Saul kon pran bit mben Amalek
15
1 Mpe di gom ne Samuel pai bak Saul <<Allah Nonti cuk da leu binhyepo dita na di Andigpoi ba, anok nibou ndig mem nide limwa di mben Israel. Gima rino ma na di Andigpoi angig atingou mem Allah Di Sindem Bibor nicuk nati. 2 Noni mikes hukum ei mben Amalek dip drek dip gi po idigup bat-idigai bat nya imbuk tut nye di mben Israel tirigi po mben Israel ikwei leu minu Mesir pima. 3 Gima rino ma aug kon pran bit mben Amalek ba, abindei timek mun di inyeng tut nya hagom hak ug. Lene ma ayai nimai bak pinai nya kin sop nya kin munggwom nya kin ningwoi-ngwoi nya kin sapi nya kin domba nya kin unta nya kin keledai nya hagom hak ug.>>4 Lene Saul nduk nide tentara nya yahagom kwei ei Telaim biyok niyai kep yok. Tentara Israel imangti ibou sribu sratus can lene tentara Yehuda imangti ibou sribu simnai. 5 Lene noni bie tut tentara nya ba, yuug ei Amalek bikos dik ei mbang tirimpoi gom. 6 Lene Saul sok nihyet bak mben Keni lewo yo dima idigup bat-idigai bat nya ingondut mben Israel tirigi po ikwei leu minu Mesir pima. Noni pai biyok <<Ma jikes mben Amalek ei ba, jinang leu ide minu ndig leu binhyepo tirigi dihwen yok lene dibihwen jeni bit yoni bi noro mijingwes ngun.>> Gima rino mben Keni ikes mben Amalek ei ba, inang leu yok.
7 Lene mben Amalek icut bak Saul tirigi noni hwen yok ei minu ndig Hawila kikau ug ei Syur di jo dideu minu Mesir bei mpia nipriti. 8 Lene tentara nya ikat Agag di nok nibou ndig mem Amalek lo, isindui sut ba, niyaijo noro igyai nimai bak nide limwa nya yahagom. 9 Lene Saul nya isindui sut Agag niyaijo lene igyai nimai bak domba kin sapi nindig kin nehen pap nya di kei bibor kei kin mindhe-ndhe di bon ninyeng cem bi. Noro tut mindhe di muhup di bon ninyeng bi di kinei-kinau nya ne igyai nimai bak hagom bingwig.
Allah kou sut gima Saul nok nibou ndig
10 Lene Allah pai bak Samuel, 11 <<Dinso Danti tut gi didimig Saul nok nibou ndig lewo noni kiek noho ter leu Da ba, bit ditde nicuk noti bi.>> Lene Samuel ningon buhun bibor ba, ngat nadi bibidip huk Allah kikau mem mmun dima. 12 Njap di hyep bu Samuel kiju mem njap bigyokti buug nggok ser Saul. Lene hi pai binoni bipia Saul ug ei Karmel ba, dingug tig nibiyok ngon kep nonti gom ei sirima leu api ngkwei hanyen ug ei Gilgal tu. 13 Gima rino Samuel bram Saul bahatap noni leu api Saul pigo noni bipai <<Samuel e, handei kon ba, Allah minjei mun di kei bak nani! Dibit Allah nicuk dati tu.>>
14 Lene Samuel hig ser noni <<Gi nok lene nggon rino sapi kin domba di dungwek dima tibim ei ditingou nsi i?>>
15 Lene Saul buhup <<Ditde limwa nya ipos mindhe-ndhe dima yok leu mben Amalek. Yoni idimig gi hi di kei bibor ei mem ade Allah leu binhyepo ibibon midut bak Noni. Noro tut nindigsi nya lene niyai nimai bak hagom bingwigg hak tu. >>
16 Samuel miap nipaisi dima lene srep bipai <<Cobi! Nogindini midipai sut Allah nihyet di sok ei da dip himmun di aponi bina.>>
Lene Saul buhup <<Nna ba apai bida hak ug.>>
