Ikon Brua Gi Preu kwei ei TUHAN De Ig
(2Taw. 5:2--6:2)
8
1 Tirigi hagom put tu lene Nibou Ndig Salomo nduk mben Israel ide nibou keret nya kin nibou mbier nya yahagom ba, ikwei ngat noni ei minu ndig Yerusalem leu binhyepo ikon TUHAN De Brua Gi Preu leu Sion po Daud De Minu Ndig pima buug sut ug ei TUHAN De Ig. 2 Lene yahagom induk yam kwei ei Bed Etanim tirigi tto bou dem mem Njap Ndig Ig Jibei Mpam Meng. 3 Tirigi nibou nya yahagom idem yam ei su lene imam nya ikon Brua Gi Preu, 4 bimbut tut ug ei TUHAN De Ig. Mpe dima imam nya kin keret Lewi nya ikon TUHAN De Prak Meng cem bitut nimbumbati nya hagom bigyok ei TUHAN De Ig. 5 Lene Nibou Ndig Salomo kin mben Israel yahagom induk yam ei Brua Gi Preu nuhui bibon midut nibui mindhe-ndhe nya bak TUHAN lo, bit bon ikwop mindhe-ndhe di ibui nya nimangti kan bi. 6 Lene imam nya ikon Brua Gi Preu kikau ug ei TUHAN De Ig bikes bijo ei kerub nya ibehei ei Ninsi Di Kwes-Kwau. 7 Kerub dima ninyehei jo nai gau brua dima bitut ug di ibittei nya di jo nitta cem. 8 Ug di ibittei dima jei bibor. Gima rino tungwa tou rino ya hammi dimbou hui ei Ninsi Di Kwes-Kwau mingat niyenti nya bou niyai him. (Ug dima yok jo nijoti kikau kwei bipek ammani kep.)9 Mun nindigsi hi jo ei Brua Gi Preu dima ninsi bi lo, tig mma ningat can po Musa kes eisi ei mpe di po TUHAN preu ei mem mben Israel ei Nungug Sinai tirigi ingwes ngun leu minu Mesir pima he.
10 Tirigi imam nya yehei leu TUHAN De Ig rino bumbuhui ttou gom juk kwei bimpung kei ei ig bei. 11 Leu api TUHAN de nikei-kau-keisi piga bumbuhui dimati bibindei ba, bit bon imam nya icoi hanyen bibon midut nya kan bi. 12 Gima rino Salomo ngat nadi bipai,
<<TUHAN e, mbro nok gino akon mpia njap anai ei mpia-bbed him lo, aku na nyahan ba, aba bumbuhui di dindi-kai binggai kep Nanti.
13 Tini bu ne dingot ig di kei-kau-kei mem Na leu binhyepo akwei bong bit nye bijo ninno bijo kikau.>>
Salomo tri tut nihyet bak nide limwa nya
(2Taw. 6:3-11)
14 Tirigi nide limwa nya yahagom igya igyati lene Nibou Ndig Salomo kiek no bitou kep yok leu api ngat nadi tindei mun di kei leu Allah mem yok. 15 Lene noni pai biyok <<Ma nyeni yahagom inggei sut mben Israel ide TUHAN Allah! Noni yai mun di Noni preu ei mem dicig Daud hagom nok gi dem bit leu nok gi po pai binoni, 16 <Tirigi po dibuwak Ditde limwa nya kwei leu minu Mesir pima kikau kwei bipek nijam dini kep lene dindo mpia ttou nsi gom mem gima angot Ditde Ig bijikuk je biDa eisi bidem minu Israel nisurti-nipekti hagom bina bi. Noro didimig na di Daud ei leu binhyepo anyeng mitak kep Ditde limwa nya.> >>
17 Lene Salomo binut bu bipai <<Dicig Daud joi sut ngot TUHAN De Ig gom leu binhyepo mben Israel mikuk yok bak ide TUHAN Allah eisi.>> 18 Noro TUHAN pai binoni <<Mbro nok gino ajoi sut gima angot ig mem Da ba, angon kanti dima igbit rin lo, 19 dice tut bi leu mporo apmot nonti rima mingot ig dima mem Da.>>
20 Disut bat jen, TUHAN yai hagom bit leu nok Noni preu ei su. Diya luei dicig nok nibou ndig mem je di mben Israel bidingot TUHAN De Ig leu binhyepo jikuk je bak jide TUHAN Allah eisi. 21 Nok gima cem ditin ei ninsi gom ei TUHAN De Ig mem Brua Gi Preu di tig mma ningat can po Allah bon mem idigup bat-idigai bat nya pima joti ba, bipreu ei mem yok tirigi Noni buwak yok kwei leu minu Mesir pima.
