Nipui mun tut Nabi Elia kin bed di biang mpia ngei ndung
17
1 Mpe di gom lene nabi Elia leu Tisbe ei hanjop Gilead ug pai bak Nibou Ndig Ahab <<Andigpoi e, dinok awak mem mben Israel ide TUHAN Allah di niyaijo. Dipai tug hon Nonti ninyeng bipia hon kep ammani kui lene mpia ngei ndung ba, nggou mipren leu dihyei ninjek dip kikau mem ari bingwam can ningai dini kui bibo danti dipai sut hanyen ug e.>>2 Lene TUHAN pai bak Elia, 3 <<Ma akes minu dini ei ba, aug ei mpia nipriti ei Minyei Yordan nite dima ug lene ma aku na nyahan dideu Minyei Pmot Kerit. 4 Adut minyei pmot dima lene midipinak miniwou nya hwou sut njita mem na.>>
5 Lene Elia bit TUHAN nicuk noti buug ei Minyei Pmot Kerit bibong ei mpia dima. 6 Noni dut Minyei Pmot Kerit lene miniwou nya ipian kep njita kwei ba, ibinyohou noni mem njap bigyoti kin mmunti cem. 7 Jei bi lene mpia ngei ndung dima bindei ba, minyei pmot dima cem pingge leu su.
Elia ug ngat sop kibom gom ei Sarfat
8 Lene TUHAN pai bak Elia, 9 <<Nogindini ma aug bong ei minu ndig Sarfat dideu hanjop Sidon lewo dipingok sop kibom di bong ei sirima ningonti leu binhyepo noni ngei njita hi bina ba, ayem.>> 10 Gima rino Elia ug ei Sarfat. Tirigi noni kwei krau dimbou hui di itu ei ngug tig lene ngat sop kibom gom di sindi rop biei. Lene pai binoni <<Sindig e, ma atau minyei gom bididut e?>> 11 Tirigi kibom dima sindi ug tau minyei mem noni lene Elia hig bram noni <<Ma aki roti poi mien cem bida bidiyem e?>>
12 Lene kibom dima buhup <<Dipai bina tug hon ade TUHAN Allah di niyaijo ninyeng bipia roti hi jo bida bi. Ditde tepun dem ikam inda nitun gom ngat he di jo ei mokti kin mini zaitun ampou nijou he di jo ei ig bei. Sindi dikwei rop biei leu api midingkwei sut ug ei ig bei leu api midingei njita poi mien dima mem dipmot nyeni. Tirigi niyem njita dima bingwig leu nye lene nibet ningon mem gima nimai ninggum hak.>>
13 Lene Elia pai bak <<Amei e, ma angon ku na tut au! Aug ba, angei njita mem jenti jiyem hak ug. Noro ma akang roti nindak mien gom ba, attei kwei bidiyem nipou ug e leu api angei niken mem apmot jeni bijiyem kep jingguma. 14 Lewo mben Israel ide TUHAN Allah simbot dat bipia ade tepun mingwig leu nahamti ba, ade mini zaitun mipingge leu ampou nijou bi bibou Noni mibindei ba, mpia but hanyen ug e.>>
15 Kibom dima ug yai hagom bit leu nok Elia nicuk noti lene yahagom igyem njita nok gi dem mem nijam di jei bibor. 16 Tepun pima ngwig leu nahamti ba, mini zaitun pingge leu ampou nijou bi kikau bit leu nok TUHAN nipreu ei mem yoti.
17 Bed poi ser leu api kibom pima nipmot nggwen bibor bijo ninno leu api mai kep yok. 18 Gima rino kibom hig ser Elia <<Andigpoi di anok Allah de awak e, nggon rino abon mun di kinei bibor dini tut da i? Akwei bong bit nye leu binhyepo abindei ba, Allah yok ngon kep ditde sisar bibindei ba, dipmot mai drek dip sisar dima e?>>
19 Lene Elia buhup <<Akon apmot ningut kwei bida.>> Leu api Elia kon ningut leu kibom dima nindati lene noni kon bikui sut ug ei nide nghim nsi ei ig ninjek dip hu kwei bikes ningut bibong ei nonti nibongti. 20 Lene noni ba nihyet ndig bingat nadi bipai <<Ditde TUHAN Allah e, nggon rino abindei ba, mun di buhun bibor dini cut igkep kibom dini i? Noni ngondut da binyohou da nok gi kei. Ayai nimai bak nipmot tut nggon i?>> 21 Lene Elia prion ningut ei munggwom dima dip mbiningai bingat nadi <<Ditde TUHAN Allah e, ma awin mot dini bikiju hanyen hak ug.>> 22 TUHAN buhup Elia de nadi leu api mot dima ninnei juk ei dip biniyaijo hanyen bu.
23 Lene Elia usap noni bijuk tut hanyen ndam nipmem bipai bak <<Angat i! Apmot kiju biniyaijo hanyen tu!>>
24 Lene kibom dima buhup <<Jo nibreisi mem da bipia na di Andigpoi anok Allah de awak. Ningat ne Noni tri tut nihyet tug hon nani!>>