SRAT NITRITI
NIHYET GI BIBIE TUT
Srat Nitriti pui sut mun di Allah pai tes nya hagom nok mpia-bbed him kin dihyeisi dini kin tungwatu nya ba, pui sut sisar kin ninghuisi di wei nitriti cem Allah kin tungwatu nya ide nibuhup biyamti cem. Srat dini bon hanjop nsi nindig can nok gini.
1. Pasar 1-11 pui sut Allah di pai tes mun nyeng hagom lene tut mun di pek kep mem tungwatu nya habiei ei nimbie him bitut nipui mun tut Adam kin Hawa cem tut Kain kin Habel cem tut Nuh kin minyei di su cem tut Ig Babel di tungwatu nya iwin bibinut yam bijo nai cem.
2. Pasar 12-50 pui sut pung dino mben Israel intun him nipou su ide nibohon. Gi nigom rino Abraham di bon ninyeng lewo ba ningon com Allah nindig bibor lene ba ningon gom bibit nihyet. Lene srat dini pui sut mun di pek kep mem Ishak di Abraham nipmot kin Yakub (di ijem ninyeng hi Israel cem) di Ishak nipmot. Lene srat dini pui sut mun di pek kep mem Yakub nipmot bat ibou simnaibrimigcan po inok keret mben Israel simnaibrimigcan ide pung di intun him nya pima. No di pas kep srat dini pui mun mang bibor tut Yusuf di Yakub nipmot kin mun di cut igkep Yakub nya di bindei ba, noni kin nide bat nya yahagom yuug bong ei minu Mesir.
Mbro nok gino srat dini pui mun mang bibor tut tungwatu nya ei nijam nimbie him lo, mun di joti di bon ninyeng rino Allah de midyai nya. Srat Nitriti ndo brei binye bipia Allah pai tes mun nyeng hagom lene ninggrupti pui sut Allah di preu ei mem Nide limwa nya bipia mingondut yok kikau. No di bon ninyeng nindig bibor ei srat diniti ne Allah rin lewo Noni gwam nok nikei mem tungwatu nya cem kes hukum ei yo di ibon sisar dip cem bie tut Nide limwa nya bahati tut yok cem ndo ningon kanti tut ide nibohon cem. Allah bindei ba, tungwagom pas kep srat di mimbrek ngan dini leu binhyepo pui sut keret gom ide niba ningon comti cem leu binhyepo ide niba ningon comti dima ug hon nohonti bi sren cem.
Nirop Ninda Ndigsi
Allah pai tes mun nyeng hagom 1:1--2:25
Sisar kin ninghuisi di wei nitriti 3:1-24
Nipui mun tut Adam kikau ug bipek Nuh 4:1--5:32
Nipui mun tut Nuh kin minyei di su 6:1--10:32
Nipui mun tut Ig Babel di tungwatu nya iwin bibinut yam bijo nai 11:1-9
Nipui mun tut Sem kikau ug bipek Abram 11:10-32
Nipui mun tut Nibou Keret Nya Abraham kin Ishak kin Yakub 12:1--35:29
Yo di intun Esau him 36:1-43
Nipui mun tut Yusuf kin nikindig bat nikinjoi bat nya 37:1--45:28
Mben Israel yuug bong ei minu Mesir 46:1--50:26