningot muhwi bu ei dihyei nyem gom bu. Lene diba njita kin minyei binyohou yok bi e? 14 Nogindini nggon rino na di Andigpoi acuk da bidingkwei hanyen bidipai sut akweisi dini bak nibou ndig i? Noni miyai nimai bida!>>
15 Lene Elia buhup <<Dipreu ei mem na tug hon TUHAN Di Sindem Bibor di dikuk da bak ninyeng bipia njap di ammani midiya ei nibou ndig noho bei.>>
Nabi Elia ug um nabi Baal nya ei Nungug Karmel
16 Gima rino Obaja ug pai sut Elia nikweisi bak Nibou Ndig Ahab leu api Ahab mbut bikwei um Elia. 17 Tirigi Ahab tau kep noni lene pai bak <<Na di abindei minu Israel hagom kinei bibor akwei su e?>>
18 Noro Elia buhup <<Dani rino dibindei di minu Israel hagom kinei bibor bi! Na di Andigpoi kin acig jeni rijibindei di minu Israel hagom kinei tirigi jikuk je bak kwar Baal bijibit TUHAN nicuk jeti nya bi. 19 Nogindini ma anduk mben Israel yahagom ba, ikwei um da ei Nungug Karmel. Ma abuwak nabi Baal nya ibou sratus bitai ningot muhwi kin nabi Asyera ibou sratus bitai di nibou ndig sop Izebel hati tut yok nya cem yahagom kwei.>>
20 Gima rino Ahab nduk mben Israel kin nabi Baal nya yahagom kwei ba, idem yam ei Nungug Karmel. 21 Lene Elia ya ei tungwatu pima yok yahagom yoho bei bipai biyok <<Jikrau kep jingon canti kikau mem nijam pig bu i? Gino TUHAN ne Allah nijit rin lene ma jikuk je bak! Gino Baal ne allah nijit rin lene ma jikuk je bak!>> Noro tungwatu pima yok ibuhup bi. 22 Lene Elia pai biyok <<TUHAN de nabi nindigsi imai bingwig noro dangkom he diyaijo. Noro Baal de nabi dima yok imangti ibou sratus bitai ningot muhwi. 23 Nnaba jijem sapi nikre ningut can kwei. Suar Baal de nabi nya ibui sapi ningut gom bidigo kukiau lene ikon hagom bikes ei biei hum dip. Noro ma iba hum pindei au. Dani midibui sapi ningut gom bu bidiyai igbit yoni igyaisi dima ba, dani cem midibahum pindei bi. 24 Lene ma Baal de nabi nya ingat nadi bak ide kwar Baal di ikuk yok bak leu api midingat nadi bak TUHAN. Gi hi di buhup ighyet tug hon gi pinak hum kwei leu mpia-bbed him kwei ne Allah nijit ri.>>
Lene mben Israel yahagom imbos-hi-mbos bipai <<Nice tut ade nicuk nyeti!>>
25 Lene Elia pai bak kwar Baal de nabi nya <<Ma jidimig jide sapi nikre ei bijitin ei bibie lewo jimang bibor noro ma jiba hum bipindei au. Lene ma jingat nadi bak jide kwar Baal di jikuk je bak.>>
26 Yoni idimig sapi nikre ningut gom ei bitin ei bidem tu. Lene ingat nadi bak kwar Baal leu njap bigyoti kikau bipek mpia huk pijum. Iba ighyet nindig bibor pai <<Na di kwar Baal e, ma abuhup nyeni nihyet o!>> Lene ipri-pri nyen bibikrop ttai ide nimbar hum dok noro kwar Baal di ikuk yok bak buhup ighyet bi.
27 Mpia huk pijum rino Elia sindi ba yok bikek bipai <<Jikon jihyet nindig bibor bu! Noni ne kwar di jikuk je bak rin bi e? Mpaba noni mmou-mmou nyen e, he ug gumuhukti e? Mpaba noni mbut ug ei minu ting tu e, he bong mai su apino suar jiwin noni e?>> 28 Gima rino nabi pima yok iba ighyet nindig bibor bu ngat nadi lene iba ide singau kin ide simeda bisrip ingkek dip bibindei ba, inggrom tau bit leu nok igyai kepti.
29 Icot-cot nyen nok gima dem kep nok yo di mirei bon yok kikau ug bipek mpia caisi noro kwar di ikuk yok bak dima buhup ighyet ba, yok ngon kep yok bi sren.
