Yoab nggok puig mem Absalom nikwei hanyenti
14
1 Yoab kan tut bipia Nibou Ndig Daud ningon ya mem nipmot Absalom nikwei hanyenti. 2 Gima rino sok nihyet mem sop gom di ningon tek tut ninggok puig igkeisi di bong ei Tekoa kwei. Tirigi noni kwei krau lene Yoab pai bak <<Sindig e, aluei atta ba, abon nanti nok no di ningon ngguk lene ajuk sinsun ningon ngguk cem. Aba mini mbris bidip na cem au. Abon nanti nok sop di pim di ningon ngguk tut no di ningon ngakei wer mimbrek ngan tu nimaisi. 3 Leu api aug ngat nibou ndig ba, apai igbit dipingok nati bak.>> Leu api Yoab pingok ningonti tut mun di suar pai bak.4 Lene sop dima kiju buug ngat nibou ndig lene kuk no biba nibiau bicom mpia lene ba ningwak bikik dihyei ei nibou ndig noho bei bipai bak <<Na di Andigpoi di Anyeng Jei e, ma ampu ade awak di dani o!>>
5 Lene nibou ndig hi ser <<Dimpu na tut mindei i?>>
Lene noni buhup <<Ade awak di dani ne sop kibom di nuhui mbum ba, dijjep mai leu da tu. 6 Dibon dipmot bat nya ibou can ba, mpe di gom lene ihwen yam ei ngoi dumti lo, hi di ya hacan bikat yok leu yam bi apino gi hi yai nimai bak gi hi hak ug. 7 Ba, nogindini dide bat nya yahagom ingon kinei sut da ba, ibidip huk da leu binhyepo dikes dipmot di bindei di nimbiam bong dima ei indati leu binhyepo ikes hukum nimai ei noni dip hak ug lewo noni bindei mai nikindig. Gino dikes dipmot dima ei indati ba, tug ndei nimai leu lene midiyaijo bidangkom ngat. Yoni mibindei sar dipmot gom ngat di diba dingon com dima leu da apino dipmot di ntun dijjep him di mibindei ba, nyende ninsi de dima hi ninyeng jo kikau hi bu bi ug ri.>>
8 Lene nibou ndig buhup <<Angkwei hanyen hak ug lewo midiya hacan mem nani yo.>>
9 Lene sop dima pai bak <<Na di Andigpoi di Anyeng Jei e, mun mindei rino na di Andigpoi abon nya lene dani kin ditde ig bei nsi nya minibiang ayai munti nibuhunti a. Na di Andigpoi kin ade ig bei nsi nya mijingon ngun hak ug.>>
10 Lene nibou ndig pai bak <<Gino bihi icug na lene ma abuwak yok kwei bikwei ngat da leu api midiggai ser yok leu binhyepo iwaisi nani bu bi.>>
11 Lene sop dima buhup <<Na di Andigpoi e, ma angat nadi bak ade TUHAN Allah leu binhyepo no di suar ba nibuhunti bibuhup dipmot di mai pima ningut dima bon mun di kinei dor njiriek bu biyai nimai bak dipmot gom di niyaijo yo au.>>
Lene Daud pai bak <<Dipai bina tug hon TUHAN di niyaijo ninyeng bipia hi mibon mun kinei sut apmot dima poi mien cem bi.>>
12 Leu api sop dima binut bu bipai bak <<Na di Andigpoi di Anyeng Jei e, ma asindui sut da ba, dibinut dihyet mbigom kin bu.>>
Lene nibou ndig buhup <<Abinut ahyet hak ug.>>
13 Lene sop dima pai <<Tug hon na di Andigpoi ambrapti dima lene apai jit bipia na di Andigpoi ayai mun tunggwei tu. Lewo na di Andigpoi asindui sut ba, apmot ngkwei hanyen leu ninang ug ei ningkiaisi dima bi. Nggon rino na di Andigpoi abon mun tunggwei sut Allah de limwa nya nok gima i? 14 Nyeni yahagom mporo yuum igyaijo ningwig honti. Nyeni yahagom idem kep nok minyei di ikiber ei dihyeiti ba, bit bon hi mbus keyam hanyen bu kan bi. Allah cem giwin yo di imai nya bikiju ba, igyaijo hanyen bi. Gima rino nna ba na di Andigpoi anggok puig leu binhyepo no di com no ug ei ningkiaisi dima ngkwei hanyen. 15 Da di dinok ade awak dikwei ngat na di Andigpoi lewo tungwatu icug da. Gima rino dikan bipia nnaba sinok awak ba, simbrap bibie bit no di Andigpoi tut gini ug e. Lewo diba dingon com bipia no di Andigpoi mibuhup nide awak di sani sihyet ug o. 16 Dikan bipia na di Andigpoi ma amiap dihyet leu api ateu da leu yo di inggok puig mem gima igyai nimai bak dani kin dipmot nyeni ug ri. Tug hon nisinati dima ne yoni micom nyeni leu dihyei di Allah yai bak Nide limwa nya ri. 17 Diba dingon com bipia na di Andigpoi apreu ei mem dati dima micuon diyaisi ba, dingwes ngun. Lewo dikan bipia na di Andigpoi anoyam kin Allah de malaikati di kan tut bipia mun di kei ter leu mun di kinei.k Dingat nadi leu binhyepo na di Andigpoi ade TUHAN Allah ningat rima bit na di Andigpoi a.>>
