Samuel niyaijo ningwig honti
25
1 Mpe di gom bu lene Samuel niyaijo ngwig hon leu api mben Israel yahagom induk yam bipim kep ba, ingon ngguk tut noni nindig bibor. Lene itig ei nide biyati ei minu ndig Rama.Daud kin Abigail
Gima leu lene Daud ug ei iggum ndigsi Paran. 2-3 Mpe dima lene Nabal di pinai gom leu Kaleb ninsi de ningat rin ei minu ndig Maon. Nabal de dihyei di hyen kep mindhe-ndhe nya eisi no jo dideu minu ndig Karmel. Noni nyeng bibor ba, hyen domba ningut sribu ningai kin kambir ningut sribu gom. Nabal nitnem Abigail ningon ki ba, sop ubbu cem. Noro Nabal ne mbuk bibor ba, ningon prinder.
Mpe di gom lene Nabal ya kep domba nide nya bikos inta leu ei Karmel. 4 Tirigi Daud po bong ei iggum ndigsi pima miap tut Nabal di yai midyai dima 5 lene cuk pinai pilei ibou simnai ba, yuug ei Karmel, 6 leu binhyepo inggok Nabal bipai sut Daud nipigo noti bak. Daud sok nihyet bak Nabal leu api ipai bak noni <<Daud pigo nani kin ade ig bei nsi bitut mun di anyeng tut nya cem hagom. 7 Noni miap tut bipia no aya kep domba ade nya di akos inta leu a. Nna ba akan kep bipia nyeni niwaisi gembala ade nya di inyohou domba ei nyende minu bi. Nok gima cem mun di gembala dima yok inyohou kep nya mem nijam di ingat rin ei Karmel hi di pror bi. 8 Nanti ahig ser yok leu api yoni mipai igbit bina. Gima rino Daud ba ningon com na ba, ma acigit nye di ninok nide limwa nya kui ig lewo nikwei ngat na mem njap ndig di ammani di jikwen yengti ri. Nahara nani ba, akwas mun nyeng hi tut nye di ninok ade awak dini lene hi tut Daud di nok angon kieti cem bit leu ajoi sutti.>>
9 Tirigi yuug krau Karmel tu lene pai sut Daud nihyet di sok ei yok dip bak Nabal lene itum ingon ba, igya. 10 Jei bi lene Nabal buhup <<Daud e? Daud dima ne tou rin i? Isai nipmot dima ne tou rin i? Dimiap tut Daud dini bigyo sren. Nijam dini ne awak nya imang bibor di inang leu iceu bat nya ba, ingat rin ei minu dini! 11 Dem tut gima diyai ditde roti kin minyei nidut kin mikwau di dibui bidibam ei mem yo di ikos kep ditde domba nya ninta leu ba, dikwas hagom tut yo di ikwei leusi jo nibreisi mem da bi dini kan bi.>>
12 Buhup nok gima lo bi lene pinai pilei di Daud sok nihyet ei yok dip nya ingkwei hanyen bikwei ngat Daud bingon Nabal nihyetti nya hanyen bak. 13 Daud miap Nabal nihyetti dima lene cuk nide tentara nya <<Jahagom jikri jide simeda kin jintig bou noyam.>> Lene yo dima igyai igbit nicuk yokti dima haninyai ba, Daud cem kri nide simeda kin nintig bou a. Noni mbut tut nide tentara nya ibou sratus bitai lene kuk ibou sratus can ba, igya ser ndigban nya.
14 Tirigi Daud nya imig jo kep nimbut kwei lene awak di Nabal de gom pai bak Nabal nitnem Abigail <<Inyinai e, amiap tut gi Daud cuk ibou poi kwei leu iggum ndigsi mem gima ipai nipigo Nabalti bak side Andigpoi lo, Andigpoi kucang yok kinei tu e? 15 Noro yoni ibibon nye nok gi kei bibor lene iwaisi nye bi sren. Nok gima cem tirigi nyeni ningat rima bit yoni ei iggum ndigsi lene mun di nyeni ninyohou kep nya hi di pror bi sren. 16 Nijam di ninyohou domba kin kambir nya dideu yoni lene yoni inyohou nye bikwop mmun-njap. 17 Gima rino Inyinai e, abinai sut mun di buhun dini ba, akos tut mun nyeng dima ayai haninyai. Lewo Daud nya ikos tut bipia mibuhup ba, ikes hukum ei side Andigpoi kin nide ig nsi nya hagom dip ug ri. Side Andigpoi ningkek ndok apino dem tut gima miap hi nipingok noti kan bi.>>
18 Leu api Abigail yai roti nindak sratus can kin aigmui mindhe ngkek can di ba anggur ngei joti buut bibor kin domba di ibam ei su ningut muhwi kin gandum di ikang ei su kilo simnaimuhwidip brimigtehican kin ba anggur ngat di ningak nimbeu sratus gom kin roti ara nindak sratus can ba, kon gima yok hagom ei keledai nide nya dip. 19 Leu api pai bak awak nide nya <<Jimbut bibie doho lene midiya abia kep je.>> Noro ndo ningon kanti dima bak nijjep bi sren.
