Daud om no leu gima yai nimai bak Saul
24
1 Lene Daud jo leu minu dima bug ei iggum ndigsi En-Gedi biku no ei dihyei nyem nsi gom. 2 Tirigi Saul sindi ngkwei hanyen leu gi kon pran bit mben Filistin lene noni miap tut bipia Daud bong ei iggum ndigsi dideu En-Gedi. 3 Gima rino noni ya tut nide tentara nya ibou sribu ningai di mimbri kui ingkek bikon pran kan ba, ug nggok ser Daud kin nide limwa nya ei Nungug Tou Kambir Bigbehei bei mpia nipriti. 4 Tirigi noni kwei krau hak mihyeti gom di jo simiak kandan domba di simiak simpak ninghas dima lene noni coi buug gumuhukti. Noro hak mihyeti dima ne Daud kin nide limwa nya no iku yok nyahan eisi ei ninsi ma ug. 5 Lene Daud de limwa nya yahamui nyahan binoni <<Gini bon nituti di kei bibor! TUHAN pai bipia Noni mikes ade siceu ei andati leu binhyepo abibon noni bit leu angon kanti bi e?>> Lene Daud mbris nyahan dideu Saul ba, nyohou kos nide sinsun ndok di jei ninghas gom leu noro Saul kan tut bi. 6 Lene Daud ningon hukti tut niyai munti dima. 7 Leu api noni pai bak nide limwa nya <<Nnaba TUHAN kuk da leu ba, dibon mun di mbuk tut ditde nibou ndig po TUHAN ta ei su pima au. Suar doom dingon tut leu binhyepo di bon mun nyeng gom tunggwei sut noni bi lewo TUHAN ta noni nok nibou ndig tu!>> 8 Nok gima rino Daud brim ningkek kep nide limwa nya binim kep yok leu binhyepo yoni migyai nimai bak Saul bi.Lene Saul kiju behei leu hak mihyeti dima bimbut ug. 9 Lene Daud bram noni behei leu hak mihyeti dima lene hig Saul <<Andigpoi na di Nibou Ndig e!>> Leu api Saul kiek no bitou kep lo, Daud ba ningwak bikik dihyei ndam Saul, 10 bipai binoni <<Nggon rino na di Andigpoi aba angon com yo di itri tut bipia midimbuk tut na ighyet i? 11 Jo nibreisi mem na di Andigpoi bipia nogindi pa TUHAN kes na di Andigpoi ei dindati. Ditde limwa nya ibou poi ibidip huk da leu binhyepo diyai nimai bak na di Andigpoi noro dice tut ighyet bi lewo dingondut na di Andigpoi. Dipai biyok bipia dikou sut gima dimbuk tut na di Andigpoi lewo TUHAN Nonti ta na di Andigpoi nok nibou ndig. 12 Arig e! Angat i! Disu dinda tut ade sinsun ndok di jei ninghas gom di dikos nogindi pa leu na tu ba, angat i! Bon nituti di kei bibor mem diyai nimai bak na di Andigpoi noro dikos ade sinsun ninghas leu na he. Mun dini yok ndo bindo brei bak na di Andigpoi bipia midaham nimbuk kep na ba, dimbuk tut na bi. Mbro nok gino dibon mun tunggwei sut na di Andigpoi bi lo, ahuk da leu binhyepo ayai nimai bida. 13 Ma TUHAN mbus singonti leu binhyepo ndo igbit gi hi di bon mun tunggwei! Handei kon ba, Noni mibirop bak na di Andigpoi drek dip gi abibon da kinei lewo dimbuk tut na di Andigpoi poi mien cem bi. 14 Andigpoi e, akan tut nihyet nibiti ninda di pai <Yo di isibut yongkom ibon kep sisar di kinei bibor.> Leu gima rino midimbuk tut na di Andigpoi bi sren. 15 Andigpoi e, ma angig ayai kep no di nibou ndig Israel bungwam mem gima yai nimai bak i! Angig ayai kep no di nibou ndig dima huk-huk nyen i! Ade awak di dani noyam kin nsien di mai su kin auun he. 16 TUHAN mimbus singonti leu binhyepo ndo igbit gi hi di yai mun tunggwei. Handei kon ba, Noni minggok tut munhyet dini bimbrap gau da biteu da bidingwes ngun leu na di Andigpoi andati cem.>>
17 Tirigi Daud kes nihyet hon bibrim ningkek kep Saul bu bi lene Saul buhup <<Dipmot ndia ug o! Nani rino ambrap dima e?>> Lene noni pim ba, niyai nggwei kibor. 18 Leu api pai bak Daud <<Dwai! Angon sren lo, dibon mun tunggwei sut na. Mbro nok gino dimbuk tut na lo, aba angon di nggriu bibirop bida. 19 Mbro nok gino TUHAN kes da ei andati ei njap di ammani tu pima lo, ayai nimai bida bi lene ayai munti dima ndo brei bida bipia angon kwes kin da. 20 Nggruk bibor mem no di ttau kep nide siceu leu api kes tut no dima bingwes ngun bibirop hanyen bak noni bi a. Gima rino handei kon ba, TUHAN miyai mun di kei bibor bina njap di ammani drek dip gino abibon da nok gi pima. 21 Dikan mungkun tut bipia mporo ayai anyeng nibou ndig Israel apino anyeng di tak kep mben Israel mijo kikau ug bipek ayaijo ningwig honti. 22 Noro ma apreu ei mem da tug hon TUHAN ninyeng bipia mporo ayai nimai bak yo di intun dani him ba, tungwatu nya ingon miprion ser ditde keret ninyeng bi.>> 23 Gima rino Daud preu ei mem noni bipia mporo noni miyai hagom bit leu nok Saul nahara noti.
Lene Saul ngkwei hanyen ug ei nide ig leu api Daud kin nide limwa nya ingkwei hanyen ug ei mpia ttou nsi gom po iku yok eisi pima.