Amnon cut tut Tamar
13
1 Absalom di Daud nipmot bon nikwohop Tamar di sop gwam nitta pilei di ubbu. Mpe dima lene Daud nipmot Amnon di Daud nitnem gi hiter srek tut ningon pri kep Tamar nindig bibor ba, 2 joi sut yem njita tut noni. Noro bit bon ningon kanti dima pek kep mem noni kan bi lewo Tamar gwam nitta pilei yo ba, nide bat nya isindui sut ba, dideu pinai nya bi. Amnon kan-kan nyen tut ningon di pri kep Tamarti dima kikau ba, cut ei ninggwenti drek dip.3 Amnon bon nisut Yonadab di ningon tek tut ninggok puig igkeisi. No dini ne Daud nikindig Simea nipmot ri. 4 Yonadab mbus Amnon ningonti bihig ser <<Na di Nibou Ndig nipmot e, nggon rino tirigi diyok diyai kep na lo, angon ngguk bikwop njap-njap i? Mindei ribindei na i?>>
Lene Amnon buhup <<Dingon pri kep Tamar di dikindig Absalom nikwohop dima bibor.>>
5 Nok leu api Yonadab pai bak <<Dwai! Gima krop kei. Abon nanti nok no di nggwen ba, abong nyahan ei abongti hak ug. Ba, gino acig kwei yok niyai kep na lene ma apai bak <Arig e, ma ace tut ba, Tamar kwei ngei njita bida bidiyem. Gino ngei njita dima ei sirini bou diyai him lene midiyem njita dima.> >> 6 Nok leu api Amnon ce tut Yonadab nipingok noti bibon nonti nok no di nggwen ba, bong nyahan ei nibongti.
Tirigi Nibou Ndig Daud kwei yok niyai kep lene Amnon pai bak <<Arig e, ma ace tut ba, Tamar kwei non roti nyop bou diyai him leu binhyepo dijoi sut bidiyem ri.>>
7 Leu api Daud sok bak Tamar ei nibou ndig de ig bicuk noni <<Aug ei akindig Amnon de ig ba, angei njita hi bak biyem.>> 8 Lene Tamar ug ei ig dima bingat lo, Amnon no bong ei nibongti. Gima rino yai tepun poi mien ba, tin ei roti nyop mem gima non ei humti bou Amnon niyai him. 9 Gima leu su lene ket roti dima leu bokor nsi biyai bak. Noro Amnon kou sut biyem bi bipai <<Acuk tungwatu nya yahagom ba, yehei leu ditde nghim nsi dini.>> 10 Tirigi yahagom yehei leu ninsi dima tu lene Amnon pai bak Tamar <<Attei roti dima yok kwei dideu dibongti dini ba, asu anda tut bidiyem ei andati hak ug.>> Lene Tamar ce biyai igbit nicuk noti. 11 Tirigi Tamar su ninda tut roti dima bak rino Amnon kat misop gwam nitta pilei dima bipai bak <<Dikwohop na e, siyem njita tut yam!>>
12 Noro misop dima srep <<Dikijam na e, dikou sut! Abidip huk da bidibon mun di kinei bibor dima au. Hi bon mun di kinei nok gima ei mben Israel ikieti bi sren. 13 Gino mun dima cut igkep da lene midinang bidiku diimaisi ei hantou i? Mporo mben Israel ibibon nani cem nok no di ninyeng kinei ei ikieti ug ri. Gi kei rino ambrap bit nibou ndig tut dani. Dwai, nibou ndig mice tut ba, abuwak da bidinok atnem ri.>> 14 Noro Amnon kou sut miap kep Tamar nahara ser noti. Noni nisindemti njiriek Tamar apino kat noni biyem njita tut noni kindi-kindok ug a.
15 Tirigi yem njita tut Tamar leu su rino ningon kinei sut noni bibor. Ningon kinei sut Tamarti dima nindig bibor dor njiriek gi nipou po ningon pri kep noni biborti pima. Leu api cuk Tamar <<Aom na leu doho bei hak ug!>>
16 Noro Tamar buhup <<Dikijam na e, nggon rino abibon da nok gini i? Gino ajji da bihigom lene gima buhun bibor dor njiriek sisar di abon aponi pima.>>
Noro Amnon kou sut miap kep nihyet. 17 Ba, hig nide pinai pilei gom di mpu nonti njem kwei bipai bak <<Abuwak sop dini leu doho bei leu api anggam mbou ser.>> 18 Lene pinai pilei dima yai igbit niceu nicuk noti.
