Salomo ngot TUHAN De Ig
6
1 Mpe dima lene Salomo ninyeng tak kep mben Israel mem ari bingwam bitai su. Noni kinyon ei ningot TUHAN De Igti mem Bed Ziw di bed nican. Nijam dima ne ari bingwam gi sratus bitai ningot muhwindaningai niabiati mben Israel ingwes ngun leu minu Mesir ri.2 Ig dima ninsi nijeisi meter ningot can ba, muhwindacan lene ninyanti meter muhwindatai lene nanaisi meter simnaibrimigningai biniken. 3 Lene ninsi di ndam bisai nijeisi meter bitai biniken lene ninyanti meter muhwindatai noyam kin ig dima ninsi ninyanti. 4 Lene itu kendera mihyeti di bres ndam ig bei ninsi. 5 Lene itap ninsi di ansan jo-jo yam dip ningai kin ig dima ei nisai bei ig nite dima kwei ba, bei nitta hacem cem ba, ninsi dima hagom nanaisi meter can biniken poi mien. 6 Ninsi nya di jo dihyeisi ninyanti meter can biniken poi mien. Lene ninsi nya di jo hacan ninyanti meter can biniken ndig. Lene ninsi nya di jo nai ninyanti meter ningai biniken poi mien. Gima rino dring mem ig dima nikiou ndok bibor noro ninggrupti wer dile leu binhyepo tindang niyenti nya mikinai ei dring ninggreti he lene itu nimihyeti nya ei dringti mem bi.
7 Tukan di ikos tig nindig pima yok itin ei tig mma nipou ei mpia di ibei tig dima leu dihyei jou eisi pima tu ba, hagom dem mem ibingot TUHAN De Ig. Gima rino tirigi ibingot ig dima ei minu ndig Yerusalem lene apak kin oi kin ngkimom nitu di ikrau kep nindigsi nya nibimbi tibim ei tungwatu nya itingou nsi bi.
8 Lene itu dimbou hui ei ninsi di jo-jo yam dip pima bei mpia nibiho leu api inen lin mbrei di kui ug ei ninsi di jo hacan kikau ug ei ninsi di jo nai bu. 9 Lene tukan nya iba buom pima bibon bot kin biei ner nok gi dem mem ibikibou kep bidem ninsi nya hagom. Gima rino Salomo bindei ba, TUHAN De Ig ningget put. 10 Ninsi di jo-jo yam dip pima nanaisi meter can biniken poi mien ba, iba buom nok tindang bingot lene iba hagom bitap kin ig dima nitta.
11 Lene TUHAN pai bak Salomo, 12 <<Gino abit Ditde nikos tutti nya kin dicuk nati nya hagom lene midibibon na bit leu nok dipreu ei mem acig Daudti. 13 Midikwei bong bit Ditde limwa di mben Israel ei Ditde ig di angot ei su dini lene midikes yok ei bi sren.>>
Nimbumbati di ibibon jau di ikes ei TUHAN De Ig
(2Taw. 3:8-14)
14 Lene Salomo bindei ba, TUHAN De Ig ninsi nya cem hagom put. 15 Tukan nya iba buom Libanon nisra bitap dring leu nitriti kikau ug bipek ngom dip ei ninsi nya hagom. Lene iba buom nisra hiter bingig kep igjou hagom. 16 Lene itap ninsi gom ei ig dima ninsi ei bei ninghim ndam nite mpia nicutti ba, ijem ninyeng Ninsi Di Kwes-Kwau. Ninsi dima nijeisi meter muhwindatai. Lene iba buom Libanon nisra bitap dring leu nitriti kikau ug bipek ngom dip. 17 Lene ninsi di jo hacan mem Ninsi Di Kwes-Kwau pima ninyeng Ninsi Nindig ba, nijeisi meter simnaimuhwidip brimigtehiningai. 18 Lene iba buom Libanon nisra bitap ninsi dima titut yam leu binhyepo dring di iba tig mma di jo-jo yam dip bibon mijo nding leu tungwatu nya igyai him. Lene tukan nya ikilis aigmui kin bunggan tou ei biei ner dima ninjek dip hagom nok mimau.
