Salomo tin ei mem ngot TUHAN De Ig
(2Taw. 2:1-18)
5
1 Hiram di nibou ndig Tirus kin Nibou Ndig Daud ihig isut bit yam wer ninno tu. Tirigi Hiram miap tut bipia Salomo ya luei nicig Daud nohoti nok nibou ndig nijep bu lene noni pinak nibou niya hacanti nya ibou poi ba, igya kui Nibou Ndig Salomo. 2 Lene Salomo pas kep srat gom bipai bak Hiram, 3 <<Andigpoi di anyeng jei e, akan tut bipia bit bon dicig Daud ngot ig mem nide TUHAN Allah kan bi lewo sisip noni kon pran bit nide siceu nya kikau bibou Allah bindei ba, nide siceu nya di ibong ttai nyende minu dini kou yahagom icut bak noni ug e. 4 Noro tini bu ne nide TUHAN Allah bindei ba, nyeni ningon kwes kin mben dima yok yahagom tu. Dibon ditde siceu nya bu bi. Gima rino yo di ihwen kep nye hi bu bi. 5 TUHAN preu ei mem dicig Daud bipai <Midikon apmot gom biya luei ahoti nok nibou ndig bram nani bu ba, noni mingot ig mem Da.> Gima rino sindi dikos tut bipia midingot ig dima leu binhyepo mben Israel mikuk yok bak TUHAN eisi. 6 Na di Andigpoi akan tut bipia dibon ditde limwa nya di iwim biei kan noyam kin na di Andigpoi ade limwa nya hi bi. Gima rino ma apinak ade limwa nya ug ei Libanon leu binhyepo iwim buom nya ei sirima. Ditde limwa nya mimpu yok. Lene ma apai igbit ade limwa nya imuhup bida leu binhyepo dibirop hanyen biyok nok gi igbit.>> 7 Lene Hiram joi sut srat di Salomo pas kep mem noni nindig bibor bipai sut <<Njap di ammani dinggei sut TUHAN lewo Noni bindei ba, Daud yai nipmot di ningon ki di ya luei nohoti nok nibou ndig mem mben di nindig bibor dima!>> 8 Lene noni pas kep srat gom bipai bak Salomo <<Dikwop kep ade srat di apas kwei mem da tu ba, ditin ei mem diyai hagom bit leu angon kanti. Midibindei ba, ditde limwa nya miwim buom Libanon kin buom nitu cem. 9 Yoni mibei buom ut dima leu Libanon kikau ug bipek muk nintig dip leu api mingot kin yam nok arreren ei muk ngwa dip leu binhyepo ibri bigwam dip lene itig minyei tut kikau ug ei muk nuhuisi di ando binye. Tirigi yoni yuug krau mpia dima bikwek kuk leu buom arreren ut dima lene ade limwa nya mikinyon ei midyai nimbut tutti. Diba dingon com na di Andigpoi tut njita mem ditde limwa nya igyem mem nijam di impu na di Andigpoi.>>
10 Gima rino Hiram bindei ba, iwim buom Libanon kin buom nitu hagom bit leu nok Salomo nahara noti. 11 Lene Salomo kwas gandum nibuhunti kilo sribu sratus ningai nyatungwagom can ba, sratus muhwi kin mini zaitun ampou nindig sribu bitai ba, sratus bitai tut Hiram nok njita mem nide limwa dima yok bikwop ari bingwam hagom.
12 TUHAN yai igbit nipreu ei mem Daudti bibindei ba, Salomo ningon ki bibor. Hiram kin Salomo ingon kwes kin yam ba, yahacem ibuhup biyam tug hon gi ipreu mun biyam.
13 Lene Nibou Ndig Salomo kus pinai nya di ijoi bibor ibou sribu ningot ningai leu mben Israel yahagom leu binhyepo igyai kep midyai dima. 14 Lene noni ta Adoniram nok no di ninyeng tak kep yok. Noni kwas pinai dima yok ei nimpung ningai ba, nimpung gom imangti ibou sribu simnai lene bikwop nok. Bikwop nimpung nya hagom igyai midyai ei Libanon mem bed gom leu api ingkwei hanyen ei ide ig mem bed can. 15 Lene Salomo dimig ibou sribu ningot muhwindaningai bipinak yok ug ei nungug him leu binhyepo ikos tig mma di nindig. Lene noni dimig ibou sribu ningot muhwindacan bu mem gima ibei tig di nindig dima hagom kwei. 16 Lene noni dimig mindor nya ibou sribu ningai ba, sratus ningai leu binhyepo inyeng tak kep yo dima bipingok ingonti tut ide midyai nya. 17 Yoni ikos tig mma di dia-diau di nindig bibor kwei mem TUHAN De Ig nikiou nya bit leu nok Salomo nicuk yoti. 18 Gima rino Salomo de limwa nya kin Hiram de limwa nya kin mben Gebal ikos tig mma di nindig ba, isra biei ner cem hagom mem TUHAN De Ig.