TUHAN ndo Nonti bak Salomo mbigom kin bu
(2Taw. 7:11-22)
9
1 Niabiati Nibou Ndig Salomo ngot TUHAN De Ig kin nide ig nibou ndig kin ig nindigsi bit leu ningon kanti biput tu lene, 2 TUHAN ndo Nonti bak noni hanyen bu bit leu nok gi po ndo Nonti bak noni ei Gibeon pima, 3 bipai binoni <<Dingig ditingou mem ahyet tirigi angat nadi pima tu. Didimig Ditde Ig di angot dini pijum ei nok gumihyep gom ngat mem tungwatu nya ikwei kuk yok biDa eisi bijo ninno bijo kikau. Lene midiyok diyai kep ig dini ba, midinyohou kikau. 4 Gino aba angon di sren kin angon di gom bikuk na biDa bit leu nok acig Daud niyai kepti ba, abit Ditde niggai serti kin dicuk nati nya hagom lene, 5 midiyai hagom bit leu nok gi dipreu ei mem acig Daud pima. Nide nintun him yamti di bram yam nya mporo inyeng mitak kep mben Israel bram yam bijo ninno bijo kikau. 6 Ne gino nani kin ade nintun him di bram yam nya jikes hon ba, jibit diggai serti kin dicuk jeti nya bu bi ba, jikuk je bak nung nya, 7 lene midijji Ditde limwa nya leu ide minu di diyai biyok dini ba, midikes Ditde Ig di didimig ei mem tungwatu nya ikuk yok biDa eisi dini ei. Apino tungwatu dihyeisi dini hagom mporo ingwes moom kep mben Israel ba, mipa tut yok. 8 Mben ngkiai minggek Ditde Ig dini bibindei ba, tig gom mijo-jo yam dip bu bi. Lene bikwop yo di injiriek minu dini minga leu nindig bibor leu api mihig yam <Nggon rino TUHAN kes hukum nok gima ei minu kin Nide Ig diniti i?> 9 Lene hiter ibuhup <Itug ndei hukum nok gima lewo mbro nok gino ide TUHAN Allah teu yok bingwes ngun leu minu Mesir lo, ikes Noni ei su. Leu api itti kin nung nya bikuk yok bak bitig dino TUHAN kes hukum di nindig bibor ei yok dip.> >>Salomo kin Nibou Ndig Hiram ipreu mun ei bit yam
(2Taw. 8:1-2)
10 Nijam di Salomo ngot TUHAN De Ig kin nibou ndig de ig dima yem nijam ari bingwam nyatungwagom. 11 Ei nijam dima ne Nibou Ndig Hiram njei mun di Salomo suar mem bingot TUHAN De Ig nok buom Libanon nya kin buom nitu nya kin mas nya hagom bak noni. Tirigi midyai ningot ig jem can dima put leu su lene Nibou Ndig Salomo kes minu ndig nyatungwagom ei hanjop Galilea bak Hiram leu binhyepo ninyeng tak kep. 12 Lene Hiram ug ngat minu ndig dima yok bou niyai him noro joi sut minu ndig di Salomo kes bak dima yok bi. 13 Lene pai bak Salomo <<Disut e, minu ndig di akes bida rinonti ni e?>> Gima rino tungwatu nya ijem kep minu ndig dima yok ninyeng <Kabul>g kikau kwei bipek ammani kep. 14 Mas po Hiram kwas tut Salomo pima kilo sribu bitai njiriek bu.
Mun nyeng hiter di Salomo bibon nya
(2Taw. 8:3-18)
15 Salomo ba nibidip huk tungwatu nyati biwin TUHAN De Ig kin nibou ndig de ig nindig kin ngug tig di bikrop ttai minu ndig Yerusalem. Lene ba nibidip huk bibindei ba, iji kep njuisi gom ei TUHAN De Ig nite bei mpia nibiho cem. Lene noni bindei ba, iwin minu ndig Hazor kin Megido kin Gezer hanyen tug hon nisinati dima cem. ( 16 Minu ndig Gezer pima ne minu ndig di nipou yo nibou ndig mem mben Mesir kon pran bit di bindei timek ri. Leu api yai nimai bak timiei minu ndig dima bindig hagom kep hum cem. Niabiati bu ne nibou ndig mben Mesir yai minu ndig dima bak nipmisop nok munkwas di noni njei bak mem njap nindo noni bak Salomo, 17 leu api Salomo rino win minu ndig dima hanyen bu.) Lene Salomo ba nibidip huk tungwatu nyati biwin Bet-Horon-Hilir, 18 kin Baalat kin Tamar di jo iggum ndigsi ei Yehuda, 19 kin minu ndig nimbus ninju ndigban eisi nya kin minu ndig di nok nibousi mem injei kroba pran kin kuda eisi nya hanyen. Salomo ningon kanti di tin ei mem niwin minu ndig Yerusalem kin Libanon kin nide ninyeng tak kepti nya titut yam hagom dima mbut bipek nipekti kep. 20-21 Salomo ba mben Amori kin mben Het kin Feris kin Hewi kin Yebus ide nintun him di bram yam nya biyai midyai nibidip huk tungwatuti nya pima. Yo dini ne yo di intun mben Kanaan him di bram yam di mben Israel igyai nimai biyok bingwig bi ei mpe di po ibindei timek yok bigyai ide hanjop nsi nya bigyati pima ri. Mben Kanaan ide nintun him di bram yam dima inok awak kikau kwei bipek ammani kep. 22 Noro Salomo ubon mben Israel binok awak bi. Noni dimig yok ei binok tentara nya kin nibou tentara nya kin nibou pran nya kin nibou mem yo di ikrau kroba pran nya kin tentara di iba kuda di ibri nya bikon pran kan nya cem lene nok.
23 Salomo dimig nibou nya ibou sratus muhwi ningot muhwi ei mem gima inyeng tak kep yo di igyai kep midyai nibidip hukti nya di igyai kep nide midyai niwin mun nyeng mang bibor dima hagom.
24 Salomo bindei ba, yo dima iji kep njuisi gom di jo ei TUHAN De Ig nite bei mpia nibiho niabiati nitnem di nibou ndig mben Mesir nipmisop pima pri leu minu ndig Daud bibong ei nide ig nindig di Salomo ngot mem noni tu.
25 Salomo bon midut nindig mindhe titut kep humti kin midut nibiyai ningon kwes kin Allahti cem ei nimbar hum dokti po noni bindei ba, tukan nya iwin mem TUHAN pima. Lene noni ndig biei nggrai di ui-gwang kei ei nimbar hum ndokti bak TUHAN. Noni bon midut dini yok hagom bak TUHAN mbiningai bibikwop ari bingwam gom. Lene Salomo bikes ninda tut midyai niwin TUHAN De Igsi lewo hagom put tu.
26 Ei nijam dima ne Nibou Ndig Salomo bibon kibar minyei ei Ezion-Geber dideu Elot ei Muk Nuhuisi Akaba nipimat ei hanjop minu Edom. 27 Nibou Ndig Hiram pinak nide timiei di ibit-bit nyen kibar minyei di gwam kep tu nya ba, ibri kibar bit Salomo de timiei kibar nsi nya di igyai midyai nya ei kibar dip dima. 28 Mpe di gom lene yo dima ikrau kibar dima yok biyuug ei minu Ofir lene iba kibar biyai mas kilo sribu simnaibrimigtai ba, ikwei hanyen tut mem Salomo.