Tamar juk sinsun ndok di jei ndig di ninda cem jei ndig. Ei nijam dima neh nibou ndig ipmisop bat di igwam itta pilei di iwak pinai bigyo nya ijuk kep sinsun di nok gima. 19 Lene Tamar kam dihyei ndung ei nibousi birik sinsun ndok di juk dima cem. Noni ba ninda hacem bitak kep ser niimaisi lene ba ningon di ngguk bibor bipim kak nimbutti. 20 Tirigi Absalom ngat noni lene hig ser <<Apo akijam Amnon yem njita tut na tu e? Dikwohop ndia ug o! Ma angon mbut-mbut nyen tut gima bu au. Nna ug. Amnon ne akijam ri. Ma atri tut mun di cut igkep na dima bak hiter au.>> Nok leu api Tamar ba ningon di ngguk bibor kin ningwes di sigon cem boom no nyahan hak ei nikijam Absalom de ig.
21 Tirigi Nibou Ndig Daud miap tut mun di buhun dima rino gga bibor. 22 Absalom ningon kinei sut Amnon nindig bibor ba, kou ser gi mbrap bit noni bu cem drek dip gi kat nikwohop biyem njita tut pima.
Absalom ningon nggrom kep Amnon biyai nimai bak
23 Ari bingwam can ser tu lene Absalom bon pesta kep nikos domba ninta leusi ei Baal-Hazor dideu minu ndig Efraim lene nduk nicig di nibou ndig dima nipmot bat nindigsi nya yahagom kwei. 24 Lene ug ngat Nibou Ndig Daud bipai bak <<Arig e, dibon pesta nikos domba ninta leusi ug ri. Gima rino Arig e, ma aya tut nibou nya di igya kui na ba, jihwou gwam tut da tut midut dima.>>
25 Noro nibou ndig buhup <<Dipmot na e, nok bi. Leu gino nahagom nihwou lene nibindei ba, abou ngwak sibui sut nye.>> Lene Absalom bidip huk nicig noro nicig kou sut bipai he bak <<Midingat nadi tindei pesta dima.>>
26 Lene Absalom pai bak <<Gi nok lene ma ace tut dikindig Amnon bibit nye.>>
Nibou ndig srep <<Noni cem suar gima bit na bi.>> 27 Noro Absalom wit huk kikau bibou Daud ce tut nipmot Amnon kin Amnon nikinjoi bat nya yahagom ibit Absalom ug.
[Lene Absalom ngei njita di mmau kei mem gima igyem bindei yok.]i 28 Lene sok kep nide awak nya <<Jitou kep mungkun ba, gino Amnon dut ba anggur ngei nindig bipu no leu ba, diba diyai nggrop kon je lene suar jiyai nimai bak hak ug. Ma jitin tut au. Lewo midibiang jiyai munti dima nibuhunti. Ma jihig jingon eisi au. Noro jibrim jingkek bijiyai nimai bak hak ug!>> 29 Lene awak dima yok ibit Absalom nicuk yokti ba, igyai nimai bak Amnon. Tirigi Nibou Ndig nipmot bat nindigsi nya ingat gima rino yahagom ikiju bikui ide mindhe bagal noyam ba, ibinang.
30 Tirigi yoni ingat rima kak puig sinon kwei lene bihi ipai bak nibou ndig <<Absalom yai nimai bak Na di Anyeng Jei apmot bat nya yahagom ba, hi di niyaijo bi.>> 31 Lene nibou ndig ningon ngguk bibor apino kiju birik nide sinsun ei no him lene tti bibong ei ansan dip. Lene yo di igya kui noni cem yahagom irik ide sinsun ei yo him. 32 Noro Yonadab di Daud nikindig Simea nipmot kwei pai <<Na di Anyeng Jei e, ma angon pri tut ba, akan bipia apmot bat nya yahagom imai su au. Amnon he rino tug ndei nimai a. Ningat ne Absalom ningon nggrom kep Amnon habiei mpe di po Amnon kat nikwohop Tamar biyem njita tut pima kwei bipek ammani kep. 33 Gima rino ma Na di Anyeng Jei e, ma angon jo kep ipaisi di ipai apmot bat nya yahagom imai su au. Lewo Amnon he rino tug ndei nimai a.>>
34 Lene Absalom cem kiju binang mem nitutti dima.
Mpe dima lene tentara gom di ya ser nibou ndig de ig ngat lo, imang bibor ijuk leu nungug dip kwei leu Horonaim.j Lene noni ug tri tut bak nibou ndig a. 35 Leu api Yonadab pai bak Daud <<Na Di Anyeng Jei e, yo dima ne apmot bat nya ri. Dem igbit ade awak di dani dipaisi pima tu.>> 36 Pai nok bikes nihyet leu lene Daud nipmot bat nya icoi kwei ei ig bei. Leu api ipim ba, Daud kin nide awak nya cem iba ingon di ngguk bibor bipim.