Natan sok kep Daud bibindei ba, noni ttin ser nide sisar
12
1 Lene TUHAN pinak Nabi Natan buug ngat Daud. Tirigi noni tau kep Daud lene pui sut nihyet nibiti ninda bak. Bipai <<Mpe di gom lene ibou can ibong ei minu ttou nsi gom lo, igom nyeng tut mun nyeng mang bibor noro igom nuhui mbum bibor. 2 Gi hi di nyeng dima ninyeng tak kep sapi nya kin domba nya mang bibor. 3 Noro gi hi di nuhui mbum ba mitiei bipek domba mien gom ngat bihyen kep. Noni nyohou domba mien dima nok gi kei bibor ei nide ig bit nimunggwom bat nya. Noni kon domba mien bibong nimigsi leu api ba nonti nide njita kin minyei bihyen kep. Domba mien dima dem kep nok nipmisop ngat ri. 4 Mpe di gom bu lene tungwagom kwei cem kep no di nyeng pima. Gima rino noni ngei njita mem no dima lo, kou sut gima bui nide sapi kin domba bibam mem nisut. Apino ug yai no di nuhui mbum pima nide domba mien gom ngat pima kwei bibui nok mikwau tut nisut nikweisi.>>5 Lene Daud ningon sibui sut no di nyeng bipai <<Diba neheng bipai tug hon TUHAN di niyaijo ninyeng bipia suar no di nyeng dima tug ndei hukum nimai! 6 Suar noni tug hanyen mbitai bram yam bak no di nuhui mbum tut niyai mun di mbuk biborti dima nipou ug e!>>
7 Lene Natan pai bak Daud <<Andigpoi e, nani ne no di nyeng pima ri! TUHAN di nok mben Israel ide Allah pai bina <Dita nani ba, anok nibou ndig mem mben Israel lene diteu nani ba, angwes ngun leu Saul nindati tu. 8 Dikes Saul ninyeng tak kepti hagom ei andati. Aba nakep Saul nitnem bat nya yahagom tu. Dita nani ba, anok nibou ndig mem mben Israel kin keret Yehuda tu. Gino mun dini yok hagom dem mem nani bi lene midikum eisi mbican bram yam bu. 9 Gi nok lene nggon rino angon hou ser dicuk nati nya i? Nggon rino ayai mun di mbuk bibor pini i? Abindei dino mben Amon igyai nimai bak Uria tirigi ikon pran bit yam leu api apos nitnem binok atnem bu! 10 Hon kep ammani kui lene bikwop ade nintun him di bram yamti ibou poi mitug midut bram yam drek dip gi po abit dihyet pima bi ba, apos Uria nitnem binok atnem bu! 11 Diba neheng bipai bipia midibindei ba, mun di buhun bibor micut igkep na tug hon igom leu ade ig bei nsi nya. Mun dima mijo brei bina tirigi dipos atnem bat nya leu na leu binhyepo diyai yoni bak hiter bu apino noni miyem njita tut yok brei bou tungwatu nya yahagom igyai him. 12 Aku ade sisar dima nding leu tungwatu nya igyai him noro midibindei ba, niyem njita tut atnem bat nya mipek kep brei bou mben Israel yahagom igyai him!> >>
13 Lene Daud buhup <<Dibon sisar tut TUHAN tu.>>
Lene Natan pai binoni <<Andigpoi e, TUHAN kos ser ade sisar tu. Apino ma atug ndei nimai drek dip bi. 14 Noro apmot ningwoi-ngwoi dima miyai nimai drek dip gi po angwes pri gau TUHAN tug hon ade niyai munti di kinei bibor dima.>> 15 Lene Natan ngkwei hanyen ug ei nide ig.
