Yonatan di mimbri kui ningkek
14
1 Mpe di gom Yonatan pai bak pinai pilei gom dittei kep nide minggwen nya <<Akwei ba, suug cem kep mben Filistin ei ide prak meng yati.>> Pai nok noro ndo ningon kanti bak nicig bi. 2 Mpe dima lene Saul hok nide prak meng yati ei biei delima nghousi ei Migron di jo dideu Gibea. Nide tentara di igya kui noni imangti ibou sratus muhwindagom he. 3 (Imam Ahiya juk sinsun efod mem nijam dima ba, nicig ninyeng Ahitub ba, nipmum ninyeng Ikabod. Ikabod nicig ninyeng Pinehas ba, nignyon ninyeng Eli po TUHAN de imam ei Silo pima.) Noro tentara nindigsi nya ikan tut Yonatan nimbutti bi.4 Hak di bon ninggwen-nggwen ningat can jo ei nitinggoisi Mikhmas nite hi lene nite hi ei puig sinon di bie ug ei mben Filistin ide prak meng yati pima. Tungwatu nya ijem hak dima hi ninyeng Bozes lene hi ninyeng Sene. 5 Hak gom di jo bei mpia nijjai birok kik Mikhmas lene gi hi di jo bei mpia nibiho birok kik Geba.
6 Lene Yonatan pai bak pinai pilei pima <<Akwei ba, suug ei mben Filistin ide prak meng yati. Yoni ikuk yok bak Allah bi. Mpaba TUHAN mimpu sa lewo Noni sindem mem gima bindei ba, side siceu nya micut tug hon tentara di imang bibor kin tentara di ibou poi he cem.>>
7 Lene pinai pilei buhup <<Andigpoi e, ayai mun bit leu angon kanti leu api midibit na.>>
8 Lene Yonatan pai <<Kei bibor! Ma simbut ug ei mpia dima brei bou tentara Filistin igyai him. 9 Gino icuk sa bipia siya siyati ba, ikwei um sa lene ma siya siyati hak ug. 10 Ne gino icuk sa bipia suug ndam yok lene misimbut kikau lewo ipaisi dima rinok mun di bindo tut bipia TUHAN misindem tut sa leu binhyepo sibindei cut yok.>>
11 Gima rino imbut brei ei tentara Filistin igyai him apino yo dima icuk yam bipai <<Jingat i! Mben Ibrani ibou poi yehei leu ide hak mihyeti po iku yok eisi pima ri!>> 12 Lene ihig Yonatan kin pinai pilei pima kwei bipai <<Jikui kwei ndam nye ei sirini leu binhyepo nindo mun nyeng gome bije.>>
Lene Yonatan pai bak pinai pilei pima <<Abit da ba, simbut ri. Lewo TUHAN yai nisindemti bisa apino yo dima micut bak nye di mben Israel.>> 13 Yonatan mbris nyahan bikui ug ei nitinggoisi ba, pinai pilei dima bram noni. Tirigi Yonatan tau kros kep tentara pima yok lene noni bui yok binjei yok ug ei dihyeisi leu api pinai pilei pima yai nimai bak yahagom bingwig bibram Yonatan ninghim dip. 14 Tirigi ihwen mben Filistin ei nimbie him dima lene igyai nimai bak tentara ibou nyatungwagom ei mpia di nijeisi kin ninyanti noyam kin miai njita gom nijeisi kin ninyanti. 15 Lene gima yai nidigit bak mben Filistin di ingat rin ei ide prak meng yati kin gi hi di ingat rin ei ngoi dumti nya. Mben Filistin bidem dihyei dima nisurti-nipekti kin yo di igya dikti nya kin nimpung di igya kep bihwen tungwatu bipos ndigban nya leu yok cem ittin bibor. Njap dima cem dihyei ugwa-kwei bibindei ba, tungwatu nya yahagom ingon tai-tai bou nindig bibor.
