Nabi Elia kui ug ei Nungug Sinai
19
1 Nibou Ndig Ahab pui sut mun di Elia bibon nya bitut nabi Baal nya di Elia yai nimai biyok tu hagom bak nitnem Izebel. 2 Lene Izebel sok nihyet bak Elia bipreu kep noni <<Ma kwar di dikuk da bak kes hukum ei da dip biyai nimai bida gino njap di hyep mem mpia di nok gini dibuhup bina noyam kin gino abibon nabi pima yok bi.>> 3 Lene Elia ttin tut nindig bibor binang ba, nide awak yoni ingwes ngun ug ei Bersyeba ei minu Yehuda.Tirigi yoni yuug krau lene Elia kuk nide awak bigwam ei mpia dima, 4 leu api mbut nimig kikau mem njap nitindur gom ug ei iggum ndigsi. Noni kuk no bigwam ei biei ndig behei gom leu api joi sut um nimai hak ug ba, ngat nadi bipai <<TUHAN e, cobi! Ayai dinnei leu da hak ug lewo diyai munti nya kei bibor dor njiriek didigup bat-didigai bat nya igyai munti nya bi.>>
5 Lene noni bong nyahan ei biei dima nitriti bibong mai hak. Lene malaikati gom kwei ngget biwin noni kros bipai bak <<Elia e, akiju ba, ayem njita.>> 6 Noni da niyai bingat lo, roti nindak gom kin minyei ampou gom jo dideu nibousi. Gima rino noni yem njita bidut minyei leu api kuk no bibong mai hanyen bu. 7 Lene TUHAN de malaikati kwei hanyen biwin noni mbigom kin bu bipai <<Akiju ba, ayem njita leu binhyepo ayai nisindem mem gima ambut ug ei minu ting bibor.>> 8 Lene Elia kiju biyem njita bidut minyei leu api yai nisindem mem gima mbut nimig mem njap ningot bitai kikau ug ei Nungug Sinai di Allah ndo Nonti bak Nide limwa nya eisi pima. 9 Tirigi noni ug krau lene coi ug ei dihyei nyem gom bibong mmun gom ei sirima.
Lene TUHAN hig noni kros <<Elia e, akwei nggon ei sirini i?>>
10 Lene noni buhup <<TUHAN Di Sindem Bibor e, dani ne Nangkom Ade awak rin bidiyai midyai hagom bit leu nok acuk dati tu. Noro mben Israel ipigau mun di ipreu ei mem Nani ba, inggek Ade nimbar hum dok nya bingwig bigyai nimai bak Ade nabi nya yahagom tu. Dangkom ngat he duum nimai bigyo noro nogindini yo dima ibungwam mem gima igyai nimai bidani cem!>>
11 Lene TUHAN buhup <<Ma ahei ug ei nisai ba, aya ei Doho bei ei mbigdip dini.>> Lene TUHAN mbut njiriek mpia dima leu api pinak hou di nimig ten bibor di bindei ba, nungug nya sra hacan ba, bor ngug nya ki binnir-wap bibie. Noro TUHAN ndo Nonti tug hon hou dima bi. Tirigi hou kes hon bintus hak lene dihyei ugwa-kwei noro TUHAN ndo Nonti tug hon dihyei di ugwa-kwei dima cem bi. 12 Tirigi dihyei ugwa-kwei bu bi lene hum sror noro TUHAN ndo Nonti tug hon hum di sror dima cem bi. Tirigi hum mu leu su ba, mpia mbum-bra lene nihyet gom dem kep nok no di hamui nyahan tibim kwei.
13 Tirigi Elia miap nihyet dima lene ba nide ban binggai kep niimaisi. Lene noni hei ug ei nisai biya hammi dihyei nyem dima nuhui. Lene nihyet gom hig ser noni <<Akwei nggon ei sirini i?>>
14 Lene noni buhup <<TUHAN Di Sindem Bibor e, dani ne Nangkom Ade awak rin bidiyai midyai hagom bit leu nok acuk dati tu. Noro mben Israel ipigau mun di ipreu ei mem Nani ba, inggek Ade nimbar hum dok nya bingwig bigyai nimai bak Ade nabi nya yahagom tu. Dangkom ngat he duum nimai bigyo noro nogindini yo dima ibungwam mem gima igyai nimai bidani cem!>>
15 Lene TUHAN cuk noni <<Ma angkwei hanyen ug ei iggum ndigsi dideu Damsyik! Lene acoi ug ei minu dima ba, aba mini nibon midut bita Hazael nok nibou ndig ei minu Siria. 16 Lene aba mini nibon midut hi kin bu bita Yehu di Nimsi nipmot nok nibou ndig mem mben Israel. Lene aba mini nibon midut hi kin bu bita Elisa leu Abel-Mehola di Safat nipmot nok nabi di ya luei ahoti bu. 17 Tungwa tou rino ningwes ngun leu Hazael de simeda mitug midut tug hon Yehu de simeda. Lene tungwa tou rino ningwes ngun leu Yehu de simeda mitug midut tug hon Elisa de simeda. 18 Noro midinyohou mben Israel ibou sribu muhwindacan bingwes ngun lewo ingon gom tut Da lene ikuk yok bak Baal bi ba, imei nide kwar cem bi sren.>>
TUHAN dimig Elisa nok nabi
19 Lene Elia mbut ba, ug tau kep Elisa tirigi noni ba sapi ningut nyatungwagom ba, bitai bikkin dihyei. Noni prion biei ei sapi ningut can inggibi dip bibikwop nok leu api ya abia kep hagom bikrau mun di bipingok imbutti. Lene Elia juk nide sinsun di ninda jei leu no bibijuk Elisa. 20 Elisa kes nide sapi nya ei bidor bram Elia bihig ser noni <<Ace tut ba, duug pigo dicig-dipmem nya nipou ug e leu api dikwei bit na.>>
Lene Elia buhup <<Dwai, aug ba, apigo yok hak ug. Dipai ser na bi.>>
21 Elisa ngkwei hanyen bibui nide sapi nya lene ba biei di prion ei inggibi dip pima bindig hum leu api bam mikwau kep. Noni kwas mikwau dima hagom tut nisut bat di igyai midyai bit noni leu api igyem hagom bingwig. Gima ngwig lene ba no bikum Elia bahati tut noni.