Yo di igya kui Salomo
4
1 Salomo kui bigwam nok nibou ndig ba, ninyeng tak kep minu Israel titut yam tu. 2-6 Daptar dini tibim tut yo di igya kui Salomo nya inyenga.Imam nya rino Zadok kin Azarya di Zadok nipmot kin Abyatar.
Sekertaris di ipas kep srat mem Salomo de ninyeng tak kepti rino Elihoref kin Ahia. Cin dini ne Sisia nipmot bat nya ri.
No di nyohou mitiei mem mben Israel rino Yosafat di Ahilud nipmot.
Nibou tentara rino Benaya di Yoyada nipmot.
No di yok niyai kep nibou hanjop ndig nya rino Azarya di Natan nipmot.
No di pingok kep nibou ndig ningonti rino Imam Zabud di Natan nipmot.
No di nok nibou mem awak nya ei nibou ndig de ig bei nsi nya rino Ahisar.
No di nok nibou mem midyai niyai nimuhup bi di yo di yuubon yok nok awak nya igyai kep nya rino Adoniram di Abda nipmot.
7 Salomo kon nibou hanjop nya ibou simnaibrimigcan ba, kes yok bidem minu Israel nisurti-nipekti. Ide midyai rino imbus njita leu ide hanjop nya mem nibou ndig kin nide ig bei nsi nya. Bikwop nibou hanjop dima yok inyohou dimig inyeng sindam ba, gom-gom mbus njita dima ei ninsi bed gom-gom bikwop ari bingwam gom. 8-19 Nibou gom ninyeng tak kep nibou hanjop ibou simnaibrimigcan dima. Daptar dini tibim tut yo dima inyeng kin ide hanjop di inyeng tak kep nya. Ben-Hur ninyeng tak kep nungug him Efraim. Ben-Deker ninyeng tak kep minu ndig Makas kin Saalbim kin Bet-Semes kin Elon kin Bet-Hanan. Ben-Hased ninyeng tak kep minu ndig Arubot kin Sokho kin hanjop Hefer nisurti-nipekti. Ben-Abinadab di Salomo nipmisop Tafat nijjep ninyeng tak kep hanjop Dor nisurti-nipekti. Baana di Ahilud nipmot ninyeng tak kep minu ndig Taanakh kin Megido kin hanjop di jo dideu Bet-Sean nisurti-nipekti di jo dideu minu ndig Sartan di jo minu ndig Yizreel nibiho kikau bipek kin minu ndig Abel-Mehola kin minu ndig Yokmeam. Ben-Geber ninyeng tak kep minu ndig Ramot ei Gilead kin minu mien-mien ei Gilead di Yair nide bat nya di intun Manasye him ide kin hanjop Argob ei minu Basan. Hagom sok yam minu ndig di nindig bibor nya ningot muhwindagom ba, hagom bon ngug tig di ngkiem kin dimbou pmem nya di iba ngkimom-tembaga bibon cem. Ahinadab di Ido nipmot ninyeng tak kep hanjop Mahanaim. Salomo nipmisop Basmat nijjep Ahimaas ninyeng tak kep hanjop Naftali. Baana di Husai nipmot ninyeng tak kep hanjop Asyer kin minu ndig Alot. Yosafat di Paruah nipmot ninyeng tak kep hanjop Isakhar. Simei di Ela nipmot ninyeng tak kep hanjop Benyamin. Geber di Uri nipmot ninyeng tak kep hanjop Gilead po Sihon nibou ndig mben Amori kin Og nibou ndig mben Basan inyeng tak kep nipou pima.