Tentara Filistin icut bak tentara Israel
16 Lo bi lene Saul de tentara ibou poi di igya ser Gibea ei hanjop keret Benyamin ingat lo, tentara Filistin yahagom iba ingon tai-tai bou bidor ug bidor kwei nyen. 17 Gima rino Saul cuk nide tentara nya bipai <<Jikwei ba, ikwop ide tentara nimangti leu binhyepo ingat igbit gi hi di imbut leu nye tu ug e. Yoni ikwop imangti bingat lo, Yonatan kin nide pinai pilei gom ingat rin bi.>> 18 Lene Saul pai bak imam Ahiya pima <<Ma akon sinsun efod kwei.>> (Njap dima ne Ahiya juk sinsun efod biya bibie mem tentara Israel.) 19 Tirigi Saul mbrap bit imam dima wer ninno lene ingat lo, tentara Filistin ighyet ter nindig bibor bu ei ide prak meng yati. Gima rino Saul pai bak imam dima <<Bon nituti mem simem kep ser TUHAN nibuhup bisati bi.>> 20 Lene noni kin nide tentara nya injei biyuug ei pran cut eisi bingat mben Filistin di ibou sibui di yonti ihwen yam nyen ei dima bihwen yok. 21 Lene tentara Ibrani ibou poi di itti kin tentara Filistin di ibong bit yok ei prak meng yati iluei ingonti ba, itti kin Saul kin Yonatan bu. 22 Lene mben Israel po iku yok ei nungug behei ei hanjop Efraim pima imiap tut tentara Filistin di inang tu nya. Gima rino yoni cem yuhuk bram mben Filistin bihwen yok ba, 23 ihwen yok kikau binjiriek Bet-Awen. Njap dima ne TUHAN teu mben Israel leu ide siceu nya indati.
Saul kes nisigionti ei tungwa di yem njita ei nituti dima dip
24 Njap dima ne tentara Israel yahagom inggum bibor lewo Saul cuk yok tug hon neheng bipai <<No di yem njita nipou tirigi dihwen ditde siceu nya bingwig bigyo mitug ndei nisigion noti.>> Gima rino nide tentara nya igyem njita hi ei njap jei dima bi. 25 Tirigi yuhuk tentara Filistin lene imbut bigbehei gom bingat lo, ahwei lon ningei nindig bibor jo bidem mpia dima hagom. 26 Mbro nok gino bigbehei dima mpung tut ahwei lon ningei lo, hi brim ningkek biyem njita dima bi. Lewo yahagom ittin tut nisigionti pima. 27 Noro Yonatan kan tut nisigionti di nicig kes ei nide limwa nya dip dima bi. Gima rino noni su nide tom bingget ahwei lon gom lene ba ninda biket ei ninsi biyem lene gima bindei ba, ninghuisi sindem hanyen. 28 Noro nisut gom pai binoni <<Nyeni nahagom ninggum bibor ba, ninghuisi jet lewo acig heng ser nye bipia no di yem njita njap di ammani mitug ndei nisigion noti.>>
29 Lene Yonatan buhup <<Aye! Dicig kes mun di buhun bibor bidor njiriek ei nide limwa nya dip! Jingat i! Dinghuisi sindem hanyen tug hon ahwei lon ningei di diyem dima. 30 Gino Saul sindui sut tentara nya ba, igyem njita di ipos leu siceu nya njap di ammani lene migyai nisindemti mem gima yuhuk tentara Filistin kikau bihwen imang bibor bu. Noro bi!>>
31 Njap dima ne tentara Israel ico kep mben Filistin nindig bibor kak puig sinon ei Mikhmas kikau ug bipek Ayalon. Gima ngwig lene yahagom inggum bibor ba, inghuisi jet bibor. 32 Gima rino ibinang yam bikikam mun di ipos leu ide siceu nya ba, ibui domba nya kin sapi nya bibam leu api igyem mikwau di ninggrom joti yo. 33 Lene ibou poi ibakilak yok bak Saul bipai binoni <<Angat i! Ade limwa nya ibon sisar tut TUHAN tug hon mikwau di igyem tut ninggrom di joti.>>
Lene Saul mbrua ser yok bipai <<Jipigau Allah de hanjop tu! Ma jirim tig nindig bibor kwei bida.>> 34 Lene noni cuk yo po ibakilak yok pima bipai <<Juug bijintek gimahap ug ei limwa nya ikieti ba, jicuk yok bipia ijem ide sapi kin domba nya kwei. Ma ibon sisar tut TUHAN tug hon mikwau di igyem tut ninggrom di joti au.>> Gima rino yahagom ijem ide mindhe-ndhe nya kwei mem mmun bibui hagom ei mpia dima. 35 Lene Saul dingug tig nindig bijo-jo yam dip mem nimbar hum dok gi noni bibon nimbie him bak TUHAN,