Salomo ngat nadi
(2Taw. 6:12-42)
22 Tirigi Salomo de limwa nya itou kep noni nggilun lene noni kiek no biba noho rok nimbar hum ndok bisu ninda hacem, 23 lene ngat nadi bipai <<TUHAN di nok mben Israel ide Allah e, hi nok Nani ningat rin ei gwamti kin dihyeisi dini bi! Tirigi ade limwa nya ingon gom tut Nani ba, iba ingon di gom bibit ahyet lene ayai mun bit leu nok apreu ei mem yokti hagom ba, angon ngakei yok cem. 24 Ayai hagom bit leu nok apreu ei mem dicig Daud pima tu. Ade nipreu eisi nya hagom pek kep mem nye njap di ammani tu. 25 TUHAN e, nogindini handei kon ba, abindei ba, Ade nipreu eisi hiter pima cem midem igbit angon kanti. Lewo apreu ei mem Daud bipia gino nide nintun him yamti di bram yam nya minyohou bit ahyet hagom noyam kin gi po noni bit ahyet pima lene yoni migya luei Daud nohoti bram yam bijo ninno bijo kikau. 26 Gima rino TUHAN di nok mben Israel ide Allah e, ma abindei ba, mun po apreu ei mem dicig Daud di Ade awak pima mipek kep mem nye njap di ammani.
27 Noro Allah e, nggon rima akwei bong bit nye ei dihyeisi dini i? Mpia-bbed him bon ninyanti kin nijeisi nok gi dem mem Nani bi. Lene notou Ade Ig di dingot mem Nani nok gi dem mem Nani i? 28 TUHAN di nok ditde Allah e, dinok Ade awak. Angig atingou mem dihyet ba, abuhup ditde nadi tut mun di dahara hwou biNa mem njap di ammani. 29 Handei kon ba, ayok ayai kep Ade Ig dini mem mmun-njap lewo gini ne gumihyep di adimig ei mem Ade limwa nya ikuk yok biNa eisi ri. Handei kon ba, angig atingou mem dihyet tirigi diba doho rok Ade Ig dini bidingat nadi. 30 Na di TUHAN di angat rin ei atimieisi ei gwamti e, angig atingou mem dihyet kin Ade limwa nya ighyet cem ba, akos ser nyende sisar tirigi nikiek nye ba, niba noho rok Ade Ig dini biningat nadi.
31 Gino tungwatu nya ipai kep hiter bibuwak noni kwei biya kui Ade nimbar ei Ade Ig leu binhyepo no dima pai tug hon neheng bipia ningon ngun, 32 lene TUHAN ei gwamti e, handei kon ba, angig atingou mem nyeni nihyet leu api akos tut no dima nok igbit. Ma akes hukum ei gi hi di ningon mui dip dem igbit nide mun di yai tunggwei lene ma asindui sut gi hi di ningon ngun bimbut hak ug.
33 Tirigi Ade limwa nya icut bak ide siceu nya drek dip gi ibon sisar tut Nani lo, ittin ser ide sisar bikuk yok biNa di TUHAN ba, ingkwei hanyen ei Ade Ig dini cem hanyen ba, yahara Na leu binhyepo akos ser ide sisar dima lene, 34 nnaba angig atingou ei gwamti mem Ade limwa nya ighyet. Akos ser ide sisar ba, abuwak yok hanyen kwei ei ide minu dini di ayai bak idigup bat-idigai bat nya tu pima.