20 Abigail kui bigwam nide keledai dip ba, ug krau puig kropti di bikwam nungug tou gom lene um Daud di bie tut nide tentara nya kros ba, ijuk kwei ndam noni. 21 Mpe dima lene Daud kan <<Sinyohou no dima nide mun di nyeng tut nya ei iggum ndigsi dini mikui-kausi. Mbro nok gino mun nyeng gom pror leu noni bi ba, sibibon noni nok igbit lo, noni ba nihyet di tigut sa bibuhup hanyen! 22 Gino sigiyai nimai bak pinai di ingat rin ei sirima yahagom nipou tirigi mpia pri bigyo bi lene ma Allah yai nimai bisaj hak ug.>>
23 Tirigi Abigail ngat Daud lene kinyon haninyai leu nide keledai lene kuk no biba ningwak bikik dihyei ei Daud nimig him, 24 bipai bak <<Na di Andigpoi e, ma antu kep dihyet dini mbigom ug e. Nna ba anjei dijjep nitunggweisi dima kep ade awak di dani hak ug. 25 Ma aba angon bisrip huk tut Nabal au. Lewo noni bon ninyeng bi ba, ningon mbum bibork noyam kin ninyeng dima. Tirigi po ade pinai pilei nya ikwei krau nyende ig pima lene digingat yok bi lewo dingat rin ei ig bei bi. 26 Allah cuon ser na di Andigpoi leu gima aba angon di nggruet bibuhup hanyen kin niyai nimai bak na di Andigpoi ade siceu nya. Na di Andigpoi e, nogindini ade awak di dani deheng bitug hon TUHAN di niyaijo ninyeng bipia nnaba na di Andigpoi ade siceu nya bitut no di joi sut yai nimai bina yahagom ide mun di cut igkep yok noyam kin mun di cut igkep Nabal. 27 Gino ace tut lene ma ayai njita dini di dittei kwei mem na di Andigpoi kin ade tentara nya. 28 Nnaba abbwe ser ade awak di dani ditunggweisi. TUHAN mikon na di Andigpoi kin ade nintun him di bram yam nya ba, inok nibou ndig gau mben Israel sindam mem nijam di na di Andigpoi akon pran mem TUHAN ba, na di Andigpoi ma abon mun di kineil tirigi ayaijo ei dihyeisi dini bi. 29 Gino tungwagom cut igkep na di Andigpoi ba, bingon ei mem gima yai nimai bina lene TUHAN minyohou na di Andigpoi noyam kin no di nyohou ndigban di nibok kak bibor. Noro TUHAN micom na di Andigpoi ade siceu nya ug ei minu ting noyam kin no di ba bikumsikik biprindei tigya. 30 TUHAN mibindei ba, mun nyeng hagom di Noni preu ei su nya mipek kep mem na di Andigpoi. Jei bi lene TUHAN mikon na di Andigpoi ba, anok nibou ndig mem mben Israel. 31 Mpe dima lene na di Andigpoi ma akan kep bipia ayai nimai bak tungwatu nya mikuisi bi ba, akos tut mun bit leu nanti angon kanti cem bi. Apino na di Andigpoi angon ngguk tut ba, anso nanti tut cem bi. Mpe dino TUHAN njei mun di kei bak na di Andigpoi lene ma abbwe ser da di dinok ade awak au.>>
32 Lene Daud pai bak Abigail <<Dinggei sut mben Israel ide TUHAN Allah di pinak na di akwei um da ei njap di ammani. 33 Dinggei sut nani drek dip angon di ki ba, dibinggei sut na drek dip gi ayai abou tut mun di buhun dini cem. Lewo acuon da leu niyai nimai bak tungwatuti ba, dikos tut mun bit leu dingon kanti bi. 34 TUHAN cuon da leu gima dibon mun kinei sut na. Deheng bitug hon mben Israel ide TUHAN Allah di niyaijo ninyeng bipia gino akwei um da haninyai ser bi lene mpaba Nabal kin nide limwa nya yahagom imai nipou tirigi mpia pri mem njap di hyep bigyo tu.>> 35 Lene Daud yai mun di Abigail ttei kwei mem noni leu nindati bipai bak <<Dwai! Angkwei hanyen ug ei ade ig hak ug lene ma angon mbut-mbut nyen tut au. Midiyai igbit mun di ahara da tut pima hagom binani yo.>>
36 Tirigi Abigail ngkwei hanyen lene ngat lo, Nabal bon pesta nindig bibor ei nide ig ba, pesta dima noyam kin nibou ndig de pesta. Pes pu noni ba, nibou ngwakti sibui lene yai nillei cem. Gima rino nitnem pui mun bak bi kikau bipek njap di hyep bu. 37 Njap ti tirigi Nabal nibou ngwakti kwes tu lene nitnem pui sut mun di mintun him Nabal nisibutti dima yok hagom bak. Leu api ninggwenti hwen ningon him ba, ningut titut yam nggicai bibor hak leu api bit bon yai no nyen bu kan bi. 38 Ug ei njap simnai bu lene TUHAN bindei ba, ninggwenti pima hwen Nabal ningon him hanyen bimai kep.
39 Tirigi Daud miap tut bipia Nabal mai su lene simbot dat <<Dinggei sut TUHAN! Noni buhup bak Nabal drek dip gi nggucak da kinei-kinau pima. Noni cuon Nide awak di dani leu dibon mun di kinei. TUHAN kes hukum ei Nabal dip drek dip niyai mun kineisi tu.>>
Leu api Daud pinak tungwatu nya ndam Abigail leu binhyepo gino ce tut lene ma buwak nok nitnem. 40 Tirigi yo dima yuug krau Karmel tu lene ipai bak Abigail <<Daud cuk nye binikwei ngat na di Sindig lewo noni joi sut buwak na di Sindig nok nitnem.>>
41 Abigail cem ba nibiau bicom mpia biba ningwak bikik dihyei ei imig him bibuhup <<Da dini ne Daud de awak rin ba, ditin ei mem gima dipiap nide awak nya imigya.>> 42 Leu api tin ei nide ndigban nya haninyai lene bri bigwam ei nide keledai dip. Lene nide sop awak ibou muhwi di inyohou noni cem ibit yo di Daud cuk yok kwei nya leu api Abigail ug nok Daud nitnem.