Salomo ngat nadi mem gima yai ningon di ki
(2Taw. 1:3-12)
3
1 Mpe dima lene Salomo bindei ba, mben Mesir kin mben Israel ingon kwes kin yam tug hon gima noni wak nibou ndig mben Mesir nipmisop nok nitnem. Lene Salomo buwak nitnem dima kwei bibong ei Minu Daud kikau bibou noni ngot nide ig nibou ndig nijep bu kin TUHAN De Ig kin ngug tig di bikrop ttai minu ndig Yerusalem biput ug e. 2 Nijam di noni ngot TUHAN De Ig bigyo lene nide limwa nya ibon midut nindig mindhe titut ei nimbar hum dokti ei mpia ttou nsi mang bibor. 3 Mbro nok gino Salomo ningon ngakei TUHAN bibit nicuk noti nya hagom lo, noni cem bui mindhe-ndhe mang bibor bibon midut ei nimbar hum dokti bidem mpia ttou nsi dima.4 Mpia ttou nsi gom di ikuk yok bak TUHAN eisi di bon ninyeng dor njiriek nindigsi nya rijo ei Gibeon. Salomo bon midut mang bibor ei sirima nipou su. Mpe di gom bu lene noni ug ei sirima mem gima bon midut nindig mindhe ei nimbar hum dokti. 5 Lene TUHAN tau kep noni mem mmun tug hon mun di mumpriem lene hig ser noni <<Salomo e, disindui sut ba, ahara Da tut mun nyeng gom leu api midiyai gima bina ug ri!>>
6 Lene Salomo buhup <<TUHAN e, angon ngakei Ade awak di dicig Daud ninno tu. Ningon kwes ba, ningon sren cem ba, ningon gom tut na di TUHAN cem. Ando bindo tut Ade ningon ngakei noti kikau tirigi abindei ba, nipmot ya luei nohoti binok nibou ndig bu. 7 Ditde TUHAN Allah e, mbro nok gino dinok andigpoi haigtu bigyo lene dibie tut ditde limwa nya kan bi lo, asindui sut da bidiya luei dicig nohoti tu. 8 Disrig yo di adimig yok ei ba, inok Ade limwa nya. Lene bit bon tungwatu nya ikwop imangti kan bi. 9 Gima rino ma abindei ba, dingon ki leu binhyepo diba dingon di sren kei bibie tut Ade limwa nya ba, dikan igbit tut mun di kei kin mun di kinei niter leu yamti cem. Gino ampu da bi lene notou midibie tut Ade limwa nya di imang bibor dini i?>>
10 Lene Tuhan ningon kei sut Salomo nahara Noti. 11 Gima rino Noni pai bak Salomo <<Igbit ri! Ahara Da tut ayaijo di jei bibor kin ndigban nindig bibor kin gima ade siceu nya itug midut bi noro ahara Da tut angon di ki leu binhyepo aba angon di sren kei bibie tut ditde limwa nya. 12 Gima rino midibuhup ade nahara Dati. Midibindei ba, angon ki ba, antin kimbo dor njiriek tungwatu nya di igyaijo ei nijam di nipou kin nijam di nidipti bu cem. 13 Lene midiyai mun di ahara Da tut bi nya nok ndigban nindig bibor kin anyeng jei bibor dor njiriek nibou ndig nindigsi nya yahagom cem bina. 14 Gino abit dihyet kin Ditde niggai serti nya bit leu nok acig Daud niyai kepti pima lene midibindei ba, ayaijo jei bibor cem.>>
15 Lene Salomo da niyai bikiju leu api jo nibreisi mem noni bipia Allah mbrap bit noni tug hon mumpriem dima tu. Lene noni ngkwei hanyen ug ei minu ndig Yerusalem biya Brua Gi Preu noho leu api bon midut nindig mindhe titut kep humti kin nibon midut nibiyai ningon kwes kin TUHANti hagom ei nimbar hum dokti. Gima ngwig lene noni bon pesta mem nide nibou nya di igya kui noni yahagom.
Salomo gwam nok nikei mem munhyet di buhun gom
16 Mpe di gom lene sop nibou sibui ibou can ikwei ya ei Nibou Ndig Salomo noho bei. 17 Lene sop gom pai bak <<Andigpoi e, dani kin disut dini nahacem nibong ser ig gom. Mpe di gom tirigi noni ningat rin bit da ei ig bei lene disrek tut dipmot. 18 Ug ei njap can bu lene noni cem srek tut nipmot. Nibou can he nibong ser ig dima ba, hiter ibong bit nye bi. 19 Mpe di gom tirigi noni bong mai bikan tut bi lene rim bibong kep nipmot bimai. 20 Dibong mai leu lene noni kiju mem mmun mau bikon dipmot leu ditta lene kes bibong ei nonti nibongti. Lene noni kon nipmot dimai su ningut kwei bikes nyahan simiak ditta ei dibongti. 21 Tirigi dida diyai mem njap bigyoti lene dipi bidiyai do bak dipmot noro dingat lo, mai su. Lene diyok diyai kep ningut lo, jo nibreisi mem da bipia noni ne dipmot rin bi.>>
22 Lene sop cin pima hi srep <<Bicum! Gi hi di niyaijo dini ne dipmot rin lene gi hi di mai dima ne apmot ri!>>
Noro sop gi pima srep <<E bi! Gi hi di mai ne apmot rin lo, gi hi di niyaijo ne dipmot ri!>>
Isrep tut yam nok gima ei nibou ndig noho bei.
23 Lene Nibou Ndig Salomo pai biyok <<Jahacem jikon jihyet bijipai bipia ningwoi-ngwoi di niyaijo ne jide rin lo, gi hi di mai su ne jide rin bi.>> 24 Tirigi nibou ndig pai nok leu lene noni cuk tungwagom buug yai simeda gom kwei. 25 Lene noni cuk no dima bipai <<Asrat ningwoi-ngwoi di niyaijo dima hacan ba, ayai nite hi bak ibihi lene ayai nitehi bak ibihi.>>
26 Apino ningwoi-ngwoi di niyaijo nipmem ngig-ngat hara ser <<Andigpoi e, ma ayai nimai bak au! Nnaba ayai noni bak sop dima hak ug!>> Noni pai nok lewo ngondut nipmot nindig bibor.
Noro sop gi hi ce bipai <<Mbro nok gino nahacem niyai ningwoi-ngwoi dima tut niyaisi hanyen bi lo, ma asra noni hacan hak ug!>>
27 Lene Salomo pai <<Ma ayai nimai bak ningwoi-ngwoi dima au! Atug ningwoi dima hanyen bak sop gi nigom pima lewo nipmem ngig-ngat rino noni.>>
28 Tirigi mben Israel imiap tut notou Salomo kos tut munhyet di buhun dima lene yahagom inggap leu nindig bibor. Jo nibreisi mem yok bipia Allah yai ningon di ki bak Salomo leu binhyepo ba ningon di sren kei bikos tut munhyet nya.