Allah Nicukti Ningat Simnai
(Ul. 5:1-21)
20
1 Lene Allah tri tut nihyet bipai, 2 <<Dani ne TUHAN bidinok jide Allah rin ba, dibuwak je kwei leu minu Mesir minu po jiyai kep midyai nok awak eisi pima.3 Harin dima jikuk je bak nung nya a. Noro ma jikuk je biDangkom.
4 Harin dima jibibon kwar di jikuk je bak bou jinda him di noyam kin mun nyeng hi ei mpia-bbed him kin dihyeisi kin gi jo ei minyeiti ei dihyei joua. 5 Harin dima jikuk je bak kwar nya a. Lewo Dani ne TUHAN ba, dinok jide Allah rin ba, dikou sut kwar di tungwatu nya ikuk yok bak nya. Mem yo di ingon kinei sut Da lene midikes hukum ei yok dip kikau ug bipek imunggwom bat nya kin ignyon bat-idrot bat nya kikau ug bipek ide nintun him yamti di bram yam nya nimpung gi niningai kin nibitai bu. 6 Noro midingon ngakei yo di ingon ngakei Da bibit dihyet yahagom kikau ug bipek ide nintun him yamti di bram yam nya ibou sribu-ribu bram yam.
7 Harin dima jindat kep dinyeng ugwai-gwai a. Lewo Dani ne jide TUHAN Allah rin ba, midikes hukum ei no di ba dinyeng bikek dip.
8 Suar jahati tut jide Njap Nigwam Kep Ninghuisi bikwes-kwau kei mem Da. 9 Lewo diyai njap nitindur muhwindagom bije mem gima jiyai kep jide midyai nya eisi. 10 Noro njap gi nimuhwindacan ne njap di jigwam kep jinghuisi. Ma jibet njap dima ei mem Da. Harin dima jiyai kep jide midyai nya mem njap gi nimuhwindacan a. Bitut jeni kin jimunggwom bat nya cem jide awak nya cem jide mindhe-ndhe nya cem ngkiai nya di ibong srig jikieti cem jahagom. 11 Lewo Da di TUHAN dipai tes dihyeisi kin mpia-bbed him kin muk ngeisi bitut mun di joti nya hagom mem njap nitindur muhwindagom. Noro dikes dinda tut midyai bidigwam kep dinghuisi ei njap gi nimuhwindacan. Gima rino Da di TUHAN dijoi sut Njap Nigwam Kep Ninghuisi lene dibindei bikwes-kwau kei mem Da.
12 Ma jibou cut bak jicig bat-jipmem bat nya bijibit ighyet. Leu binhyepo mijibong kei mijigwam kei mem nijam di jei ei minu di dindo ei mem je tu.
13 Harin dima jihwen mun a.
14 Harin dima jicut tut hi nitnem hi nijjep a.
15 Harin dima jinggimang mun a.
16 Harin dima jiris mun ei yo di hiter nya dip a.
17 Harin dima jingon pri kep mun di hiter nyeng tut a. Nok nide ig di bongti kin nitnem kin nide awak nya kin nide mindhe-ndhe nya kin nide keledai di noni nyeng tut nya.>>
Mben Israel ingon ttin bibor
(Ul. 5:22-33)
18 Tirigi yo dima imiap kru di nisu bong kin pun mbrei di nimbi bong kin kigyei di ninjeng srei kin hum mmup di brou kui leu nungug dima lene yahagom ittin tut nindig bibor binghuisi mpig sut. Lene yoom yonti bigya minu ting. 19 Lene ipai bak Musa <<Gino ambrap bit nye lene minintu kep ahyet. Noro ma Allah mbrap pijum bit nye au lewo minimai.>>
20 Lene Musa buhup <<Dwai! Mijittin tut au! Allah juk kwei bingon je bipingok jingonti leu binhyepo jibit nihyet kikau lene mijibon sisar tut Noni bi.>> 21 Noro yahagom yoom yonti ei minu ting kikau leu api Musa nongkom ya simiak bumbuhui di ndok bibor ei mpia di Allah ndo Nonti bak eisi.
Nicukti tut nimbar hum dok nya
22 Lene TUHAN sok nihyet bak Musa leu binhyepo noni tri tut bak mben Israel bipai <<Jahagom jingat bou jiyai him bipia Da di TUHAN dimbrap hwou bije leu gwamti tu. 23 Ma jiba perak kin mas bibon kwar nya mem gima jibikuk je bak njiriek Da au. 24 Ma jiba dihyei bibon nimbar hum dok gom mem Dani. Ma jibui jide domba nya kin sapi nya bijindig kep hum eisi. Lene jiba mindhe-ndhe bihi bikuk je biDa ba, jiba mindhe-ndhe bihi biyai jingon kwes kin Da. Midihwou yai gi kei bije ei mpia ttou nsi di dindo bije mem gima jibikuk je biDa eisi hagom. 25 Gino jidingug tig nok nimbar hum dok bak Da lene jiba tig di jiheu au. Lewo tirigi jiheu tig lene jibindei tig dima dem mem Da bi. 26 Lene jidingug tig binok nimbar hum dok di jo nai au. Leu gi nok lene tirigi jikui lin mbrei ug ei nidipti lene jibindei ba, hiter ba niyai nghuisi bijik kep jimmai joti.>>