Mben Filistin ipos TUHAN De Brua Gi Preu bimbut tut
4
1 Nijam dima ne mben Filistin injei siceu bikon pran bit mben Israel. Gima rino mben Israel yuug ei mpia di ikon pran eisi lene yohok ide prak meng yati ei Eben-Haezer. Noro mben Filistin yohok ide prak meng yati ei Afek. 2 Lene tentara Filistin ihwen mben Israel kros ba, ihwen yok sindem bibor apino tentara Israel ibou sribu bitai imai bingwig ei mpia dima. 3 Tirigi tentara Israel di ingwes ngun nya induk yam hanyen kwei ei prak meng yati lene ide nibou pran nya ipai biyam <<Nggon rino TUHAN sindui sut mben Filistin di ihwen nye bingwig ei njap di ammani i? Jikwei ba, ingkwei hanyen ug ei Silo ba, igyai TUHAN De Brua Gi Preu kwei leu binhyepo Noni miya tut nyeb bibindei ba, nye di mben Israel ingwes ngun leu ide siceu nya indati.>> 4 Gima rino ipinak tungwatu nya bingkwei hanyen ug ei Silo leu api yo dima ikon Brua Gi Preu di nok TUHAN Di Sindem Bibor Nide banggo mbrei di dia-diau kei kwei. Lene Eli nipmot bat cin di Hofni kin Pinehas cem injei bit Brua dima kwei.5 Tirigi Brua Gi Preu dima ttau kep yok lene tentara Israel imbos-hi-mbos nindig bibor bibindei ba, dihyei ugwa-kwei. 6 Tirigi mben Filistin imiap ighyet dima lene ihig yam <<Mbenjen! Mben Ibrani imbos-hi-mbos ei prak meng yati tut nggon i?>> Tirigi mben Filistin ikan tut bipia TUHAN De Brua Gi Preu kwei krau mben Ibrani ide prak meng yati tu lene, 7 ittin tut nindig bibor bipai biyam <<Ide kwar di ikuk yok bak ningat rin bit yok ei prak meng yati! Ayo! Buhun bibor mem nye o! Mun di buhun nok gini hi cut igkep nye kwei bipek ammani kep bigyo! 8 Tou rimiteu nye ba, ingwes ngun leu yo dima ide kwar di ikuk yok bak di isindem bibor dima i? Ide kwar di ikuk yok bak dima yok ikon pran bit tentara Mesir ei iggum ndigsi pima bibindei ba, itimek tu! 9 Je di mben Filistin e, ma jibrim jingkek ba, jikon pran bit yok sindem bibor. Gi bi lene nyeni yahagom minok awak mem mben Ibrani bit leu nok yoni inok awak mem nye nipou pima. Ma jibrim jingkek ba, jikon pran bit yok sindem bibor!>>
10 Gima rino mben Filistin ikon pran bit mben Israel sindem bibor bibindei ba, tentara Israel inang kikau ug ei ide ig hanyen. Noro ibou sribu ningot ningai imai bingwig ei puig sinon. 11 Lene mben Filistin ipos Allah De Brua Gi Preu bimbut tut. Lene Eli nipmot bat cin di Hofni kin Pinehas yahacem itug ndei nimai bit tentara nya.
Eli niyaijo ningwig honti
12 Lene tungwagom di nimbier kim keret Benyamin dor kikau kwei leu mpia po tentara ikon pran bit yam pima bikwei krau Silo ei njap gom ndia. Lene noni rik nide sinsun birik-ta bikam dihyei ei nibou nggram him nok bindo bipia ningon ngguk bibor. 13 Mpe dima lene Eli gwam nigwati bimmou hak lewo krau ningon tut Brua Gi Preu bicem kep puig ser nitausi. Lene no dima kwei krau bipai sut mun di cut igkep tentara bibindei ba, tungwatu nya di idem yam ei yahagom yahara ba, ighyet kui yam lewo ittin tut nindig bibor. 14 Lene ighyet tibim kwei ei Eli nitingou nsi leu api noni hig ser tungwatu nya <<Nggon rino jahara nok i?>> Lo bi lene no dima brim nimig kwei bitri tut mun di buhun dima bak noni cem. 15 Mpe dima lene Eli de njap ug ei ari bingwam ningot muhwindatai ba, muhwindaningai tu ba, niyai mmui su. 16 Lene no dima pai bak <<Dingwes ngun leu pranti dima bididor kikau kwei njap di ammani.>>
Lene Eli hig ser noni <<Dipmot ndia ug o, mindei cut igkep je i?>>
17 Lene noni buhup <<Tentara Israel inang leu mben Filistin lewo yo dima ikon pran bit nye sindem bibor ba, nicut bak yoni tu. Nok gima cem apmot bat cin di Hofni kin Pinehas nya itug ndei nimai leu api mben Filistin ipos Allah De Brua Gi Preu leu nye bimbut tut tu.>>
18 Tirigi no dima pai sut Brua Gi Preu lene Eli tti kros leu nigwati bibong simiak dimbou ngug tig hui dima. Noni wer andig-ndau su ba, ningut nindig bibor cem. Gima rino noni cut ba, ninggibi dahat bimai. Noni nok nibou mem mben Israel kikau mem ari bingwam ningot bitai su.
Kibom Pinehas nimaisi
19 Mpe dima lene Eli nipmot Pinehas nitnem nghop tu ba, son dideu nicunti mem ninghim dut. Tirigi noni miap tut mben Filistin di ipos Allah De Brua Gi Preu bimbut tut kin nipmang kin nijjep nya imaisi lene ninghim dut kros bisrek tut nimunggwom. 20 Lo, duhug-duhug nyen bidideu niyaijo ningwig honti. Lene sop nya di yahati tut noni ipai bak <<Ma abrim angkek! Asrek tut nipinai ri!>> Noro noni buhup ighyet ba, miap cem bi. 21 Lene noni jem nipmot ninyeng Ikabod bipai <<Allah De nikei-kau-keisi pror leu Israel tu.>> Nipaisi dini ndo tut Brua Gi Preu di ipos kin nipmang kin nijjep imaisi ri. 22 Noni pai <<Allah De nikei-kau-keisi pror leu Israel tu lewo ide siceu nya ipos Nide Brua Gi Preu bimbut tut tu.>>