35 Tirigi abindei ba, mpia but bi kikau drek dip sisar di Ade limwa nya ibon tut Na lo, ittin ser ide sisar biba yoho rok Ade Ig dini hanyen lene iba ibou coi mem Na ba, ingat nadi, 36 lene handei kon ba, angig atingou ei gwamti mem ighyet. Akos ser nibou ndig kin Ade limwa di mben Israel ide sisar ba, angginau yok tut puig di igbit leu api ma Na di TUHAN abindei ba, mpia but hanyen bidem Ade minu di ayai bak Ade limwa nya bijo ninno bijo kikau dini nisurti-nipekti.
37 Tirigi ninggum nindig bibor kin nsuwer ajar hwen yok ba mpia ngei bindei ba, njita hagom mui bingwig cem hai ceng nya igyem njita ei beisi hagom ba, ide siceu injei bihwen yok ba, ninggwen di buhun cut igkep yok cem lene, 38 nnaba angig atingou mem ighyet. Gino Ade limwa di mben Israel bihi iba ingon di ngguk bibor bingat nadi bak Nani ba, isu inda ndam Ade Ig dini nijoti, 39 lene ma angig atingou mem ighyet ei atimieisi ei gwamti. Akos ser ide sisar ba, ampu yok lewo Nangkom akan bidem tut tungwatu nya yahagom ingonti. Lene ma abibon tungwagom-gom bit leu nok niyai munti nya. 40 Leu binhyepo Ade limwa nya ibit ahyet tirigi ibong kei igwam kei ei minu di ayai bak idigup bat-idigai bat nya dini kikau.
41 Tirigi ngkiai gom di bong minu ting bibor miap tut anyeng di jei, 42 kin mun di mindur di abon mem Ade limwa nya lene kwei kuk no biNa ei Ade Ig dini, 43 lene ma angig atingou mem nihyet ei atimieisi ei gwamti ba, abuhup nihyet bit leu ningon kanti leu binhyepo tungwatu dihyeisi dini hagom ingon jo kep Nani lene mibit ahyet noyam kin nye di Ade limwa di mben Israel nibit ahyet. Lene mben ngkiai miyok ngon kep bipia Ade Ig di dingot dini ne gumihyep gom ngat mem tungwatu nya ikuk yok biNa eisi ri.
44 Tirigi acuk Ade limwa nya mem gima ikon pran bihwen ide siceu nya ei minu titou minu titou lo, ikiek yok ba, iba yoho rok Ade Ig di dingot dini leu api ingat nadi bak Na di TUHAN, 45 lene handei kon ba, angig atingou mem ighyet ei gwamti lene abindei ba, ide siceu nya micut bak yoni.
46 Tirigi Ade limwa nya ibon sisar tut Na (jo nibreisi bipia ei dihyeisi dini ne hi ningon sren-srau bi) ba, angon sibui sut yok leu api icut bak ide siceu nya di ikat yok ug ei ingkiaisi ei minu ting bibor, 47 lene TUHAN e, handei kon ba, angig atingou mem Ade limwa nya ighyet tirigi ingat nadi. Gino ittin ser ide sisar bingat nadi bak Nani lene ipai jit bipia ibon sisar ba, imbuk bibor tu lene ma angig atingou mem ighyet. 48 Gino iba ingon titut bittin ser ide sisar ei minu ting dima leu api ikiek yok ba, iba yoho rok minu di ayai bak nyeni nidigup bat-nidigai bat nya dini kin Daud De Minu Ndig di adimig ei su dini kin Ade Ig di dingot mem Nani ba, ingat nadi, 49 lene handei kon ba, angig atingou mem ighyet ei gwamti ba, angondut yok. 50 Akos ser ide sisar di ibon tut Na kin ide naham imbuk kep Nati hagom lene abindei ba, ide siceu nya ingon nggriu sut yok. 51 Lewo yoni ne Ade limwa nya po abuwak yok kwei leu mben Mesir po ihwen bit yok pima ide minu ri.
