Brua Gi Preu jo ei mben Filistin ikieti
5
1 Niabiati tirigi mben Filistin igyai Brua Gi Preu leu yok tu lene ijo leu Eben-Haezer bimbut tut ug ei minu ndig Asdod. 2 Leu api ikon Brua dima ug ei ide ig di nok nibousi mem ide kwar Dagon. Leu lene itas Brua Gi Preu bijo simiak kwar Dagon di ikuk yok bak. 3 Njap di hyep bu lene timiei Asdod nya icem kep ide kwar Dagon mem gwam ntuisi bingat lo, kwar dima tti ug ei dihyeisi biba ningwak bikik dihyei ei Brua Gi Preu nuhui a. Gima rino ikon Dagon kui bitas bijo nijoti hanyen. 4 Njap di hyep bu lene idem yam mem gwam ntuisi bingat lo, kwar Dagon tti ei dihyeisi ei Brua dima nimig him hanyen tu. Noro tini bu ne Dagon nibou kin ninda hacem dahat leu su ba, jo keyam ei dimbou huigya. Lene kwar nititnon jo ter. ( 5 Leu gima rino yo di inok imam mem Dagon kin timiei Asdod di ikuk yok bak nya yahagom ico dimbou hui dima bi noro ipri gau he kwei bipek ammani kep.)6 Lene TUHAN kes hukum di buhun bibor ei timiei Asdod dip bibindei ba, yoni kin timiei minu di gahai dima kou yahagom itug ndei ningkek dip dimaham bidem ingkek dip hagom.c 7 Tirigi ingat mun di cut igkep yok dima lene ipai biyam <<Mben Israel ide Allah kes hukum ei nyeni dip kin Dagon di ikuk nye bak dip cem tu. Ma isindui sut Brua Gi Preu dima bijo ei nyeni ikieti bu au.>> 8 Gima rino ihig nibou ndig mben Filistin dima ibou muhwi yahagom kwei ba, ihig ser yok <<Ninggon ndei mben Israel ide Allah Nide Brua Gi Preu pima i?>>
Lene nibou ndig dima yok ibuhup <<Ma jikon Brua dima bijittei ug ei minu ndig Gat.>> Gima rino ikon Brua dima bimbut tut ug ei mben Filistin ide minu ndig hiter ei Gat. 9 Noro niabiati Brua dima ug krau minu dima lene TUHAN kes hukum ei yo dima cem dip bibindei ba, yahagom ingon tai-tai bou nindig bibor. Lewo munggwom timiei nya kin andigpoi nya cem ei minu ndig dima itug ndei ningkek dip dimaham bidem ingkek dip hagom. 10 Gima rino imbut tut Brua Gi Preu ug ei mben Filistin ide minu ndig hiter bu ei Ekron. Noro tirigi timiei Ekron ingat lo, Brua dima kwei krau ide minu lene yahara <<Ayo! Ikon Brua Gi Preu dima kwei bibindei ba, nyeni cem yahagom imai ug ri!>> 11 Lo bi lene ihig nibou ndig mben Filistin dima yahagom kwei bipai biyok <<Ma jipinak Brua Gi Preu dima hanyen ug ei nijoti ei Silo leu nhyema mibindei ba, nyeni kin ide bat nya itug ndei nimai bi.>> Ipai nok lewo timiei minu ndig dima hagom ingon tai-tai bou nindig bibor tut hukum di buhun bibor di Allah kes ei yok dip. 12 Gi hi di itug ndei nimai bigyo itug ndei ningkek dip dimaham pima bidem ingkek dip. Gima rino yahagom yahara ide kwar nya leu binhyepo ikwei mpu yok.