Daud teu timiei Kehila nya bingwes ngun
23
1 Mpe di gom lene bihi itri tut bak Daud bipia mben Filistin injei bihwen timiei Kehila nya bipos gandum di sindi ikos di igyok ei nya cem tu. 2 Lene Daud hig ser TUHAN <<Gino duug kon pran bit mben Filistin lene gima bit leu angon kanti mem da e?>>Lene TUHAN buhup <<I, ma aug kon pran bit yok ba, abiteu timiei Kehila leu mben Filistin inda nsi hak ug.>>
3 Noro yo di ibit Daud itte tut bipai bak <<Mun di buhun di cut igkep nye ei hanjop keret Yehuda dini bindei ba, ittin tu. Gino yuug kon pran bit tentara Filistin ei Kehila lene mporo ittin bibor bu.>> 4 Gima rino Daud hig ser TUHAN mbigom kin bu leu api TUHAN buhup <<Adigit tut au. Acut igkep mben Filistin ei Kehila ba, ahwen yok hak ug. Lewo midikes yok ei andati ug ri.>> 5 Leu api Daud njei sut nide tentara nya ba, yuug ei Kehila. Tirigi yuug krau lene icut igkep tentara Filistin nya bihwen imang bibor lene igyai nimai biyok leu api ipos mindhe-ndhe di ide nya cem. Nok gima lene Daud teu timiei minu ndig dima yahagom bingwes ngun.
6 Tirigi po Abyatar di Ahimelekh nipmot nang ba, ug ngat Daud pima lene noni pwoi efod cem bibit Daud ug ei Kehila.
7 Tirigi bihi ipai bak Saul bipia Daud ningat rini ei Kehila lene noni kan <<Allah kes Daud ei sindati tu. Lewo noni ya bonti tirigi coi ug ei minu ndig di bon ngug tig kin dimbou pmem di ngkiem dima ninsi tu.>> 8 Leu api Saul nduk nide tentara nya ba, ikiju binjei siceu ndam Kehila mem gima igyon ttai minu ndig dima bitut Daud nya yahagom.
9 Noro tirigi Daud kan tut bipia Saul tin ei ningon di mbuk tut noni lene pai bak imam Abyatar <<Attei efod dima kwei bida.>> 10 Leu api Daud ngat nadi <<TUHAN Allah Israel e, dimiap tut bipia Saul tin ei mem gima kwei bindei sar Kehila drek dip Ade awak di dani. 11-12 Mun di dimiap tut dima igbit e? TUHAN Allah Israel e, ma abuhup dihyet hak.>>
Lene TUHAN buhup <<I, Saul mikwei yo.>>
Leu api Daud hig ser Noni bu <<Timiei Kehila nya mikes dani kin ditde tentara nya ei Saul nindati e?>>
Lene TUHAN buhup bak <<I, yoni mikes je ei Saul nindati.>>
13 Gima rino Daud ya tut nide tentara nya ibou sratus muhwindagom ba, ikiju bimbut leu Kehila haninyai biyuug bong minu hiter bu. Tirigi Saul miap tut Daud ninghapti bipia kiju bimbut tu lene Saul luei ningonti ba, yon ttai Kehila bi.
Daud bong-bong nyen ei nungug him
14 Gima leu lene Daud bong-bong nyen ei hak mihyeti ngot di jo ei nungug him dideu iggum ndigsi Zif. Saul huk-huk nyen Daud kikau noro TUHAN gi kes noni ei nibou ndig Saul nindati bi. 15 Mbro nok gima lo, Daud ttin tut lewo Saul tin ei mem gima yai nimai bak noni.
Mpe di gom lene Daud ningat rin ei Hores di dideu iggum ndigsi Zif. 16 Lene Yonatan ug ngat noni ei sirima bipingok ningonti lene bindei ba, Daud ningon ngkiem lene ba ningon com bipia Allah minyohou noni cem. 17 Yonatan pai bak <<Attin tut au. Leu mporo acut ei dicig nindati bi sren. Dicig kan tut mungkun bipia nani rimporo anok nibou ndig mem Israel lene midiyai dinyeng nibou di ya kui na.>> 18 Leu api Daud kin Yonatan ibon gi preu nicom nigau ei yamti bingkiem ei TUHAN Noho bei. Gima leu su lene Yonatan ngkwei hanyen ug ei nide ig lo, Daud gwam kikau ei Hores.
19 Leu api ibou poi leu Zif ikwei ngat Saul ei Gibea bipai bak <<Daud no ku no ei nyende minu biku no nyen ei hak mihyeti ngot di jo dideu Hores ei Nungug Hakhila ei iggum ndigsi keret Yehuda nite bei mpia nibiho. 20 Andigpoi e, nikan tut bipia abrim angkek leu binhyepo akat noni. Gima rino ma akwei ei nyende hanjop nsi a. Minimpu na di Andigpoi leu binhyepo acut igkep ba, ayai nimai binoni.>>
21 Lene Saul buhup <<Handei kon ba, TUHAN njei mun di kei bak jeni lewo jingon nggriu sut da. 22 Jug ba, jiyok jitta kep mungkun bu ug e. Ma jiyok jiyai kep Daud nibongti mungkun kin tungwa dino ngat Daud bou niyai him ei sirima cem. Dimiap tut bipia ningon huk niti tut mun nyeng hi binggok puig mem haninyai cem. 23 Gima rino ma jiyok jiyai kep hak mihyeti di ku no kikep eisi nya mungkun kei leu api jingkwei hanyen kwei ba, jipai sut bida haninyai leu api midibit je. Mbro nok gino diya kep hanjop Yehuda titut yam bidinggek lo, midikat noni he.>>
24 Lene yo dima ingkwei hanyen ug ei Zif leu api Saul ya abia kep yok. Mpe dima lene Daud kin nide tentara nya ingat rima ei iggum ndigsi Maon ei briep di nok ha ngunti ei iggum ndigsi Yehuda nite bei mpia nibiho. 25 Saul kin nide tentara nya ikwei nggok Daud lo, tungwatu nya ipai sut Saul nikweisi dima bak Daud. Gima rino Daud nang ug ei bor ngug gom ei iggum ndigsi Maon pima bibong ei sirima. Tirigi Saul kan tut Daud ninang ug eisi dima tu lene huk bram haninyai. 26 Saul kin nide tentara nya isir bor ngug nite dini ug lene Daud nya isir bor ngug nite dinu kwei. Daud nang haninyai billu leu Saul di yon ser Daud nya pi bikat yok. 27 Noro Saul de limwa gom tau kwei sut nihyet gom kros bikwei ngat noni lene pai bak <<Suar na di Andigpoi angkwei hanyen lewo mben Filistin ihwen ide minu tu!>> 28 Leu api Saul kes hon nuhuk bram Daudti leu lene ug kon pran bit mben Filistin. Gima rino ijem mpia dima ninyeng Bor Ngug Nikwas Yamti.