17 Lene Samuel pai binoni <<Mbro nok gino na di Andigpoi akan bipia abon anyeng bi lo, nani ne nibou mem keret mben Israel hagom rin lewo Allah ta nani ba, anok nibou ndig. 18 Nok gima cem Noni pinak na di Andigpoi ba, cuk na leu binhyepo ahwen mben Amalek di isibut bibor dima. Allah cuk na di Andigpoi ba, ata abou ei gi akon pran bit yok kikau bibou yahagom imai bingwig ug e. 19 Nggon rino na di Andigpoi abit nicuk nati dima bi i? Nggon rino abrim angkek dino ayai ide ndigban nya ba, abibindei Allah ningon pus tut na drek dip ayai munti dima i?>>
20 Lene Saul buhup <<Dibit Allah nicuk dati tu. Dikon pran bit yok bit leu nok Nide nicuk dati tu. Dikat Agag di nibou ndig Amalek leu api diyai nimai bak nide limwa nindigsi yahagom tu. 21 Noro ditde limwa nya igyai nimai bak mindhe-ndhe nya hagom bi noro idimig mindhe-ndhe di kei bibor kei nya ei mem gima ijem hagom hanyen kwei ei mpia di Gilgal dini mem nibibon midut bak TUHAN di nok ade Allah.>>
22 Lene Samuel hig ser noni <<Allah joi sut mindei ngan i? Noni joi sut yo di ibit nihyet e, he joi sut nibon midut he e? Mun di bon ninyeng ei Noni niyai him rino ibit nihyet leu gino ibon midut nindig domba di kei bibor kei kep humti bak Noni. 23 Lewo nibit nihyet bi pima kinei ba, noyam kin nibon midut nikrau kep nihyet di dut lene nikon nonti kinei bibor noyam kin nikuk nok bak kwar cem. Allah kou sut gima anok nibou ndig lewo angkek ndok tut Nide nicuk nati.>>
24 Lene Saul buhup <<Jo nibreisi bipia dibon sisar tu. Dibit Allah nicuk dati kin ade nipingok dati nya bi. Dittin tut ditde limwa nya bidisindui sut yoni igyai mun bit leu ingon kanti. 25 Noro Andigpoi e, dahara bina leu binhyepo akos ser ditde sisar leu api abit da bisingkwei hanyen ug ei Gilgal leu binhyepo dikuk da bak Allah.>>
26 Lene Samuel buhup <<Midibit na di Andigpoi bi! Angkek ndok tut Allah nicuk nati. Gima rino Noni kou sut gima na di Andigpoi anok nibou ndig mem mben Israel.>>
27 Lene Samuel kiek no ba, pi bimbut rin noro Saul kat Samuel de sinsun ndok di jei bibindei rik. 28 Lene Samuel pai binoni <<Allah rik anyeng di tak kep ade limwa nya bingwig leu na mem njap di ammani leu api yai bak no di ningon sren dor njiriek na di Andigpoi tu. 29 Nye di mben Israel ide Allah Di Ninyeng Jei ris mun ba, luei ningonti bi lewo Noni ne tungwatu dihyeisi dini rin bi.>>
30 Lene Saul buhup <<Dibon sisar tu. Noro na di Andigpoi e, abit da ba, singkwei hanyen leu binhyepo dikuk da bak TUHAN di nok ade Allah. Tug hon nisinati dima ne angon mpo tut da ei nibou mien nya kin mben Israel nindigsi igyai him bi.>> 31 Gima rino Samuel bit Saul ba, ingkwei hanyen ug ei Gilgal leu api Saul kuk no bak TUHAN.
32 Lene Samuel cuk tentara nya bipia ikat Agag kwei ya ei noho bei. Lene Agag ba ninghuisi di mpig sut bikwei ya ei Samuel noho bei bikan <<Misingwes ngun leu hukum ug ri.>> 33 Lene Samuel pai binoni <<Bit leu nok gi po ade simeda bindei ba, sop imang bibor ide munggwom nya isar bingwig leu yok lene nok gima cem simeda gom mibindei ba, apmem nipmot gom misar hak leu noni.>> Lene noni kkin Agag kukiau hak ei bei nimbar hum dok nuhui ei Gilgal.