Hana ngat nadi
2
1 Lene Hana ngat nadi bipai,<<Allah bindei ba, dingon llei bibor. Nide niyai munti nya bindei ba, dingon nggei-hi-nggei. Diba dingon di nggan-triot pa ndip ditde siceu nya lewo TUHAN mpu da nijit tu.
2 Tungwatu dihyeisi dini hi di ningon kwes-kwau nok TUHAN bi! Nongkom ya srak ko hagau nye.
3 Je di tungwatu nya e, ma jinggei-nggwang tut jenti ba, jingon jei bu au. Ma jikimut juhui ser nhyema jimbrap kinei au. Lewo TUHAN ningon dorti tut mun nyeng hagom. Noni gwam nok nikei mem tungwatu nya igyai munti nya hagom.
4 Tentara di mimbri kui ingkek nya ide hampiap dahat tu noro yo di inghuisi jet nya ikum ei ide nisindemti bu.
5 Tini bu lene yo po igyem njita ninyeng hagom bindei yo tu pima inggok ser no di mindo midyai biyok leu binhyepo ibitug ndei imuhup ba, ibipek njita. Tini bu lene yo po inggum nipou su pima igyem njita nok gi dem bindei yok tu. Sop di pijet srek tut nimunggwom bat nya ibou muhwindacan noro sop di bon nimunggwom bat nya imang gwam binongkom lewo yahagom ingwig leu noni tu.
6 TUHAN yai nimai bak tungwatu nya ba, win yok hanyen leu imai eisi cem. Noni pinak yok ug ei yo di imai su nya ikieti leu api sindem mem gima kon yok hanyen kwei leu mpia dima.
7 Noni bindei ba, bihi yuhui mbum lene bihi inyeng ba, bihi ibon inyeng bi lene bihi inyeng jei.
8 Noni kon yo di yuhui mbum nya leu mun di bindei ba, ingon buhun. Noni brim yo di indwau nya leu mun di cut igkep yok leu api bindei ba, ihig isut bit yo di inyeng jei nya leu api igyai inyeng di jei apino hiter inggei sut yok. TUHAN ninyeng tak kep cou pmem ei dihyei nikiou nya leu api pai tes mun di jo ei ninjek dip eisi.
9 Yo di ingon gom nya igwam coi Noni apino ingon jo nyahan noro yo di isibut nya ipror hak ug ei nidinditi. Bit bon tungwagom hwen nide siceu nya bingwig tug hon nonti nide nisindemti kan bi.
10 TUHAN de siceu nya ittin nindig bibor apino mitug midut tug hon hukum di dem kep nok kru di nisu bong ei mpia-bbed him di Noni kes ei yok dip. TUHAN migwam nok nikei mem tungwatu dihyeisi dini hagom. Noni miyai nisindemti bak nibou ndig di Noni ta ei su. Lene mibindei ba, nibou ndig dima nide siceu nya yahagom micut bak noni.>>
11 Lene Elkana nya ingkwei hanyen ug ei minu ndig Rama. Noro Samuel di Hana nipmot no bong ei Silo ba, ya kui imam Eli biyai midyai mem TUHAN.
Eli nipmot bat nya
12 Mpe dima lene Eli nipmot bat cin igyai munti nya kinei bibor. Ingkek ndok tut TUHAN ningon kanti ba, 13 iba inyeng imam bibon mun bak mben Israel bit leu yonti ingon kanti cem. Lewo tirigi tungwagom mikwei bon midut nindig nide mindhe bak Allah lene imam mipinak nide awak gom tut hot nggram nindig di bon ninggwen ningai bingat no dima tirigi kwen mikwau ei yengti. 14 Lene awak dima ba hot nggram bidat mikwau leu api ket kindi-kindok ba, yai bak imam di niceu pima. Igyai nok gima tut mben Israel di induk yam kwei ei Silo bibon midut nindig mindhe-ndhe di ide nya bak Allah yahagom. 15 Gima he bi lewo mpe hi awak dima mikwei nipou tirigi idigo mikwau kin ninggwo leu yam bindig ninggwo kep hum bigyo lene mikak tut no di mikwen mindhe dima bipai <<Adigo mikwau ninghui hi mem imam leu binhyepo noni bam mem nonti lewo noni kou sut mikwau di jikwen ei yengti ba, hara je tut mikwau di ngun he.>>
16 Ne gino no dima buhup <<Nnaba siyai igbit Musa nipingok sati ba, sindig ninggwo kep hum nipou ug e leu api adigo nikenti bit leu angon kanti.>> Gino buhup nok lene awak dima srep bipai <<E bi! Ayai hak bida nogindini. Gi bi lene midipos mikwau dima kindi-kindok leu na ug ri.>>
17 Gima rino Eli nipmot bat cin ibon sisar di buhun bibor ei TUHAN niyai him lewo ibimangkrei mun di mben Israel indig ei nimbar hum dokti bak Noni.
