10
1 Lene Samuel hit mini zaitun ampou gom bikiber ei Saul nibou nggram him leu api mei noni bipai binoni <<TUHAN ta nani nok nibou ndig mem Nide limwa di mben Israel. Anyeng mitak kep Nide limwa nya ba, anyohou yok leu ide siceu di isibut nya yahagom. Mun di bindo tut gi Noni ta nani nok nibou ndig mem Nide limwa nya rinok gini. 2 Tirigi akes da ei ba, ambut lene aum pinai nya ibou can dideu Rahel nijui dip ei Zelzah ei keret Benyamin de hanjop nsi. Yoni mipai bina bipia tungwatu nya ingat keledai po jinggok ser pima tu. Apino acig mikrau ningon tut keledai nya bu bi noro mikrau ningon tut nani bu binggok puig mem gima ngat angat hanyen bu.>> 3 Samuel pai <<Tirigi ambut kikau ug bipek biei nindig gom di ipigig sut ei Tabor leu api aum ibou ningai di itin ei mem ibon midut nindig mindhe bak TUHAN ei minu ndig Betel. Igom mijem nide kambir nimien nya ningut ningai lene igom mittei roti nindak ningai lene igom mibiang minai tut aigmui mindhe ngkek di ba anggur ningei joti. 4 Yo dima mipigo na leu lene mikwas roti nindak can tut na. Lene suar ayai igbit ingon kanti dima. 5 Lene ambut kikau ug bipek Allah de nungug tou Gibea leu api angat prak meng yati di mben Filistin ide. Tirigi aug krau dimbou hui ei minu dima lene aum nabi nya nimpung gom di sindi ijuk kwei leu nimbar hum dok ei nungug tou dima. Yoni mikek nggong nya kin ndug nya kin porei nya kin nggong mbrei nya tirigi ipri-pri nyen ba, imbos-hi-mbos. 6 Lene Allah Ninnei mijuk kros kwei ei angonti bibindei ba, apri-pri nyen ba, ambos-hi-mbos bit yok ba, lene Noni mibindei nani nok no di miyai ningon di nijep bu ri. 7 Tirigi mun dini yok hagom pek kep mem na lene ma ayai igbit angon kanti hak ug lewo Allah ningat rin bit na. 8 Ma ambut bibie leu da ug ei Gilgal leu api miduum na ei sirima leu binhyepo dibon midut nindig mindhe titut kep humti kin midut nibiyai ningon kwes kin Allahti cem. Suar amem kep ser ditau kep nati ei sirima kikau mem njap muhwindacan bibou dihwou pingok angonti tut ade midyai nya ug e.>>9 Tirigi Saul sindi kes Samuel leu bimbut lene Allah bindei noni binok no di yai ningon di nijep bu. Leu api mun po Samuel pai sut binoni pima hagom pek kep mem noni ei njap gom dima. 10 Mpe dino Saul kin awak dima yuug krau Gibea lene nabi nya nimpung gom yuum noni. Lene Allah Ninnei juk kros kwei ei ningonti ba, noni pri-pri nyen ba, mbos-hi-mbos bit yok. 11 Tirigi yo di ikan tut noni kin niyai kepti nya ingat mun dima yok lene ihig yam <<Mindei rindei Kish nipmot i? Noni luei ningonti binok no di nabi e?>> 12 Mpe dima lene timiei minu dima gom hig ser yok <<Notou mem nabi nindigsi dima yok i? Icig bat nya inyeng tou nya i?>> Apino no dima nipaisi dima rinok nitriti mem nihyet nibiti ninda di pai <<Saul cem luei ningonti binok nabi bu e?>> 13 Tirigi Saul kes hon bipri-pri nyen ba, mbos-hi-mbos bu bi lene noni kui biya kui nimbar hum dok ei mbigdip dima.
14 Lene Saul nipmum ngat noni kin awak dima ei sirima bihig ser yok <<Jikwei leu hantou i?>>
Leu api Saul buhup <<Nikwei leu ninggok keledaisi ri. Tirigi ningat yok bi lene nuug cem kep Samuel.>>
15 Leu api nipmum hig ser noni bu <<Gi nok lene Samuel pai mindei bije i?>>
16 Leu api Saul buhup <<Noni pai binye bipia hiter ngat keledai pima yok tu.>> Saul pai nok noro noni mbot kep tut gi po Samuel ta noni nok nibou ndig pima bak nipmum bi.
Mben Israel idimig Saul ei nok ide nibou ndig
17 Lene Samuel hig mben Israel yahagom kwei ba, imbus yam ei Mizpa. 18 Lene pai biyok <<TUHAN di nok je di mben Israel jide Allah pai <Dibuwak je kwei leu minu Mesir ba, diteu je bijingwes ngun leu mben Mesir kin ngkiai nya nindigsi di ico kep je indati tu. 19 Dinyeng tak kep je ba, diteu je leu mun di cut igkep je kin mun di buhun tak je bijingwes ngun tu. Noro tini bu lene jikou sut Da ba, jisuar jide nibou ndig gom. Nna ba dice tut jingon kanti dima. Gima rino ma jahagom jikwas yam bit leu nok jide keret kin jide pung di jintun him nya cem leu api jikwei ya ei TUHAN Noho bei.> >>
20 Lene Samuel hig bibikwop keret dima yok bikwei ya ei Allah Noho bei sindam leu api Allah ndo keret Benyamin. 21 Lene Samuel nduk bibikwop nibou igbei nsi nya di intun Benyamin him yahagom bikwei ya bibie leu api Allah ndo nibou igbei nsi di ninyeng Matri bitut nide limwa nya. Lene pinai nya di itig mbier tut Matri ikwei ya bibie leu api Allah ndo Saul di Kish nipmot. Lene nide bat nya inggok ser Saul noro ningat rin srig ikieti bi. 22 Apino ihig ser TUHAN <<Saul ningat rin ei mpia ttou nsi dini e?>>
Lene TUHAN buhup <<Saul ku no nyahan bigwam nding jide ndigban di jo keyam nya.>>
23 Gima rino yoni idor biyuug buwak Saul kwei. Tirigi noni kwei ya ei yoho bei lene ingat lo, nintig bou jei ba, nindigsi nya yahagom ibou nggram him jei dor njiriek Saul ninghat dip bi. 24 Lene Samuel pai biyok <<TUHAN ndo no dini nok jide nibou ndig. Lewo nye di nindigsi yahagom hi noyam kin noni bi.>>
Pai nok lene tungwatu nya yahagom imbos-hi-mbos bipai <<Na di nibou ndig e, ma ayaijo ninno ug o!>>
25 Lene Samuel pai mingat tut nibou ndig ninyeng tak kepti kin nide midyai nya cem bipas kep hagom ei srat gomti bikon srat dima ei Allah de ninsi di kwes. Lene noni kes tungwatu nya yahagom ba, ingkwei hanyen ug ei ide ig nya. 26 Saul cem ngkwei hanyen ug ei Gibea lene yo di mimbri kui ingkek ibou poi igya kui noni bit leu TUHAN nibie tut yoti. 27 Noro yo di ingkek ndok nya ibou poi ipai biyam <<Notou no dima mimpu nye i?>> Lene ingwes pri gau noni apino igyai munkwas hi bak noni bi. Noro noni bon nonti nok no di kan tut bi.