Saul um Samuel
9
1 Timiei Israel di nyeng bibor Kish no rinaha ba, noni ntun keret Benyamin him. Nicig ninyeng Abiel ba, nignyon ninyeng Zeror. Nide bat nya imbier kim Bekhorat ba, Bekhorat nimbier kim Afiah. 2 No dini yai nipmot Saul di pinjoi ndig di ubbu bibor. No dini nintig bou jei bibor dor njiriek mben Israel nindigsi nya yahagom.3 Mpe di gom ne Kish de keledai nya ningut poi israwir. Gima rino noni cuk Saul bipai <<Ma nani kin awak gom juug nggok ser keledai nya di israwir pima.>> 4 Lene yo cin dima imbut bidem nungug him ei hanjop keret Efraim ide kin hanjop Salisa cem lo, ingat keledai pima bi. Lene imbut kikau ug ei hanjop keret Benyamin ide cem noro ingat ide keledai hi bi. 5 Lene imbut kikau ug bipek hanjop Zuf leu api Saul pai bak awak pima <<Nna ba singkwei hon minu dini lewo mbigom dicig mikrau ningon tut keledai nya bu bi noro mikrau ningon tut sa bu.>> 6 Noro awak dima srep bipai <<E bi! Allah de awak gom no bong ei minu dini ba, timiei nya yahagom inggei sut noni lewo mun di noni tri tut hagom dem igbit nipaisi. Suug ngat noni leu binhyepo mimbot kep bisa tut mpia dino keledai nya israwir eisi a.>>
7 Lene Saul buhup <<Gino suug ngat noni lene sipwoi mun mindei di sikwas tut noni i? Side njita ngwig leu sa tu ba, sehei he. Gima rino siyai mindei bak Allah de awak dima i?>>
8 Lene awak dima pai <<Mitiei perak nimien gom ngat no jo ei minai deti a. Midiyai mitiei dima binoni leu binhyepo noni mindo igbit bisa tut mpia dino keledai nya israwir eisi a.>>
( 9 Ei nijam dima ne tungwatu nya ijem no di nabi ninyeng hi no di kan huk mindur kan cem. Gino tungwagom hig ser Allah tut mun nyeng hi lene noni mipai <<Jikwei ba, yuug cem kep no di kan huk mindur kan.>>)
10 Lene Saul buhup <<Igbit ri! Suug ngat noni.>> Gima rino yuug ei minu dima binggok ser Allah de awak. 11 Tirigi ikui mboi gom di kui ug ei minu dima lene yoni yuum sop gwam nitta pilei nya ibou poi di ijuk kwei ba, itau minyei. Leu api Saul nya ihig ser yok <<No di kan huk mindur kan ningat rin ei minu dini e?>>
12 Lene ibuhup <<I, ningat rin ba, nogindini no bie joho ma ug. Gino jibrim jimig lene mijahatap noni. Noni sindi kwei krau lewo timiei minu dini mibon midut nindig mindhe kep hum ei nimbar hum dokti mem njap di ammani. 13 Timiei minu dini ibon pesta noro yoni migyem njita bigyo bibou Allah de awak dima kwei kes ninda ei mindhe dima dip bingat nadi kep nipou ug e. Ma jimbut sindem ba, jahatap noni nipou tirigi noni yem njita bigyo. >> 14 Lene Saul kin awak ikui ug ei minu dima. Tirigi sindi ikrau dimbou heisi lene ingat lo, Samuel hei kwei buug ndam mpia di nimbar hum dok joti ri.
15 Annani ne TUHAN pai bak Samuel nipou su, 16 <<Njap di hyep bu mem mpia di nok gini lene midipinak tungwagom leu keret Benyamin hwou ngat nani. Ma ata noni nok nibou ndig mem Ditde limwa nya leu api noni miteu yok bingwes ngun leu mben Filistin indati. Lewo dingat bipia mun di buhun bibor cut igkep yok tu ba, yahara Da leu binhyepo dimpu yok.>>
17 Hammi tirigi Samuel ngat Saul bou niyai him rino TUHAN pai <<No dima ne no po dimbot kep tut bina annani pima ri. No dima ninyeng mitak kep Ditde limwa nya.>> 18 Lene Saul ug ngat Samuel tirigi noni ya kui dimbou heisi bihig ser noni <<No di kan huk mindur kan bong tirigi tou i?>>
19 Lene Samuel buhup <<Dani ne no di kan huk mindur kan ri. Ma jibie doho hwou ug ei mpia di tungwatu nya ikuk yok bak TUHAN eisi ei mbigdip. Njap di ammani lene ma jahacem jiyem njita bit da leu api njap di hyep bu midibuhup mun di jihig ser da tut nya hagom leu api midikes je bijingkwei hanyen. 20 Noro tut keledai nya po israwir aningai pini jug ne ma jikrau jingon tut bu au lewo ingat keledai dima yo tu. Noro Allah miyai mun di bon ninyeng mem mben Israel yahagom bak nani kin yo di intun acig him ug ri.>>
21 Noro Saul buhup <<Dimbier kim keret Benyamin keret di mien bibor ei mben Israel ikieti ba, dide bat nya cem ibon inyeng bi. Nggon rino Andigpoi apai nok gima tut da i?>>
22 Lene Samuel buwak Saul kin awak dima ug ei nghim nsi di nindig bibor bikes yok bigwam kui meja bibie leu yo di nindigsi di inyeng jei nya ibou ningot ningai. 23 Lene Samuel cuk nibou mem yo di ikwen njita dima <<Ma ayai mikwau ninghui gom po diyok bit na pima kwei.>> 24 Gima rino no dima ug yai mikwau ninghui di kei bibor nok nindimuhum nghui bikes ei Saul noho bei. Lene Samuel pai binoni <<Angat i, gini ne mikwau ninghui po dibet ei mem na ri. Ma ayem ug! Dibet mikwau dima ei mem na leu binhyepo ayem njita bit nindigsi nya di igyem kep pesta dini.>>
Gima rino Saul yem njita bit Samuel mem njap dima. 25 Niabiati ijuk kwei leu mpia di ikuk yok bak TUHAN eisi lene Samuel nya indo nghim gom mem Saul ei ig bou ninjek dip,d 26 leu api noni bong ei sirima mem mmun dima.
Samuel ta Saul nok nibou ndig mem mben Israel
Njap bigyokti lene Samuel kui ug ei ig bou ninjek dip lene win Saul bipai binoni <<Akiju bidikes na ba, ambut ug ri.>> Lene Saul kiju ba, yahacem imbut leu ig bei dima. 27 Tirigi yoni yuug krau dimbou heisi di itu ei ngug tig lene Samuel pai bak Saul <<Ma acuk ade awak bipia noni mbut bibie leu sa.>> Gima rino awak dima mbut bibie leu yok leu api Samuel binut bu bipai bak Saul <<Ma aya ayati dini mbigom leu api midipai igbit Allah nihyet di Noni sok ei da dip bina.>>