18 Lene nibou ndig buhup <<Dihig ser na tut mun nyeng gom lene ma apai brei bida hak ug.>>
Lene sop dima pai <<Na di Andigpoi ahig ser ade awak hak ug.>>
19 Lene nibou ndig hig ser <<Yoab rino cuk na kwei e?>>
Lene sop dima buhup <<Dipai tug hon na di Andigpoi ayaisi bipia bit bon ade awak ningwes ngun leu ahig serti dima kan bi.l Na di Andigpoi e, ningat ne Yoab pingok dingonti tut dibon munti dini kin mun di dipai bina di Andigpoi. 20 Noro noni bon nok gima leu binhyepo ba ningon di sren bidime kep mun di buhun dini. Na di Andigpoi angon ki noyam kin Allah de malaikati di kan tut niyai munti nya kin nimbrapti nya di pek kep nya hagom.>>
21 Gima ngwig lene nibou ndig hig Yoab kwei bipai binoni <<Midiyai mun bit leu nok angon kanti. Ma aug krau Absalom ninda ba, abuwak noni hanyen kwei ei sirini.>>
22 Lene Yoab kuk no biba ningwak bikik dihyei ei Daud nimig him bibinggei sut noni lene buhup <<Andigpoi e, handei kon ba, Allah minjei mun di kei bak na di Nibou Ndig. Nogindini jo nibreisi mem da bipia angon kwes kin da lewo abuhup bida bit leu nok ditde nihig na tutti.>> 23 Lene noni kiju biya leu api ug ei Gesur leu binhyepo ug ngat Absalom bibuwak noni hanyen kwei ei minu ndig Yerusalem. 24 Noro nibou ndig sok kep noni ser nhyema Absalom mikwei bong ei ig nibou ndig de au. Bipai <<Dikou sut gi dingat ningat bou diyai him.>> Gima rino Absalom bong ser nide ig bikwei ngat nibou ndig bi.
Daud kin Absalom ingat yam
25 Mben Israel yahagom inggei sut Absalom di nok pinai di ubbu ngat dor njiriek nindigsi nya yahagom. Ninghuisi kwes ba, bon nibok kin nimuhweisi hi ei nimig jou kikau ug bipek nibou nggram him bi. 26 Nibou nta cem dimbun kei. Gima rino suar noni kak nibou nta bikwop ari bingwam lewo jei bibor ba, buhun bibor cem. Tirigi ikak nibou nta lene nibuhunti kilo can biniken bit leu kilo nibuhunti di jo tu. 27 Noni yai nipmot bat nya ibou ningai kin nipmisop gom ngat di Tamar ba, noni ne sop di ubbu ngat ri.
28 Absalom bong ei minu ndig Yerusalem kikau mem ari bingwam can lo, ngat nibou ndig ningat bou niyai him bi. 29 Lene noni sok nihyet mem Yoab kwei ba, ug ngat nibou ndig biya hacan mem noni. Noro Yoab kwei ngat Absalom bi. Absalom sok nihyet mem Yoab mbigom kin bu noro Yoab kou sut gima kwei ngat Absalom. 30 Gima rino Absalom pai bak nide awak nya <<Jikan tut bipia Yoab de beisi jo simiak ditde beisi ba, nide gandum-barli tou su. Ma juug ba, jipindei nide gandum-barli dima hagom bingwig.>> Pai nok lene igyai hagom bit leu nok Absalom nicuk yoti.
31 Lene Yoab ug ngat Absalom ei nide ig bihig ser noni <<Nggon rino ade awak nya ipindei ditde beisi bingwig i?>>
32 Lene Absalom buhup <<Tirigi po dihig na mem gima akwei ngat da pima lene akwei ngat da bi. Dipi bidicuk na ba, aug ngat nibou ndig leu binhyepo ahig ser noni bipia nggon rino noni hig da kwei leu Gesur bidibong ei sirini i? Nna ba midibong kikau ei Gesur hak ug.>> Lene Absalom binut bu <<Dijoi sut diya ei nibou ndig noho bei. Gima rino ma aya hacan mem da. Ba, gino nibou ndig kos tut bipia dingon mui yo lene nnaba ditin ei mem ditug ndei nimai hak ug.>>
33 Gima rino Yoab ug ngat nibou ndig bindat kep Absalom nihyetti hagom binoni. Lene nibou ndig sok nihyet bak Absalom ba, kwei. Lene Absalom kwei kuk no biba ningwak bikik dihyei ei nibou ndig noho bei. Lene nibou ndig pigo Absalom bimei ningyoi.