30 Lene Elia pai bak limwa pima yok yahagom <<Ma jison kwei bijidideu da.>> Yahagom ison kwei dideu noni lene noni kinyon ei nikinding TUHAN de nimbar hum dokti di lus bikinei su. 31 Noni bei tig nindig nindak simnaibrimigcan. Tig nindak gom mem bibikwop Yakub po TUHAN jem ninyeng Israel pima nipmot bat nya lene nok. 32 Lene noni ba tig dima yok bidingug nimbar hum dok di nok gumihyep po tungwatu nya ikuk yok bak TUHAN eisi pima. Lene noni tig got di bikrop ttai nimbar nikiou nok gi dem mem isiber minyei di dem liter simnaimuhwidip eisi. 33 Noni kon biei hum ei nimbar dima dip bibui sapi nikre ningut gom pima bidigo kukiau lene kon ninghui ei biei hum dip. Lene noni cuk tungwatu nya leu binhyepo itau minyei ei dibijig ningat bitaisi kwei ba, ibiprok sapi ninghui kin biei hum. Yo dima igyai hagom bit leu nok nicuk yoti. 34 Lene noni cuk yok nimbican bu <<Ma jiyai nok gima hanyen bu.>> Leu api igyai hagom hanyen bu bit leu nicuk yoti. Lene noni cuk yok nimbiningai bu <<Ma jiyai nok gima hanyen bu.>> Leu api igyai hagom hanyen bu bit leu nok nicuk yoti. 35 Lene minyei dima silipti nimbar hum ndok bitut mun di joti nya hagom kikau ba, got pima ut tut minyei.
36 Tirigi jam dem mem mben Israel ibon midut mpia caisi bit leu nok igyai kepti lene Nabi Elia kwei ya kui nimbar dima bingat nadi <<TUHAN Allah di Abraham kin Ishak kin Yakub ikuk yok bak e, ma ando bindo brei ei yo dini yahagom igyai him bipia anyeng tak kep mben Israel ba, dinok ade awak biditin ei mun dini yok hagom bit leu nok acuk dati cem. 37 TUHAN e, ma abuhup dihyet leu binhyepo yo dini yahagom mikan tut bipia Na di TUHAN ne Allah di nijit ri. Nani rima abindei ba, yahagom ikwei kuk yok biNa hanyen bu.>>
38 Ngat nadi nok rino TUHAN kes hum di ninjeng srei kwei leu mpia-bbed him kros leu api hum dima yem sapi ninghui kin biei hum kin tig nya hagom leu api cig-cai ug ei dihyei ninjek dip bibindei ba, minyei di jo got nsi pima hagom pingge. 39 Tirigi tungwatu pima yok yahagom ingat mindur dini bou igyai him lene ikuk yok ba, iba ingwak bikik dihyei lene ikon ighyet nok gom bipai <<TUHAN ne Allah nijit ri! TUHAN Nongkom Allah nijit ri!>>
40 Lene Elia cuk limwa nya <<Ma jikat nabi kwar Baal nya yahagom leu binhyepo hi nang biningwes ngun bi!>> Gima rino tungwatu pima yok ikat nabi Baal yahagom leu api Elia buwak yok ug ei Minyei Kisyon nyai biyai nimai bak yahagom ei sirima.
Nijam mpia ngei ndung ningwigsi
41 Lene Elia pai bak Nibou Ndig Ahab <<Nogindini ma aug yem njita. Biget mbras ug rin lewo biget ngan bitibim ei ditingou nsi tu.>> 42 Tirigi Ahab ug yem njita sri lene Elia kui ug ei Nungug Karmel nimbigdip lene kuk no biba ningwak bikik dihyei bikes niimaisi ei nibiau nggreti bimmou kei. 43 Lene noni cuk nide awak gom bipai <<Aug ba, acap ser muk ngwa dip.>>
Nide awak ug cap ser bikwei hanyen lene pai <<Dingat mun nyeng hi bigyo.>> Noro Elia cuk noni mbimuhwindacan bicap-cap nyen ser. 44 Tirigi awak dima kwei hanyen nimbimuhwindacan lene noni buhup <<Dingat bumbuhui ttou gom di kui leu muk ngwa dip lo, ninyanti dem kep tungwagom ninda biabei he.>>
Lene Elia cuk nide awak bipai <<Abipbur ba, aug pai bak Nibou Ndig Ahab bipia suar noni bri nide kroba pran bingkwei hanyen ug ei nide ig nipou tirigi biget mbras ser nimbutti bigyo.>>
45 Jei bi lene jinnum nggai kep minu dima ba, hou di nimig ten kui yokti lene biget mbras nindig bibor cem leu api Ahab bri nide kroba pran bingkwei hanyen ug ei Yizreel. 46 Haninyai TUHAN sindem tut Elia nindig bibor. Noni krop nide sinsun bikri nide bang kep nintig bou bingkiem leu api dor bibie Ahab noho kak puig jei dima kikau ug ei dimbou pmem minu ndig Yizreel.