Samuel bong bit Eli ei Silo
18 Mpe dima lene Samuel mahan bigyo lo, yai kep midyai nok awak mem TUHAN. Noni juk sinsun nibon midut di nijei di iba minyahas linen binap. 19 Nipmem nap sinsun dut di jei gom bipwoi kwei mem noni bikwop ari bingwam sindam tirigi noni bit nijjep Elkana ba, ikwei bon midut nindig mindhe bak Allah ei Silo. 20 Bikwop mpe dima lene Eli ngat nadi tindei mun di kei mem Elkana kin Hana leu lene pai bak Elkana <<Handei kon ba, TUHAN mibindei ba, atnem miyai amunggwom bat nya hi kin bu bina biya luei Samuel di jidimig ei mem Noni pima nohoti.>>
Gima ngwig lene Elkana nya ingkwei hanyen ug ei itimieisi,
21 lene Allah njei mun di kei bak Hana. Noni yai nipmot bat nya ibou ningai kin nipmisop bat nya ibou can bu. Lene nipmot mighumbou di Samuel pima mahan tu ba, yai kep midyai mem Allah.
Eli pingok nipmot bat cin ingonti
22 Eli ug wer andig su lene miap kep tut nipmot bat cin inghapti ninno Lewo ibibon mben Israel nok gi kinei bibor ba, icut tut sop di igyai kep midyai kui dimbou hui ei TUHAN De Prak Meng cem. 23 Gima rino noni pingok ingonti bipai biyok <<Tungwatu nya yahagom ipui kep jinghapti tut jiyai munti di kinei bibor bida ninno tu. Nggon rino jiyai nok gima i? 24 Dipmot bat jen, ma jibibon TUHAN de limwa nya kinei nok gima bu au. Yoni ipui kep tut jinghapti di kinei bibor! 25 Gino tungwagom bon sisar tut hiter lene Allah sindem mem gima ya hacan mem noni. Noro gino tungwagom bon sisar tut Allah lene tou risindem mem gima ya hacan mem noni i?>>
Pai biyok nok noro nipmot bat cin ijoi sut icig nipingok yokti dima bi. Gima hagom nok lewo Allah kos tut bipia miyai nimai biyok.
26 Noro Samuel mahan tu. Tuhan singat tut noni ba, tungwatu nya ijoi sut noni.
Nabi gom sok kep Eli tut hukum
27 Mpe di gom bu lene nabi gom ttau kwei bisok kep Eli tut TUHAN ningon kanti mem noni bipai <<Tirigi po ade pung Harun kin nide bat nya inok awak mem nibou ndig mben Mesir pima lene Da di TUHAN dindo Danti binoni. 28 Didimig nide keret leu keret mben Israel nindigsi nya hagom ei leu binhyepo igyai kep midyai nok imam mem Da ba, igya kui nimbar hum dok ba, indig kep biei nggrai di ui-gwang kei ba, ijuk sinsun efod gi bindo tut dingon kanti cem. Lene disindui sut yok bigyai mikwau ninghui ninggriet gom leu bikwop mindhe di tungwatu nya ijem kwei mem nibon midut nindig kep hum ei nimbar hum dokti hagom. 29 Nggon rino jidrui bou ngwak tut mikwau tirigi jingat mindhe-ndhe nya di dicuk Ditde limwa nya ibui mem nibon midut nindig titut ei nimbar hum dokti i? Eli e, nggon rino asindui sut apmot bat cin tut ingon kanti lene angkek ndok tut Danti dingon kanti i? Lewo asindui sut yoni idigo mikwau ninghui ninggriet di kei bibor kei hagom mem yonti igyem tirigi Ditde limwa nya ibon midut nindig ide mindhe-ndhe nya ei nimbar hum dokti bit leu nok dicuk yokti tu. 30 Dani ne TUHAN bidinok mben Israel ide Allah rin ba, dipreu ei mem jide keret nya nipou su bipia nani kin yo di intun nani him mijiyai kep midyai nok imam mem Da bijo ninno bijo kikau. Noro nogindini midiluei dingonti tut dipreu eisi pima ug ri. Hon kep ammani kui lene midijoi sut yo di ikuk yok biDa lo, midingon mpo tut yo di ingon mpo tut Da. 31 Amiap e, ei nijam di nidipti bu lene midibindei ba, pinai pilei nya di intun nani him kin pinai pilei di itig mbier tut na yahagom mitug ndei nimai tirigi ipilei yo. 32 Mpe dima lene angon buhun bibor ba, angon kinei sut mben Israel nindigsi nya tirigi dinjei mun di kei nya hagom bak yoni bou ayai him lo, yo di intun nani him imai tirigi ipilei yo. 33 Noro midibindei ba, tungwagom ngat di ntun nani him mimai bi leu api noni miyai kep midyai nok imam mem Da. Mbro nok gima lo, no dima mporo niyai mitu leu api ningon dahat leu kikau ug bipek niyaijo ningwig honti. Lene ade nintun him yamti di bram yam nya nindigsi yahagom mimai nok nimbiam. 34 Apmot bat cin di Hofni kin Pinehas yahacem mitug ndei nimai noyam mem njap gom ngat ba, gima ne bindo tut bipia dihyet dini hagom ne nijit ri. 35 Lene mididimig imam di ningon gom di bit leu dingon kanti ei mem Da. Midibindei ba, imam nya mintun noni him sindam leu binhyepo igyai kep midyai imam nya ide ei nibou ndig di didimig ei su noho bei. 36 Noro tut ade nintun him yamti di bram yam nya di ingwes ngun lene suar yahara imam dima tut mitiei kin njita bipai binoni Ma asindui sut ba, dimpu imam nindigsi leu binhyepo dibiyai njita poi mien bidiyem kep dinggumti e?>>