TUHAN mbrap bit Samuel
3
1 Ei nijam di Samuel mahan haigtu bigyo di ya kui Eli biyai midyai mem TUHAN dima lene TUHAN mbot kep tut ningon kanti bak Nide limwa nya bi lene ndo ningat-hi-ngat gom-gom he bak yoni. 2 Mpe di gom mem nijam di Eli niyai mmui ba, bong nide nghim nsi, 3 lene Samuel bong ser Brua Gi Preu ei Ig Di Kwes ba, mini no njeng kikau yo lewo son dideu ha yausi tu. 4 Nok rino TUHAN hig Samuel kros. Lene noni buhup <<Andigpoi e, da rini!>> 5 Leu api noni dor ug bingat Eli bipai binoni <<Ahig da kwei tut nggon i?>>Noro Eli buhup <<Da dihig na kwei bi. Aug bong abongti hanyen hak ug.>> Gima rino Samuel ngkwei hanyen bibong nibongti.
6 Lene TUHAN hig noni <<Samuel e!>> Gima rino noni kiju hanyen buug ngat Eli bipai binoni <<Ahig da kwei tut nggon i?>>
Leu api Eli buhup <<Dipmot ndia ug o! Dihig na kwei bi. Angkwei ba, abong abongti hanyen hak ug.>>
7 Hon kep njap dima ne TUHAN mbrap pijum bit Samuel bigyo. Gima rino ningon kiowi tut nihyet di hig noni pima.
8 Tirigi TUHAN hig noni nimbiningai bu lene noni kiju buug ngat Eli lene pai binoni bu <<Ahig da kwei tut nggon i?>>
Nok rino jo nibreisi mem Eli bipia TUHAN Nonti hig mot dima. 9 Gima rino noni buhup <<Nna ba angkwei ba, abong abongti hanyen. Gino amiap no di hig na nihyet hanyen bu lene ma abuhup <TUHAN e, apai bak Ade awak di dani lewo dingig ditingou mem ahyet.> >> Lene Samuel ngkwei hanyen bibong nibongti.
10 Lene TUHAN kwei ya niyati bihig noni nok nipou pima <<Samuel e! Samuel e!>>
Lene Samuel miap bipai <<TUHAN e, apai bak Ade awak di dani lewo dingig ditingou mem ahyet tu.>>
11 Lene TUHAN pai binoni <<Mpe di gom ei nidipti bu lene midibindei ba, mun di buhun bibor micut igkep mben Israel apino tungwa tou rino miap tut gima ningon mitai-tai bou sut. 12 Ei nijam dima lene midibindei ba, hukum di ditri tut ei mem Eli kin nide bat nya ei nimbie him kikau ug bipek ningwigsi kep micut igkep yok. 13 Dindo brei binoni tu bipia midikes hukum ei yok dip bijo ninno bijo kikau drek dip nipmot bat cin di ighyet wer mpiahi tut Da. Igyai munti di kinei dima jo nibreisi mem Eli tu noro noni ggai ser yok tut bi. 14 Gima rino disimbot dat tug hon neheng bak nide bat nya bipia bit bon nibon midut nindig mindhe tut ide sisar di nindig bibor dima kin mun di ikwas tut Da mibindei ba, dikos ser ide sisar bi sren.>>
15 Lene Samuel bong nibongti binjap kep leu api kiju bikau dimbou leu TUHAN De Prak Meng. Noro ningwes mien ba, ttin tut gima tri tut nihyet kin ningat-hi-ngat dima bak Eli. 16 Leu api Eli hig noni <<Samuel dipmot na e!>>
Lene Samuel miap bipai <<Andigpoi e, mindei i?>>
17 Leu api Eli hig ser noni <<Apai igbit TUHAN nihyet bida hak ug. Ma aku nihyet dima gom bijo nding leu da au. Leu gi nok lene Noni mikes hukum ei nani dip.>> 18 Gima rino Samuel pai sut hagom brei bak Eli biku mun nyeng gom ei ningonti bi. Leu api Eli pai <<Noni ne TUHAN rin ba, miyai hagom bit leu Nonti ningon kanti mem nye.>>
19 Lene TUHAN ningat rin bit Samuel kikau bindig lene bindei ba, mun di tibim ei Samuel nuhui him nya pek kep dem igbit nipaisi dima. 20 Gima rino mben Israel bidem minu dima nisurti-nipekti hagom ikan tut bipia Samuel ne TUHAN de nabi ri. 21 TUHAN ttau kep mben Israel ei Silo kikau bindo ningon kanti biyok tug hon Samuel. Bikwop mpe dino Samuel tri tut TUHAN nihyet lene mben Israel yahagom ingig itingou mem.