Saul yai nimai bak TUHAN de imam nya
22
1 Lene Daud kiju binang leu minu ndig Gat lene ug ku no ei hak mihyeti gom di jo dideu minu ndig Adulam. Tirigi nikindig bat nya kin nide bat nya yahagom ikan tut bipia ningat rin ei hak mihyeti dima lene induk yam kwei bitti kin noni. 2 Nok gima cem yo dino hiter ihwen bit yok kin yo di ibon ningwam di buhun tak yok kin yo di ingon sibui cem yahagom ibicom yam bit Daud ba, noni nok nibou mem yok. Yo di ibit Daud dima yahagom imangti ibou sratus bitai.3 Lene Daud jo leu hak mihyeti dima buug ei Mizpa ei hanjop Moab bipai bak nibou ndig Mben Moab <<Gino ace tut lene dicig dipmem nya ikwei bong bit na di Andigpoi kikau bibou dikan tut Allah ningon kanti mem da ug e.>> 4 Leu api noni buwak nide ndigpoi nya bikes yok bak nibou ndig Mben Moab ba, ibong kikau ei sirima mem nijam di Daud ku no nyen ei hak mihyeti pima.
5 Mpe dima lene Gad di nabi gom kwei ngat Daud bipai bak <<Ma abong ei hak mihyeti dini au. Noro ma anang haninyai ug ei hanjop keret Yehuda ide.>> Leu api Daud kiju bijo leu hak mihyeti dima buug coi bigbehei gom ei Keret.
6 Mpe di gom ne Saul gwam kep ninghuisi ei biei tamariska nghousi ei mbigdip gom ei minu Gibea bikrau micim nide ei nindati leu api nibou tentara nide nya igya ttai. Tirigi Saul miap tut bipia hi kan tut mpia di Daud kin yo di ibit noni iku yok eisi tu, 7 lene Saul pai bak nibou tentara nide nya <<Keret Benyamin jen, jimiap! Jikan bipia Daud dima mikwas miai kin biei anggur nghousi tut je bikon jahagom jinyeng bijinok nibou mem nide tentara nya e? 8 Jo nibreisi bipia jahagom jiyok jingon gom mem gima jihwen bit da tu. Lewo jigom cem gi pai brei bida tut dipmot di Yonatan di tti bit Daud pima bida bi. Tungwagom ngat leu jikieti gi ngondut da bipai bida bipia nogindini dipmot di Daud po ya kui da pima nggok nituti mem gima yai nimai bida ba, dipmot di Yonatan bidip huk noni tut gima cem bida bi.>>
9 Doeg po nok nibou mem yo di ighyen kep mindhe-ndhe di Saul de pima cem ningat rin bit nibou tentara di Saul de nya. Leu api noni pai <<Dingat Daud tirigi ug ngat Ahimelekh di Ahitub nipmot ei Nob tu. 10 Lene Ahimelekh hara TUHAN leu binhyepo ndo igbit ningon kanti bak Daud leu api yai njita kin simeda po Goliat di mben Filistin de pima cem bak.>>
11 Lene Saul cuk tentara nya ba, ibuwak Imam Ahimelekh kin adig-ajoi di inok imam ei Nob yahagom kwei ba, igya ei Saul noho bei. 12 Lene noni pai bak Ahimelekh <<Na di Ahitub nipmot e, amiap dihyet dini!>>
Lene Ahimelekh buhup <<Andigpoi e, dingig ditingou mem ahyet.>>
13 Lene Saul hig ser noni <<Nggon rino ayok angon gom bit Daud mem da i? Nggon rino ayai roti kin simeda bak lene ahara TUHAN tut ningon kanti mem noni cem i? Nogindini noni hwen bit da nyen binggok nituti mem gima yai nimai bida.>>
14 Leu api Ahimelekh buhup <<Noro Daud ne Na di Anyeng Jei ade nibou tentara di ningon gom dor njiriek nindigsi nya ri. Noni ne Na di Anyeng Jei apmang ningat ri. Noni ne nibou tentara di igya ser Na di Anyeng Jei ide nibou rin ba, nibou di igya kui na di ingat rin ei ade ig yahagom ibou cut bak noni bibor. 15 Ningat ne dahara TUHAN bindo ningon kanti bak noni. Noro gi dahara TUHAN bindo ningon kanti bak noni pima ne gi nimbie him ngat rin bi.i Ma Na di Anyeng Jei apai kep dani kin dide bat nya cem tut gi niyok ningon gom mem gima nihwen bit Na di Anyeng Jei au. Dikan tut munhyet dima bi.>>
16 Noro nibou ndig Saul pai <<Ahimelekh e, suar nani kin ade adig-ajoi nya jahagom jitug ndei nimai.>> 17 Leu api noni cuk tentara di igya ser noni <<Yo, jikes hukum nimai ei TUHAN de imam dima yok yahagom dip lewo igyok ingon gom bit Daud. Ikan tut Daud ninangti tu lo, igipai sut bida bi.>> Saul pai nok noro tentara di igya ser noni ikou sut gima ikes hukum nimai ei TUHAN de imam nya dima dip a. 18 Gima rino Saul cuk Doeg <<Akes hukum nimai ei yok dip haninyai hak ug.>> Lene Doeg brim no bitot imam dima yok ningwig a. Ba, imam di idem mem gima ijuk sinsun efod dima ibou ningot muhwindaningai ba, muhwi yahagom igyai nimai ei njap dima. 19 Lene Saul cuk tentara nya ba, igyai nimai bak yo di ibong ei minu ndig Nob po imam nya ide minu ndig pima yahagom bitut pinai nya kin sop nya kin munggwom nya kin ningwoi-ngwoi nya yahagom ba, bitut sapi nya kin keledai nya kin domba nya hagom cem ningwig a.
20 Noro Abyatar di Ahimelekh nipmot nongkom ningwes ngun ba, nang kikau buug ngat Daud, 21 leu api pai bak Daud bipia Saul yai nimai bak TUHAN de imam nya tu. 22 Leu api Daud pai bak <<Tirigi dingat Doeg ningat rin ei mpia dima mem njap pima lene dikan tut mungkun bipia noni mipai kep dinghapti bak Saul. Dani rino dibindei di acig kin ade adig-ajoi yahagom igyai nimai a. 23 Ma adigit tut au noro agwam bit da. Saul joi sut yai nimai bisa. Noro dwai! Gino abong bit da lene mporo angwes ngun.>>