52 TUHAN Allah e, handei kon ba, ayok ngon kep Ade limwa nya kin ide nibou ndig ba, angig atingou mem ighyet tirigi yahara Na mem gima ampu yok. 53 Adimig yok ei leu tungwatu dihyeisi dini hagom leu binhyepo inok Ade limwa nya bit leu nok apai biyokti tug hon Ade awak di Musa tirigi po abuwak nyeni nidigup bat-nidigai bat nya leu minu Mesir pima.>>
Salomo de nadi nibinggam kep
54 Salomo ngat nadi bak Allah lene noni ba nibiau bicom mpia ei nimbar nuhui bisu ninda kui ndam gwamti cem lo, tirigi kes nadi hon tu lene noni kiju biya. 55 Lene ba nihyet nindig bibor bingat nadi tindei Allah de mun di kei mem yo di idem yam ei sirima yahagom bipai, 56 <<Jikwei ba, yahagom inggei sut TUHAN di bindei ba, Nide limwa nya ibong kei igwam kei bit leu nok Noni preu ei binye tug hon Nide awak di Musa. Mun di kei di Noni preu ei mem nye hagom pek kep mem nye tu. 57 Handei kon ba, nyende TUHAN Allah ningat rin bit nye bit leu nok ningat rin bit nyeni idigup bat-idigai bat nya ba, kes nye ei bi sren. 58 Handei kon ba, Noni bindei ba, nyeni yahagom ingon gom tut Noni ba, igyai mun bit leu ningon kanti mem nye cem lene ibit Nide nikos tutti kin nicuk nyeti nya di Noni yai bak idigup bat-idigai bat nya cem. 59 Handei kon ba, nyende TUHAN Allah miyok ngon kep ditde nadi dini kin mun di dahara Noni tut hagom. Handei kon ba, Noni ngondut Nide limwa di mben Israel kin ide nibou ndig cem ba, kwas mun di isuar nya tut yok bikwop njap ngwa hagom. 60 Tug hon nisinati dima ne mben ngkiai bidem dihyeisi dini hagom mikan tut bipia TUHAN Nongkom ne Allah rin lene hiter hi bi. 61 Nnaba je di Nide limwa nya mijingon gom tut jide TUHAN Allah ba, jibit Nide nikos tutti kin nicuk jeti nya hagom bit leu nok gi jiyai kep ei ammani tu.>>
Salomo piga TUHAN De Ig
(2Taw. 7:4-10)
62 Lene Nibou Ndig Salomo kin nide limwa nya di induk yam ei su ibon midut nindig mindhe-ndhe titut ei humti bak TUHAN. 63 Noni bon midut nibiyai ningon kwes kin TUHANti tug hon gi ibui sapi ningut sribu nyatungwagom bican kin domba ningut sribu sratus gom ba, nyatungwagom bak TUHAN. Tug hon nisinati dima ne noni kin nide limwa nya yahagom ipiga TUHAN De Ig tu. 64 Njap dima cem noni piga mpia di jo bas hak di ngug tig bikrop ttai gom ninggimau ei TUHAN De Ig nuhui. Lene noni bon midut nindig mindhe titut kep humti kin nibon midut njita nibipai sigyo bak Allahti ba, ndig mindhe-ndhe di ibui ninggwo cem hagom ei sirima mem nibon midut nibiyai ningon kwes kin TUHANti pima lewo nimbar hum dok di iba ngkimom-tembaga bibon dem mem mindhe-ndhe di ibui dima yok hagom bi.
65 Gima rino Salomo kin mben Israel yahagom ibon Njap Ndig Ig Jibei Mpam Meng ei sirima mem njap muhwindacan. Yo di idem yam ei su imangti ningot ndig. Ikwei leu minu ting ei Puig Hamat bei mpia nijjai kikau ug bipek hanjop minu Mesir bei mpia nibiho. 66 Hon kep njap gi nimuhwindaningai lene Salomo kes yahagom ba, ingkwei hanyen. Yahagom inggei sut noni lene iba ingon di llei sut mun di kei di TUHAN yai bak Nide awak di Daud kin nide limwa di mben Israel yahagom bingkwei hanyen ug ei itimieisi.