Daud nipmot mai
Jei bi lene TUHAN bindei ba, ningwoi-ngwoi di Uria nitnem yai bak Daud pima nggwen nindig bibor. 16 Lene Daud ngat nadi bak TUHAN tindei nipmot leu binhyepo mikei hanyen. Noni yem njita bi kikau ba, bong bas ei ansan dip ei nide ninsi bikwop mmun. 17 Nide nibou nya di igya kui noni ei ig nibou ndig dima ipai mun bibiwin kep ningonti leu binhyepo kiju leu ansan dip lo, noni kou sut ba, yem njita bit yok cem bi. 18 Ari gom bu lene nipmot mai apino yo pima ittin tut leu ba, yuug pai bak nibou ndig kan bi. Isimbot kep biyam <<Tirigi po nipmot mai bigyo pima lene noni nghek nye. Notou mem noni gino miap tut nipmot nimaisi i? Leu ma hwen nonti drek dip e?>>
19 Tirigi Daud ngat lo, yo dima yahamui nyahan biyam lene jo nibreisi mem noni bipia nipmot mai su. Gima rino hig ser yok <<Dipmot mai su e?>>
Lene ibuhup <<Andigpoi e, noni mai su.>>
20 Lene Daud kiju leu nibong ei ansan dip biya kui leu api kek minyeiti ba, pri nibou bijuk sinsun di pwoi kei cem lene ug ei Prak Meng Behei bikuk no bak TUHAN. Tirigi kwei hanyen ei nide ig lene noni hara yok tut njita. Leu api itin ei njita mem noni biyem. 21 Lene nibou di igya kui noni pima ipai binoni <<Nyeni ningon kiowi nindig bibor tut ayaisi dima. Tirigi apmot niyaisi jo bimai bigyo lene apim kui jei sut noni ba, ayem njita bi. Noro tirigi noni mai su lene akiju ba, ayem njita!>>
22 Lene Daud buhup <<Igbit ri. Tirigi niyaisi jo lene diyem njita bi bidipim kui jei sut. Nok lewo dikan bigya TUHAN mingondut da bibindei ba, dipmot mikei hanyen. 23 Noro nggon rima diyem njita bi nogindini i? Dikan tut bipia noni mai su. Bit bon dibindei ba, noni mikiju biniyaijo hanyen kan bi. Mporo dani miduug ei gumihyep nimai nya ide bit noni noro bit bon noni mingkwei hanyen ndam da kan bi.>>
Batsyeba srek tut Salomo
24 Lene Daud gwam ser Batsyeba ningon. Yoni igyem njita tut yam leu api noni srek tut nipmot lene Daud jem ninyeng Salomo. TUHAN ningon ngakei Salomo. 25 Noni cuk Nabi Natan leu binhyepo jem mot dima ninyeng Yedija lewo TUHAN ningon ngakei noni.
Daud yai minu ndig Raba biyati
(1Taw. 20:1-3)
26 Mpe dima lene Yoab kon pran bit timiei minu ndig Raba di nok nibousi mem mben Amon titut yam pima biput bigyo lo, jei bi lene mibindei timek yok leu biyai minu ndig dima biyati ri. 27 Gima rino noni sok nihyet ei ibou poi dip bak Daud bipai sut bak noni <<Dihwen timiei minu ndig Raba di nok nibousi mem mben Amon titut yam pima tu. Lene dibiyai ide minyei bousi di ibet ei mem yonti cem leu yok tu. 28 Nogindini anduk ade tentara nikenti nya ba, aba yo bicom yam leu api anjei sut yok kwei leu binhyepo sihwen timiei minu ndig dima ba, icut bisa kep. Gino ayai igbit dingon kanti dima lene gi mbun hi mipai sut bipia dangkom rino dibie tut tentara nya di dihwen yok leu di diyai di diyati bi.>> 29 Leu api Daud nduk tentara nide nya yahagom bidem yam leu api njei sut yok ba, ihwen timiei minu ndig Raba nya leu lene yai minu dima biyati lene bindei timek yok cem. 30 Lene Daud ug pos topi nibou ndig leu nibou ndig nibousif lene bijuk nonti nibou nggram him a. Topi nibou ndig dima nibuhunti kilo ningot ningai ba, muhwi lene iba tig permata ninjep gom di dia-diau kei bimau. Lene Daud nya ittei ndigban di ipos leu minu dima nindig bibor cem. 31 Ter leu gima lene Daud ubon timiei minu ndig dima leu binhyepo ittei ide sigigi kin pacul di iba ngkimom nitu bibon mem ibikkin dihyei kin oi di iba ngkimom nitu bibon cem. Lene ba yok biyai midyai eig mpia di iwir igtuyap eisi cem. Daud yai nok gima tut yo di ibong ser minu ndig di jo bidem hanjop Amon nisurti-nipekti hagom. Gima leu su lene Daud ya tut tentara nide nya yahagom ba, ingkwei hanyen ug ei minu ndig Yerusalem.