19 Itap Ninsi Di Kwes-Kwau pima ei TUHAN De Ig mem TUHAN de Brua Gi Preu joti. 20 Ninsi Di Kwes-Kwau bon nijeisi kin ninyanti kin nanaisi meter muhwindatai ba, hagom noyam. Lene iba mas binggai kep ninsi dima titut yam. Lene iba buom Libanon nisra bibon nimbar hum ndok di indig biei nggrai eisi ba, ikes ei Ninsi Di Kwes-Kwau nuhui a. 21 Gima rino iba mas binggai kep dring nya ei ig dima hagom bitut Ninsi Di Kwes-Kwau cem. Lene iba mas bibon lante nya ba, indin lante dini ser dimbou hui ei Ninsi Di Kwes-Kwau. 22 Iba mas binggai kep TUHAN De Ig ninsi nya bitut nimbar pima cem hagom.
23 Lene yeheu biei zaitun nok kerubc ningat can lene ikon hacem ei Ninsi Di Kwes-Kwau. Kerub dini nanaisi meter bitai biniken. 24 Kerub ningat gom bon ninyehei gom di nijeisi meter can biniken poi mien lene ninyehei ei nite hi bu nok gima cem. Ninyanti leu ninyehei yenti gom kikau niyenti gom bu meter bitai biniken. 25 Lene kerub gi nican cem ninyanti leu ninyehei yenti kikau ug bipek ninyehei yenti nite hi meter bitai biniken. Gima rino hacem noyam. 26 Kerub hacem bon nanaisi meter bitai biniken. 27 Itas Kerub dini simiak yam ei Ninsi Di Kwes-Kwau ba, isu inyehei nite hi bipek yam ei ninsi dima ninggimau lene isu inyehei nite hi bu kikau ug bipek dring nya. 28 Lene tukan nya iba mas binggai kep kerub dini hacem itta titut yam.
29 Ba, ikilis kerub nya kin dui nya kin bunggan tou di kieng nya bidem buom nisra ninjek dip ei TUHAN De Ig ninsi hagom. 30 Ba, iba mas bikrau kep ansan nya ninjek dip cem hagom.
31 Lene tukan nya iba biei zaitun bibon dimbou nimeng can mem ibinggam ser dimbou hui dibie ug ei Ninsi Di Kwes-Kwau. Dimbou hui ninggrupti cai leu ninggimau ndam ninghas him nya. 32 Ba, ikilis kerub nya kin dui nya kin bunggan tou di kieng nya bidem dimbou ninjek dip hagom. Lene iba mas bikrau kep dimbou nya kin kerub nya kin dui ut nya hagom.
33 Lene iba biei zaitun bibon dimbou heisi mem TUHAN De Ig ba, nanaisi jei ndig dor njiriek ninyanti. 34 Lene iba buom nitu bibon dimbou di ibikrop kin yam nimeng can. 35 Ba, ikilis kerub nya kin dui nya kin bunggan tou di kieng nya eisi leu api iba mas bikrau kep hagom.
36 Lene iba tig kin buom Libanon bibon ngug di bikrop ttai mpia di jo bas hak gom ei bei dimbou hui ei TUHAN De Ig. Iprion tig nipuig ningai jo nijou lene iprion buom nipuig gom jo dip lene iprion tig nipuig ningai jo dip lene iprion buom nipuig gom jo dip lene nok gima kikau.
37 Tirigi Salomo ninyeng tak kep mem ari bingwam bitai su lene tukan nya ikinyon ei gi ibon TUHAN De Ig nikiou nya mem Bed Ziw di bed nican pima. 38 Tirigi ninyeng tak kep yok mem ari bingwam simnaibrimiggom lene Salomo ngot TUHAN De Ig biput ei Bed Bul di bed gi nimuhwindaningai bit leu nok itin ei mem nipou su. Midyai ningot TUHAN De Igsi yem ari bingwam nitindur muhwindacan.