Nibou ndig sop leu minu Syeba kwei cem kep Salomo
(2Taw. 9:1-12)
10
1 Jei bi lene nibou ndig sop leu minu Syeba miap tut Salomo ninyeng di jei. Gima rino noni kwei ngat noni ei minu ndig Yerusalem leu binhyepo ba nihyet nibiti ninda bisigbou noni tut mun di nggruk bibor. 2 Noni hei sut nide awak di igya kui noni imang bibor. Yoni ipwoi biei ngat nya di ui-gwang kin tig permata kin mas mang bibor bikon hagom ei unta di ijem kwei nya dip. Tirigi noni kwei krau ba, Salomo ya um tu lene noni ba nihyet nibiti ninda bisigbou Salomo tut mun nyeng hagom bit leu ningon kanti. 3 Lene Salomo buhup nihyet nibiti ninda di sop dima bisigbou noni tut hagom nok igbit bimbot kep tut mun di nggruk bibor hagom brei binoni. 4 Nibou ndig sop dima ngat bou niyai him bipia Salomo ningon ki bibor. Noni yok niyai kep ig nibou ndig di Salomo ngot mem nonti, 5 kin ig di Salomo ngot mem yo di igya kui noni kin notou noni nyohou dimig nide kintrorti kin nide awak nya di ijuk sinsun hagom bit leu nok midyai di igyai nya kin njita kin biei ngat ningei ei nide meja dip kin nide awak di inyohou dimig pesta kin nibon midut di noni bon ei TUHAN De Ig hagom. Mun di nibou ndig sop leu minu Syeba ngat bou niyai him dima hagom bindei ba, noni nggap leu tut ba, ningon mbris leu cem. 6 Gima rino noni pai bak Nibou Ndig Salomo <<Anghapti di tibim tut mun dini yok ei ditingou nsi tirigi dibong ei ditimieisi pima hagom dem igbit ri! 7 Nipou ne diba dingon com bi bibou dikwei ngat hagom bou diyai him ug api diba dingon com. Noro dimiap anghapti tut mun nyeng poi he lewo angon ki bibor ba, anyeng tut ndigban nindig bibor ba, gima nindig dor njiriek mun di tibim ei ditingou nsi pima! 8 Mbenjen! Atnem bat nya inggei-hi-nggei! Yo di igya kui nani cem inggei-hi-nggei lewo imiap kep ahyet di tibim kwei leu angon di ki-kutti! 9 Jikwei ba, inggei sut TUHAN di nok na di Andigpoi ade Allah! Noni ta na di Andigpoi ba, anok nibou ndig mem mben Israel lene gima ndo brei bipia Noni joi sut na di Andigpoi nindig bibor. Noni ngondut mben Israel kikau buug hon nohonti bi. Gima rino Noni ta na di Andigpoi ba, anok nibou ndig mem yok leu binhyepo yahagom ibit nihyet ba, ingon sren.>>10 Lene nibou ndig sop leu minu Syeba hit mun di kei di noni pwoi kwei mem Salomo nok mas di nibuhunti kilo sribu bitai kin tig permata kin biei ngat di ui-gwang nindig bibor. Hon kep njap dima kui ne hi yai biei ngat di ui-gwang di nindig bibor bak Salomo noyam kin gi hi di nibou ndig sop leu minu Syeba yai binoni bi sren.
( 11 Hiram de kibar minyei nya di ttei mas kwei leu Ofir pima ttei biei cendana kin tig permata mang bibor cem kwei. 12 Lene Salomo ba biei dima bibon terali nya mem TUHAN De Ig kin nide ig nibou ndig cem. Lene noni cuk tukan nya biba biei dima bibon nggong mbrei nya mem yo di ikek kan nya. Biei cendana dima ne gi hi di kei bibor kei dor njiriek biei cendana nindigsi di tungwatu nya ipian kwei leu minu mben ngkiai ide hagom ri. Hon kep nijam dima kui lene hi ngat biei cendana nok gima bou niyai him bu bi sren.)
13 Lene Nibou Ndig Salomo yai mun nyeng di nibou ndig sop dima ningon pri kep bak bitut munkwas di Salomo tin ei mem gima yai binoni bit leu niyai kepti. Lene nibou ndig sop dima kin yo di igya kui noni yahagom ingkwei hanyen ug ei minu Syeba.
Ndigban di nibou ndig Salomo nyeng tut nya
(2Taw. 9:13-29)
14 Nibou Ndig Salomo tug ndei mas di nibuhunti kilo sribu nyatungwagom ningai bikwop ari bingwamti. 15 Gima ter leu belasten di noni tug ndei leu nitri-nipek mun cig nya kin nibou ndig ngkiai di mben Arab nya kin nibou nya di inyeng tak kep mben Israel de hanjop nsi nya yahagom ikwas tut noni.
