Nibou ndig Daud cut tut Batsyeba
11
1 Nibou ndig nya ikinyon ei nikon pranti bit ide siceu nya ngan-ngan ei bed di biang hou ningwigsi. Ari bingwam dima lene Daud cuk Yoab kin yo di igya kui noni kin nide tentara nya yahagom biyuug kon pran bit mben Amon. Tirigi tentara Amon icut bak yoni tu lene Yoab nya yuug ei minu ndig Raba bigyon ttai minu dima. Noro Daud gwam ei minu ndig Yerusalem.2 Njap gom ne Daud kiju leu nibong kep ninghuisiti leu api hei bikui ug ei ig ninjek dip mem mpia caisi. Tirigi noni ya-ya nyen ei sirima lene ngat sop gom di kek minyeiti. Sop dima ne sop di ubbu ngat ri. 3 Gima rino noni pinak tungwagom bihig-hig nyen ser sop dima ninyeng leu api no dima kwei pai bipia ninyeng Batsyeba ba, nicig ninyeng Eliam lo, nijjep ne Uria di mben Het ri. 4 Lene Daud cuk tungwatu nya leu binhyepo yuug brim sop dima ninda bibuwak noni kwei ei nibou ndig de ig. Apino Daud kin Batsyeba igyem njita tut yam. (Batsyeba sindi bon midut ninghuisi kwes leu ningwak ntuisi.) Lene Batsyeba ngkwei hanyen ug ei nide ig. 5 Jei bi lene jo nibreisi mem Batsyeba bipia noni nghop tu. Gima rino noni sok nihyet bak Daud tut gima.
6 Lene Daud sok nihyet bak Yoab bipai <<Ma acuk Uria di mben Het pima bikwei ngat da.>> Gima rino Yoab cuk noni buug ngat Daud. 7 Tirigi Uria kwei tau kep Nibou Ndig Daud lene nibou ndig hig ser noni <<Notou mem Yoab kin tentara nya i? Hagom kei e? Ikon pran kikep bit leu igyai kepti e?>> 8 Lene noni pai bak Uria <<Ma aug ei ade ig sri bibou abong kep anghuisi ug e.>> Niabiati Uria om no leu nibou ndig bimbut tu lene Daud tin ei munkwas bipinak ug ei Uria de ig. 9 Noro Uria ngkwei hanyen ug ei nide ig bi. Noni kuk no bibong ser dimbou heisi ei nibou ndig de ig bit tentara ibou poi di igya ser nibou ndig. 10 Tirigi tungwatu nya ipai sut Uria niyaisi bak Daud lene Daud hig ser noni <<Ajo leu minu ting bibor ba, nogindi pa rino akwei krau a. Api nggon rino angkwei hanyen ug ei ade ig bi i?>>
11 Lene Uria buhup <<Andigpoi e, nogindini tentara Israel kin Yehuda ikon pran ei minu ting ba, Brua Gi Preu cem no jo bit yok. Ditde nibou pran di Yoab kin yo di igya kui noni yahagom ibong bas hak ei ngoi dumti. Notou mem da gino duug ei ditde ig bidiyem njita kin didut ba anggur ningei ba, diyem njita tut ditnem i? Deheng bitug hon na di Andigpoi ayaisi bipia midiyai nok gima bi sren!>>
12 Lene Daud pai bak <<Nna ba agwam kep anghuisi njap di ammani bit da leu api midisindui sut ba, aug kon pran hanyen.>> Lene Uria bong ei minu ndig Yerusalem mem mmun-njap can. 13 Mmunti lene Daud hig Uria kwei yem njita bit noni bibindei ba, pes pu Uria. Noro Uria ngkwei hanyen ug ei nide ig mem mmun dima cem bi. Noro ngig nide ban bibongti bit tentara pima yok ei ide nghim nsi ei nibou ndig de ig dima.
14 Njap di hyep bu lene Daud pas sratgom bak Yoab bikes srat dima ei Uria nindati leu api Uria pwoi bimbut tut. 15 Srat di noni pas dima pai <<Ma acuk Uria buug mpu tentara nya di ikon pran sindem ei nibieti mu. Leu api apai nyahan bak tentara di igya bit noni bipia yoom yo leu Uria leu binhyepo jide siceu migyai nimai binoni ug.>> 16 Lene Yoab nya ikon pran bigyon ttai minu dima ba, noni cuk Uria buug ei mpia ttou nsi gom leu binhyepo noni hwen bit ide siceu nya nimpung gom di ikon pran sindem bibor ei mpia dima. 17 Lene ide siceu nimpung gom yehei leu minu dima bigya kep bihwen Yoab de tentara apino nibou tentara di igya kui Daud igom-gom imai bitut Uria cem bimai.
18 Lene Yoab sok nihyet bak Daud bipui sut pran nimbutti, 19 lene pingok no di mittei nihyet dima ningonti bipai <<Niabiati apui sut pran nimbutti hagom bak nibou ndig tu lene, 20 gino ningon sibui sut nye ba, mihig ser na <Nggon rino jikon pran bit yok dideu ide minu i? Jo nibreisi mem je bipia ade siceu migya ei ngug tig dip biprindei je bi e? 21 Akan kep notou Abimelekh di Gideon nipmot tug midut ei Tebes bi e? Mpe dima lene sop gom ya ngug tig dip bikes tig huk mbrei nindig gom bitot noni bi e? Gima rino nggon rino jidideu ngug tig ei minu dima i? Gino Nibou Ndig hig ser na nok gima lene ma abuhup bipia nibou tentara Uria po ya kui Andigpoi pima cem tug midut ei sirima tu.> >>
22 Gima rino no dima ug ngat Daud bindat kep tut hagom binoni bit leu nok Yoab nicuk noti. 23 Bipai <<Andigpoi e, nyende siceu nya ikon pran sindem dor njiriek nye ba, yehei leu ide minu bihwen nye noro nijji yok hanyen kak dimbou pmem. 24 Lene ibou poi ikui ug ei ngug tig dip biprindei nye bibindei ba, nibou tentara ibou poi di igya kui Andigpoi imai su bitut Uria cem.>>
25 Lene Daud pai bak no dima <<Ma abiwin kep Yoab ningonti leu binhyepo ningon cut leu bi. Lewo bit bon nye di tungwatu ikan tut gi hi di mitug midut tug hon pran kan bi. Disok dihyet ei na dip bak noni bipia suar noni hwen minu dima sindem bibor bibindei ba, ide siceu dima yok icut bak noni.>>
26 Tirigi Batsyeba miap tut nijjep di tug midut tu lene ningon ngguk bram. 27 Nijam ningon ngguk bram nimaisi dima ngwig leu su lene Daud cuk tungwatu nya leu binhyepo yuug brim Batsyeba ninda bibuwak noni kwei ei nibou ndig de igya. Lene Daud wak Batsyeba nok nitnem. Jei bi lene Batsyeba yai nipmot gom bak noni. Noro Allah ningon pus tut Daud niyai munti dima.