Salomo de ninyeng tak kepti ninyanti kin nijeisi
20 Mben Israel kin Yehuda nya imangti dem kep iggum ei muk nipimat nimangti. Ide njita di igyem kin mun ningei di idut dem mem yok ba, yahagom ibong kei igwam kei. 21-25 Bikwop ig bei gom-gom ima ide miai ba anggur kin miai biei ara nghousi. Salomo de limwa nya bidem hanjop Yehuda kin minu Israel nisurti-nipekti di ibong ei hanjop Dan kikau ug bipek kin minu ndig Bersyeba yahagom ibong kei igwam kei mem nijam di Salomo niyaijo yo. Lewo nibou ndig di ibong ei Minyei Efrat nite dini kwei bei mpia nicutti yahagom ibou cut bak noni. Nok gima cem mben di ibong ei minu di jo ttai Salomo de ninyeng tak kepti nya yahagom ihig isut bit noni.
Salomo ninyeng tak kep dihyei ei Minyei Efrat nite dini kwei ei bei mpia nicutti ei Tifsah di jo Minyei Efrat nyai kikau ug ei nite mpia nicutti bipek kin minu ndig Gaza ei hanjop minu Filistin kikau ug bipek kin minu niya kwas yamti ei minu Mesir. Mben nya di ibong ei minu dima yahagom ibou cut bak Salomo ba, igo kep belasten bak noni.
Njita di Salomo nya isuar bikwop njap-njap rino tepun di ndung-diem liter sribu muhwi kin tepun nitu liter sribu simnai kin sapi nihyen ei ig kandanti ningut simnai lene sapi nihyen bas ei ngoi dumti ningut nyatungwagom kin domba ningut sribu gom bitut rusa nitu kin rusa kijang kin rusa menjangan kin ha ninyengti hagom. 26 Salomo de tentara di iba kuda di ibri bibikon pran kan nya ibou sribu simnaibrigmigcan lene nide kuda di ibrim kroba pran nya ibong ei ig kandanti ningat sribu ningot bitai. 27 Salomo de nibou hanjop nya itunggwei-tunggwei yam tut njita ba, iba bed bikwop yok bimbus njita pima sindam biyuug sut bigyai bak Nibou Ndig Salomo kin nide ig bei nsi nya yahagom apino njita dima hagom dem mem igyemti. 28 Bikwop nibou hanjop dima yok ikwas gandum barli kin gandum nintam di mui su di ike kin yam cem tut Salomo de kuda nya hagom. Ba, gima ne bitut kuda di igyai kep midyai kin kuda di kri kroba nya cem. Ittei njita mem mindhe-ndhe dima yok ba, ikwas bikwop ig kandan nya hagom bidem nimangti di isuar nya.
29 Allah bindei ba, Salomo ningon ki ba, kan tut mun nyeng hi di mipbor ngat nya cem lene ningon hukti di jut bibor. Bit bon tungwatu nya inai ningon kiti ninyanti kin nijeisi kan bi. 30 Ningon ki dor njiriek yo di ingon ki di ibong bidem hanjop nite bei mpia nipriti nya kin yo di ingon ki di ibong ei minu Mesir cem ba, hi di ningon ki bibor dor njiriek noni bi. 31 Salomo ningon ki bibor dor njiriek tungwatu nya yahagom. Ningon kiti dor njiriek Etan di mben Ezrahi kin Heman di Mahol nipmot kin Kalkol kin Darda nya ide ningon kiti cem. Salomo ninyeng tibim bidem minu di jo ttai nide ninyeng tak kepti hagom. 32 Salomo pas kep nihyet nibiti ninda ningat sribu ningai lene pas doia cem ningat sribu gom njiriek. 33 Salomo ne dem mem gima mbot kep tut biei ninyeng hagom kin ndia kioi di ita nya hagom bitut biei buom Libanon ug bipek mintu-minta hisop di ntun ngug tig nitta him nya cem. Mbrap igkei tut mindhe-ndhe nya kin ha ninyeng hagom kin mindhe di ba ninghop bisrei kin wau nya cem. 34 Nibou ndig nya bidem dihyeisi dini hagom imiap tut Salomo ningon kiti apino ipinak tungwatu nya bikwei ngat noni leu binhyepo ingig itingou mem ningon kiti di tibim ei nuhui him.