36 bipai bak nide limwa nya <<Jikwei ba, ihwen mben Filistin mem mmun di ariman bipos mun di inyeng tut nya hagom bingwig leu yok leu api igyai nimai biyok.>>
Lene limwa nya ibuhup <<Andigpoi e, ayai mun bit leu angon kanti hak ug.>>
Noro imam gom pai <<Jikwei ba, ihig Allah nipou ug e leu binhyepo Noni ndo igbit ningon kanti binye.>>
37 Gima rino Saul hig ser Allah bipai <<Gino dihwen mben Filistin lene ma abindei ba, icut bak nyeni e?>> Noro Allah buhup nihyet mem njap dima bi. 38 Lene Saul nduk nibou di igya kui noni yahagom kwei bipai <<Jikwei ba, inggok tut sisar di ibon mem njap di ammani ug e. 39 Dipreu ei tug hon Allah di niyaijo di bindei ba, ide siceu nya icut bak nyeni ninyeng bipia mbro nok gino no di ningon mui dima ne dipmot Yonatan rin lo, suar no dima tug ndei nimai.>> Pai nok noro hi hap niji bimbrap bi. 40 Lene Saul cuk yok bipai <<Jahagom jiya jiyati ei mpia dima lene dani kin Yonatan miniya ei mpia dini.>>
Lene ibuhup <<Andigpoi e, ayai mun bit leu angon kanti hak ug.>>
41 Lene Saul ngat nadi bipai <<Nye di mben Israel nyende Allah e, nggon rino abuhup dihyet njap di ammani bi i? Allah e, ma abuhup dihyet tug hon tig permata di kwes-kwau dini. Gino dani e, he Yonatan rino ningon mui e, lene ma abuhup tug hon Urim. Ne gino nyende limwa nya hi ningon mui lene ma abuhup tug hon Tumim.>>f Lene TUHAN nibuhupti ndo tut Yonatan kin Saul. Gima rino ide limwa nya yahagom ingon ngun. 42 Lene Saul ngat nadi bu bipai <<Allah e, ma ando igbit leu nibou can dini.>> Lene nibuhupti ndo bipia Yonatan rino ningon mui. 43 Gima rino Saul hig ser Yonatan <<Abon mindei i?>>
Leu api Yonatan buhup <<Diyem ahwei lon ningei poi mien di diba ditde tom biyai lo, ditin ei mem ditug ndei nimai hak ug.>>
44 Lene Saul pai binoni <<Gino atug ndei hukum nimai mem njap di ammani bi lene handei kon ba, Allah kes hukum ei da dip hak ug!>>
45 Noro nide limwa nya isrep bipai <<E bi! Nggon rino Yonatan mitug ndei nimai i? Noni ribindei dino ide siceu nya yahagom icut bak nyeni tu! Nipreu kep na di Andigpoi tug hon Allah di niyaijo ninyeng bipia Yonatan nibou nta gom mipror leu noni bi. Lewo noni bindei ba, ide siceu icut bak nyeni mem njap di ammani tug hon Allah di sindem tut noni.>> Gima rino nide limwa nya iteu Yonatan ba, ningwes ngun leu hukum nimai.
46 Gima hagom ngwig leu lene mben Filistin ingkwei hanyen ug ei itimieisi lewo Saul kes hon ba, huk yok bu bi.
Saul de midyai nya kin nide bat nya inyeng
47 Niabiati mben Israel ita Saul nok nibou ndig lene noni kon pran bit nide siceu nya bidem hantou-hantou bitut mben Moab kin Amon kin Edom yahagom kin nibou ndig nya ei Zoba kin Filistia. Tirigi noni kon pran lene nide siceu nya yahagom icut bak noni. 48 Saul di mimbri kui ningkek bindei ba, mben Amalek cem icut bak noni. Noni teu mben Israel bingwes ngun leu ide siceu nya di ihwen yok yahagom indati.
49 Saul yai nipmot bat nya di inyeng Yonatan kin Yiswi kin Malkisua. Nipmisop mighumbou ninyeng Merab ba, Merab nikinjoi ninyeng Mikhal. 50 Saul nitnem ninyeng Ahinoam ba, Ahinoam nicig ninyeng Ahimaas. Saul nipmum Ner yai nipmot Abner di nok nibou pran mem tentara Israel. 51 Saul nicig Kish kin Abner nicig Ner ba, andigpoi cin dini icig ninyeng rino Abiel.
52 Saul kon pran bit mben Filistin ninyen kikau ug bipek niyaijo ningwig honti. Gima rino tirigi Saul ngat no di mimbri kui ningkek lene noni kus no dima ba, nggre kin nide tentara.