Tentara Amon icut bak Saul nya
11
1 Bed gom bu lene Nahas di nibou ndig mben Amon njei siceu tut nide tentara ug ei minu ndig Yabesh ei hanjop Gilead. Lene igyon ttai minu dima. Leu api pinai di ibong ei Yabesh ipai bak Nahas <<Gino akwam minggwen bit nye ser lene minice tut anyeng tak kep nye.>>2 Noro Nahas buhup <<Midikwam minggwen bit je ser tug hon nisinati gom ngat nok gini. Midiket jahagom jiyai njep nite jinda com leu. Leu binhyepo dibinim kep mben Israel yahagom.>>
3 Lene nibou Yabesh nya ipai binoni <<Ma abet angon ei njap muhwindacan bibou nitri tut mun di micut igkep nye dini bidem minu Israel nisurti-nipekti ug e. Gino hi kwei mpu nye bi lene minicut bak nani hak ug.>>
4 Lene yo di intek tut nihyet dima ikwei krau Gibea po Saul de minu pima. Tirigi itri tut mun di buhun dima lene timiei yahagom ingon cut leu bipim kui jei sut. 5 Jam dima ne Saul sindi jem nide sapi nya kwei leu niyai midyaisi nya bihig ser yok <<Jinggon i? Nggon rino jahagom jipim nok i?>> Lene indat kep nihyet di buhun po mben Yabesh itri tut biyok pima binoni. 6 Tirigi Saul miap tu lene Allah Ninnei kui noni ba, ningon a tut nindig bibor. 7 Lene noni bui sapi ningut can bidigo ninghui kukiau lene yai mindhe ninggriet dima bak yo di imbut tut nya ba, intek gimahap tut bidem minu Israel nisurti-nipekti hagom. Lene Saul sok nihyet ei yok dip bipai <<Tungwa tou rino njei siceu bit Saul kin Samuel bi lene mun di nok gini micut igkep nide sapi nya.>>
Gima rino tentara Israel ittin tut hukum di Allah mikes ei yok dip apino yahagom induk yam bingwig kep Saul. 8 Leu api noni nyohou kwop imangti ei Bezek. Tentara Israel ibou sribu sratus ningai ba, tentara Yehuda ibou sribu ningot ningai yahagom idem yam ei. 9 Lene Saul nya ipai bak yo di ikwei leu Yabesh pima <<Ma jipai bak mben Yabesh bipia njap di hyep nipou tirigi mpia huk pijum bigyo lene mijingwes ngun.>> Tirigi yo dima ingkwei hanyen bitri tut nihyet dima bak mben Yabesh lene yahagom ingon nggan-triot kei. 10 Leu api ipai bak nibou Nahas <<Njap di hyep ug api nikes nyenti ei jindati ba, jibibon nye bit leu jingon kanti hak ug.>>
11 Njap di hyep bu lene Saul kwas nide tentara ei nimpung ningai leu api injei bihwen mben Amon mem njap tekti. Nipou mpia huk pijum bigyo lene ibindei timek ide siceu nya yahagom bingwig. Lene igom-gom di ingwes ngun intek gimahap ba, tungwagom nang nide tungwagom nang nide lene nok.
12 Lene mben Israel ihig ser Samuel <<Ando igbit yo po ikou sut gima Saul ninyeng tak kep nye pima ba, akes yok ei nyeni nindati leu api niyai nimai biyok hak ug.>>
13 Noro Saul srep bipai <<E bi! Ma jikes hukum nimai ei yo dima dip njap di ammani au. Lewo TUHAN teu nye di mben Israel mem njap di ammani ba, ingwes ngun tu.>> 14 Lene Samuel pai biyok <<Jikwei ba, yahagom ingkwei hanyen ug ei Gilgal leu binhyepo ita Saul nok nibou ndig mbigom kin bu.>> 15 Gima rino yahagom ingkwei hanyen ug ei Gilgal mpia di kwes kei pima ba, ita Saul nok nibou ndig. Lene ibon midut nibiyai ningon kwes kin Allahti leu api Saul kin nide limwa di mben Israel yahagom ibon pesta kep mun di pek kep mem yok.