16 Lene noni cuk tukan nya ba, ibon mun di ibipukep ser tiborh nggwen nya ningat sratus can leu api iba mas binggai kep hagom. Bikwop mun di ibon dima ne gom yem mas nibuhunti kilo muhwindacan lene nok. 17 Lene noni cuk tukan nya ba, ibon mun di ibipukep ser tibor pima nimien ningat sratus ningai hi kin bu leu api iba mas binggai kep hagom bu. Bikwop mun di ibon dima ne gom yem mas nibuhunti kilo can bu lene nok. Lene noni cuk tukan nya ba, iba mun di ibon dima nimangti ningat sratus muhwi bimau ninsi Ninsi Baham Libanon.i
18 Lene noni cuk tukan nya ba, ibon banggo mbrei nindig gom. Iba gaja nikwai di jei bibor ningkek binggai nite hi lene iba mas binggai nite hi bu. 19 Banggo mbrei dima bon mun di bahati tut nibou ndig ninda pang gom ei ninda com gom ei ninda prak leu api yeheu mindhe singa ningat ei niyenti nya. Sapi nikre ningou sinon jo ei banggo mbrei ninggimau ndam ninghim dip lene inen lin mbrei di bon nicoti nya muhwindagom bei nibiho ba, 20 yeheu singa ningat bibikwop lin mbrei niyenti nya sur nicoti nya muhwindagom pima ba, bihi ei ninda com lene bihi ei ninda prak. Ba, singa ningat nimangti ningat simnaibrimigcan. Nibou ndig mben ngkiai bidem dihyeisi dini hagom hi gwam ei banggo mbrei di nok Salomo de dip bi sren.
21 Lene tukan nya iba mas bibon Salomo de mok di dut minyei eisi nya hagom. Lene iba mas bibon nide hot nya kin hot nggram nya cem hagom mem nide Ninsi Baham Libanon. Iba perak bibon mun nyeng hi bi lewo ei nijam Salomo lene perak bon ninyeng bi. 22 Salomo ninyeng tak kep kibar minyei nindig mang-mang di ingkwei-ngkwei nyen ei muk ngwa dip bit Hiram de kibar minyei nya. Nide kibar minyei mbut- mbut nyen mem ari bingwam nitindur ningai leu api kwei hanyen tut mas kin perak kin gaja nikwai di jei bibor kin diyon nya kin hanggei nya bimpung. 23 Nibou Ndig Salomo nyeng tut ndigban nindig bibor ba, ningon ki bibor dor njiriek nibou ndig nindigsi ei dihyeisi dini hagom. 24 Lene tungwatu dihyeisi dini hagom ibrim ingkek bikwei ngig itingou mem Salomo nipingok yokti tug hon ningon di ki bibor di Allah yai binoni. 25 Bikwop yo di ikwei ngat noni ne yahagom ipwoi munkwas bikwei sut mem gima igyai bak noni. Gima ne mun di iba perak kin mas bibon kin sinsun ndok di jei kin minggwen kin biei ngat di ui-gwang kin kuda nya kin mindhe bagal nya bikwop ari bingwam nok. 26 Noni bindei ba, nide tentara ibri kroba pran ningat sribu gom sratus bitai kin kuda nya ningut sribu simnaibrimigcan. Noni kwas nide tentara ba, bihi ibong ser minu ndig Yerusalem lene nindigsi nya intek ug ei minu di gahai dima kou. 27 Ei nijam di Salomo ninyeng tak kep lene perak jo sinsiou ei minu ndig Yerusalem dem kep nok tig ei dihyei ninjek dip lene buom Libanon hei bidimbun kei ei minu dima dem kep nok biei ara di kieng kep nungug tou nya ei Yehuda. 28 Nitri-nipek mun cig nya inok nibou ndig de limwa nya ei nide kintrorti ba, inyohou pek kuda nya leu minu Mesir kin Kilikia mem Salomo. 29 Lene inyohou pek kroba pran nya cem leu minu Mesir mem noni. Kuda ningut gom nibok dem mitiei perak sratus gom ningot muhwi lene kroba pran gom nibok dem mitiei perak sratus muhwindagom. Nok gima lene nitri-nipek mun cig dima inyohou pek kuda nya kin kroba pran nya bitri hanyen bak nibou ndig mben ngkiai ei minu Het kin minu Siria cem.