Samuel pingok kep Saul ningonti
13
1 Mpe di gom bu niabiati ita Saul nok nibou ndig tu, 2 lene noni mbus mben Israel ibou sribu ningai keyam ei bikwas yok ei nimpung can. Ibou sribu can igya kui noni ei Mikhmas kin nungug him ei minu ndig Betel lene ibou sribu gom igya kui nipmot Yonatan. Leu api Saul cuk Yonatan kin nide limwa nya ug ei Gibea ei hanjop Benyamin. Gima ngwig lene noni kes tungwatu nindigsi nya ba, ingkwei hanyen ug ei ide minu nya.3 Lene Yonatan nya ihwen tentara Filistin ei Geba ba, igyai nimai bak ide nibou pran apino ninghapti tibim kikau bidem minu Filistin nisurti-nipekti. Lene Saul cuk tungwatu nya leu binhyepo imbut bidem mben Ibrani ide minu hagom ba, imiep ide pun mbrei nya bibinduk tungwatu nya yahagom binjei bikon pran. 4 Yo di imiep pun pima itri tut bak tungwatu nya tut Saul po yai nimai bak tentara Filistin ide nibou pran pima ba, ibitri tut mben Filistin di ingon sibui sut yok bibor cem. Gima rino tungwatu nya ibrim ingkek bidem yam bit Saul ei Gilgal.
5 Lene tentara Filistin cem induk yam ei mem gima ikon pran bit mben Israel. Ide kroba pran nimangti sribu ningot ningai lene ide tentara di ibri kuda kan imangti ibou sribu muhwindagom lene ide tentara nindigsi nya imangti dor njiriek iggum di jo muk pimat nimangti. Yahagom ikwei hok ide prak meng yati ei Mikhmas di jo dideu Bet-Awen bei mpia nipriti. 6 Mpe dima ihwen tentara Israel sindem bibor bibindei ba, tentara Israel ibou ngwak sibui nindig bibor. Gima rino inang biku yok nding mpia ei hak mihyeti kin tig ninggreti kin jui nsi kin minyei bousi di jut bibor. 7 Lene nindigsi isigon Minyei Yordan binang ug ei hanjop keret Gad kin Gilead.
Noro Saul ningat rin ei Gilgal. Nide tentara nya ittin nindig bibor ba, inghuisi mpig sut. 8 Noni mem kep ser Samuel nikweisi kikau mem njap muhwindacan bit leu nok Samuel nicuk noti noro Samuel kwei krau Gilgal bigyo. Lene tentara nya ibou poi sindi ikes Saul ei bimbut leu. 9 Gima rino noni cuk nide limwa nya bipai <<Ma jijem mindhe mem nibon midut nindig mindhe titut kep humti kin nibon midut nibiyai ningon kwes kin Allahti kwei bida. Lene noni bon midut nindig mindhe kep hum.>> 10 Tirigi noni bon midut biput tu rino Samuel kwei krau ba, Saul ug um noni bipigo. 11 Lene Samuel hig ser noni <<Andigpoi e, abon mindei i?>>
Leu api Saul buhup <<Ditde limwa nya sindi ikes da ei leu api akwei krau bit leu nok gi po apai bidati pima bi. Tentara Filistin cem idem yam ei Mikhmas tu. 12 Gima rino dikan bipia mbigom tentara Filistin mikwei hwen sa ei Gilgal dini noro sibrim singkek ba, sahara TUHAN mem gima joi sut sa bigyo. Gima rino dikos tut di dibon midut dima ug a.>>
13 Lene Samuel buhup <<Andigpoi e, mun di ayai dima ne aba angon mbum biyai yo. Abit TUHAN Allah nicuk nati bi. Gino abit nicuk nati pima nok igbit lene Noni misindui sut ade nintun him yamti di bram yam nya ba, igya luei ahoti binok nibou ndig mem mben Israel bijo ninno bijo kikau. 14 Noro anyeng di tak kep mben Israel mingwig hon nohonti. TUHAN minggok no di Noni joi sut leu api mita noni nok nibou ndig biya luei ahoti lewo abit nihyet bi.>>
15 Lene Samuel jo leu Gilgal bimbut ug ei Gibea ei hanjop keret Benyamin. Saul ngig niyai kep nide tentara nya di imangti ibou sratus muhwindagom he. 16 Lene noni kin nipmot Yonatan kin ide tentara nya yuug hok ide prak meng yati ei Geba ei hanjop keret Benyamin lo, tentara Filistin yohok ide prak meng yati ei Mikhmas. 17 Lene tentara Filistin ikwas yam ei nimpung ningai mem gima ihwen ide siceu nya. Nimpung gom mbut ug ei Ofra ei hanjop Syual. 18 Lene nimpung gom bu imbut biyuug ei Bet-Horon lene nimpung gom bu imbut biyuug ei minu niya kwas yamti di ibicap Mbang Briep Zeboim kin iggum ndigsi.
19 Ei nijam dima ne mben Israel ibon ide tukan ngkimom nitu hi bi lewo mben Filistin ice tut gima mben Israel ibon ide simeda kin micim bi. 20 Leu gima rino suar mben Israel yahara mben Filistin leu binhyepo isien ide ngkimom nibiwim dihyei kin pacul kin oi kin singau koi. 21 Igo nibok nok nimeng ngwoi gom gau nisien oi gom kin tom mem nibihyen kep sapiti ba, nimeng ngwoi can gau nisien ngkimom di nibiwim dihyei kin pacul nibikkin dihyeiti. 22 Gima rino njap dino ide siceu ihwen yok ei Mikhmas dima lene tentara Israel nindigsi ikrau simeda kin micim ei indati bi noro Saul kin Yonatan he.
23 Mpe dima lene nibou pran Filistin pinak nide tentara nimpung gom ug ei nitinggoisi Mikhmas leu binhyepo igya ser.