Daud om ningon tut Saul hanyen biyai nimai bak bi
26
1 Mpe di gom bu ne timiei Zif ibou poi ikwei ngat Saul ei Gibea bibakilak Daud bak Saul bipia Daud ku no ei Nungug Hakhila ei iggum ndigsi Yehuda ninghas him. 2 Saul miap gima lene kiju bimbut haninyai ba, tentara Israel di mimbri kui ingkek ibou sribu ningai injei bit noni ug ei iggum ndigsi Zif binggok ser Daud. 3 Saul tas nide prak meng ei puig nghas dideu Nungug Hakhila dima. Tirigi Daud di ningat rin ei iggum ndigsi dima kan tut bipia Saul bram no ba, kwei krau iggum ndigsi tu, 4 lene cuk yo di igyok itta kep yok apino jo nibreisi mem Daud bipia Saul ningat rin ei sirima tu. 5 Daud ug ei Saul nohok prak meng eisi pima haninyai ba, tirigi ug krau lene ngat prak meng di Saul bong niti. Lene Abner di Ner nipmot bong dideu noni. Saul de prak meng di bongti jo hacan ngat lene nide tentara nindigsi nya ide prak meng nya jo bikrop ttai.6 Leu api Daud hig Ahimelekh kin Abisai di Yoab nikinjoi di mben Het (di ipmem ninyeng rino Zeruya) <<Tou brim ningkek bibit da ba, nicoi ug ei Saul de prak meng yati i?>>
Lene Abisai buhup <<Dibit na.>>
7 Lene Daud Abisai nya isu yo bimbris nyahan ug ei prak meng yati dima mem mmun bingat lo, Saul bong ei prak meng gom di yohok ei prak meng yati dima ninggimau yon. Noni ba nide tom bijus dihyei dideu nibou lo, Abner bitut nide tentara nya ibong bikrop ttai Saul. 8 Lene Abisai pai bak Daud <<Allah kes ade siceu ei andati mem mmun dini tu. Ma ace tut bidiba nonti nide micim bidat ningut bikus nite hi leu ba, tibim dihyeiti hak ug. Didat noni mbican bram yam bi noro mbigom ngat bimai hak ug.>>
9 Noro Daud buhup <<Ma angget noni au. TUHAN mikes hukum jit-jau ei no di bon mun kinei sut nibou ndig di Nonti dimig ei su dima dip.>> 10 Lene Daud binut nihyet bu bisimbot dat <<Dikan mungkun tug hon TUHAN di niyaijo ninyeng bipia TUHAN Nonti miyai nimai bak Saul tirigi nide njap ngon bou dem mem gi mai e, he tirigi ug kon pran lene bitug ndei nimai e. 11 Ma TUHAN cuon da leu gima diyai nimai bak nibou ndig di Nonti dimig ei su! Ma sitiba nide micim kin sipos dibijig di dut minyei eisi ba, simbut tut gima yok he.>> 12 Gima rino Daud tiba Saul de micim bipos dibijig di noni dut minyei eisi cem leu nijoti dideu Saul nibousi leu lene ibimbut tut. Hi di ngat mun dima bikan tut mun di pek kep ei mmun dima ba, digit tut bikiju cem bi. Lewo TUHAN bindei ba, yo dima yahagom ibong mai bibor.
13 Lene Daud pri ug ei mbang briep dima nite hi lene kui kikau ug ei nungug dima ninggram him biya ting leu Saul de prak meng yati. 14 Leu api ba nihyet ndig bihig Abner kin Saul de tentara nya <<Abner e! Amiap dihyet e?>>
Lene Abner buhup <<Na tou rino ajem dima i?>>
15 Lene Daud hig ser noni <<Abner, apo nani ne no di mipbor ngat dor njiriek mben Israel nindigsi nya rin bi e? Nggon rino ayai ngkiem ser ade Andigpoi di nibou ndig dima bi i? Nogindi pa bihi icoi ug ei ade prak meng yati mem gima igyai nimai bak ade Andigpoi o! 16 Abner e, agibindei mbut ade midyai haigtu bi! Deheng bitug hon TUHAN di niyaijo ninyeng bipia dem mem gima jitug ndei nimai lewo jigiya ser jide Andigpoi di nibou ndig di TUHAN dimig ei su dima haigtu bi o! Ma jiput-put nyen ttai je bijinggok ser nibou ndig de micim kin dibijig di dut minyei eisi po jo dideu nibousi pima i!>>
17 Lene Saul miap igbit Daud nihyet leu api jem bak <<Dipmot Daud nani rin e?>>
Lene Daud buhup <<I, Andigpoi e, dani rin o!>> 18 Leu api Daud binut nihyet bu bipai <<Andigpoi e, nggon rino ahuk-huk nyen da di dinok ade awak i? Ditunggwei sut mindei ngan i? 19 Andigpoi e, ma angig atingou mem dihyet dini ug e. Gino TUHAN rino cuk na di Andigpoi mem gima ahwen bit da lene Noni mibindei cut nigga dati dima tug hon mindhe di dibui bidindig ei nimbar hum dokti hak ug. Noro gino tungwatu nya rino icuk na di Andigpoi mem gima ahwen bit da lene nna ba TUHAN misigion yo dima! Lewo igyai munti dima huk ade awak di dani leu TUHAN de dihyei apino bitig dino dipri kwei ei dingkiaisi dini bidikuk da bak kwar ngkiai nya ide. 20 Ma asindui sut ba, ditug ndei nimai ei dingkiaisi dini ei minu ting leu TUHAN au. Nggon rino na di nibou ndig Israel akwei yai nimai bida tereu nok ayai nimai bak nsien ntati gom i? Nggon rino ahuk-huk nyen da noyam kin tungwatu nya yuhuk-huk nyen hamug bigbehei i?>>
21 Leu api Saul buhup <<Daud dipmot na e, dibon mun tunggwei sut na tu noro ma akwei hanyen. Midibon mun di kinei tut nani bu bi. Lewo aom angonti tut da ba, asindui sut bidiyaijo ei mmun di aponi pima. Dingon mbum jit ba, dibon mun tunggwei sut nani nindig bibor tu.>>
22 Lene Daud pai bak <<Micim di na di Andigpoi ade rini ba, acuk ade tentara gom bikwei yai hanyen. 23 TUHAN njei mun di kei bak yo di ingon gom kin yo di ingon sren. Mbro nok gino TUHAN kes na di Andigpoi ei dindati aponi pima tu lo, doom da leu ba, diyai mun kinei sut na di Andigpoi bi lewo nani ne nibou ndig di TUHAN dimig ei su ri. 24 Handei kon ba, TUHAN minyohou da biteu da leu mun di mbuk nya hagom noyam kin gi po doom dingonti tut na di Andigpoi bidisindui sut di ayaijo aponi pima tu.>>
25 Leu api Saul pai bak Daud <<Dipmot na e, TUHAN minjei mun di kei bak nani! Ningat di kei mintun ade midyai di ayai nya hagom him!>>
Leu api Daud kes Saul ei bimbut leu ba, Saul cem ngkwei hanyen ug ei nide ig.