Mben Israel ikwei krau Nungug Sinai
19
1 Lene mben Israel ikwei krau iggum ndigsi Sinai mem bed gi niningai ba, njap gi nigom niabiati ijo leu minu Mesir. 2 Yahagom ijo leu Rafidim ba, yuug krau iggum ndigsi Sinai leu api yohok ide prak meng yati ei Nungug Sinai nikiou. 3 Lo bi lene Musa kui nungug dima buug um Allah.Lewo mpe dima lene TUHAN pai kwei binoni leu nungug dip bisok nihyet ei noni dip bak mben Israel di intun Yakub him, 4 bipai <<Jingat mun di Da di TUHAN dibibon bak mben Mesir bou jiyai him tu. Leu api dibuwak je kwei ndam Da ei sirini tug hon Ditde nisindemti di nindig bibor dem kep nok hacam krubri di kon nipmot bat nya ei ninyehei dip. 5 Nogindini gino jibit dihyet ba, jiyok ngon kep mun po dipreu ei mem je pima lene dinyeng mitak kep je. Dinyeng tak kep tungwatu dihyeisi dini hagom noro didimig jengkom bijinok dingon kieti nya. 6 Midipigig sut je mem Danti leu api jahagom mijiyai kep midyai noyam kin midyai di imam nya igyai kep.>>
7 Lene Musa juk kwei leu nungug dip binduk nibou nya yahagom kwei leu api tri tut nihyet hagom biyok bit leu nok TUHAN nicuk noti tu. 8 Lene mben Israel ikon ighyet nok gi gom bibuhup <<Nahagom nice tut binibit TUHAN nihyet hagom.>> Lene Musa ndat kep ibuhupti hanyen bak TUHAN.
9 Lene TUHAN pai bak Musa <<Mbigom midihwou mbrap bit na nding ei bumbuhui di ndok biborti leu binhyepo tirigi dimbrap bit na lene dihyet mitibim ei ade limwa nya yahagom itingou nsi apino hon kep ammani kui lene yoni miba ingon com na. 10 Nogindini ma aug ngat yo dima ba, acuk yok bipia njap di ammani kin njap di hyep cem suar itin ei mem gima ikuk yok biDa. Suar yahagom itot ide sinsun bipwoi, 11 leu binhyepo hon kep can lene yahagom itin ei su. Njap dima lene midijuk hwou ei Nungug Sinai dip leu api tungwatu nya yahagom mingat Da bou igyai him ei sirima. 12 Suar asrin ttai Nungug Sinai nikiou ser nhyepo tungwatu nya ipigau hanjop bi. Asok kep yok ngkiem ser nhyepo hi kui nungug dini ba, dideu cem bi. Gino tungwagom pigau hanjop dima lene jiyai nimai binoni hak. 13 Ma jingget noni au lo, jiba tig bihwen bimai ba, jiprindei bimai hak ug. Mun di disok kep je tut dini mem tungwatu nya kin mindhe-ndhe nya cem. Suar jiyai nimai biyok. Noro tirigi jimiap pun mbrei nimbi bong lene tungwatu nya yahagom ikui nungug kwei.>>
14 Lene Musa juk kwei leu nungug dip bicuk tungwatu nya bipia itin ei mem ikuk yok bak TUHAN. Gima rino yahagom itot ide sinsun bipwoi. 15 Lene noni binut bu bipai <<Ma jitin ei mem njap di can ba, hon njap dima ne ma jiyem njita tut yam au.>>
16 Ug ei njap gi niningai mem mpia tekti lene kru nindig bibor nisu bong ba, kigyei ninjeng srei lene bumbuhui di ndok bibor gom tau kros ei nungug dip dima lene tungwatu nya yahagom imiap pun mbrei nibimbi nindig bibor ei itingou nsi. Gima rino yahagom inghuisi mpig sut nindig bibor tirigi igya ei ide prak meng yati nikieti. 17 Lene Musa buwak yahagom kwei leu ide prak meng yati ndam Allah leu api yuug ya nyahan ei Nungug Sinai nikiou. 18 Hum mmup di ndok bibor nggai kep Nungug Sinai titut yam lewo TUHAN juk kwei ei dip dem kep nok huma. Hum mmup dima brou kikau dem kep nok hum mmup ei tong nsi apino nungug dima mun brim nindig bibor. 19 Lene pun mbrei nimbi bong nindig bibor. Musa hap niji bimbrap leu api Allah buhup nihyet tug hon kru di nisu bong. 20 TUHAN juk kwei ei Nungug Sinai dip bihig Musa kwei ngat Noni ei mbigdip. Gima rino Musa kui ug ei mbigdip dima. 21 Lene TUHAN pai binoni <<Ma ajuk hanyen bu ba, asok kep tungwatu nya ngkiem ser nhyepo hi pigau hanjop kwei bingat Dingat bi. Leu gino injiriek lene imang bibor mimai. 22 Gino imam bihi ikwei dideu Da lene suar ibon midut ser ma map kui yokti bi. Gi bi lene midikes hukum ei yok dip.>>
23 Lene Musa pai bak TUHAN <<Bit bon yo dima ikui kwei kan bi lewo acuk nye leu binhyepo nisrin ba, nibikrop ttai nungug dini nikiou ser binok mpia di kwes-kwau tu.>>
24 Lene TUHAN buhup <<Ma ajuk ba, abuwak Harun hanyen bikui kwei bit na. Noro ma imam nya kin ide limwa nya ipigau hanjop bikui kwei ndam Dani au. Gino ipigau hanjop lene midikes hukum ei yok dip.>> 25 Gima rino Musa juk kwei ei tungwatu pima yok ikieti bitri tut nihyet biyok bit leu nok TUHAN nicuk noti tu.