Yitro di Musa nipmang kwei cem kep Musa
18
1 Mpe hi bu lene Musa nipmang Yitro po nok imam mem mben Midian pima miap tut Musa ninghapti bipia Allah mpu noni kin mben Israel nindig bibor tirigi Noni buwak yok kwei bingwes ngun leu minu Mesir. 2 Gima rino noni kwei ngat Musa bibuwak Musa nitnem Zipora po bit Musa ug ei minu Mesir bi pima. 3 Ba, buwak Musa nipmot bat cin di inyeng Gersom kin Eliezer kwei. Musa jem nipmot mighumbou ninyeng Gersom bitri tut <<Sinok ngkiai ei minu dini.>> 4 Lene noni jem nipmot ndrim ninyeng Eliezerg bitri tut <<Sicig de Allah mpu sa biteu sa bisingwes ngun leu Firaun di mitot sa pima.>> 5 Lene Yitro buwak Musa nitnem kin nipmot bat cin kwei ei iggum ndigsi bicem kep Musa tirigi noni bong ei nungug di kwes-kwau pima nikiou. 6 Lo, Yitro sok nihyet bak Musa bibie tut nikweisi. 7 Gima rino Musa hei leu nide prak meng bipigo yok. Lene noni kuk no ei Yitro nimig him leu api mei ningyoia. Lene ihig yam nyen tut igyaisi leu api icoi hanyen ug ei Musa de prak meng behei. 8 Lene Musa pui kep hukum di mindur nya di TUHAN kes ei Firaun kin nide limwa nya dip tirigi po Noni buwak mben Israel bingwes ngun leu minu Mesir pima. Ba, pui sut mun po buhun tak yok kak puig sinon kin notou TUHAN teu yok bingwes ngun leu mun di cut igkep yok hagom pima. 9 Tirigi Yitro miap tut mun dini yok hagom tu lene ningon llei bibor. 10 Lene noni pai <<Dinggei sut TUHAN di teu je bijingwes ngun leu Firaun kin nide limwa nya di imbuk tut je inda nsi! Dinggei sut TUHAN di teu Nide limwa nya leu awak ei minu Mesir! 11 Nogindini dikan tut bipia TUHAN sindem bibor dor njiriek kwar di ngkiai ikuk yok bak hagom lewo Noni yai mindur dima yok hammi tirigi mben Mesir iba ingon di jei bibor bico kep je di mben Israel.>> 12 Lene Yitro jem mindhe-ndhe nya kwei bindig bihi kep hum titut yam lene srat bihi hacan ei nimbar hum dokti bak Allah. Lene Harun kin nibou mben Israel nindigsi nya yahagom induk yam kwei bigyem njita bit Yitro bou Allah niyai him.Musa ta Nikei Nya
(Ul. 1:9-18)
13 Njap di hyep bu lene Musa gwam nok nikei mem mben Israel tut mun di srou yok mang bibor leu mpia tekti kikau ug bipek mpia jinjuisi kep.
14 Tirigi Yitro ngat Musa di yai midyai nindig bibor nok gima bou niyai him lene noni hig ser Musa <<Ayai midyai mindei yo rinindig bibor mem ade limwa dini yok i? Nggon rino nangkom ayai midyai nindig bibor dini i? Mei! Tungwatu ingwig ei sirini bimbot kep mun di srou yok sindam leu mpia tekti kikau ug bipek mpia jinjuisi kep.>> 15 Lene Musa buhup <<Limwa dini yok yahagom ikwei ngat da leu binhyepo dimbot kep tut Allah ningon kanti biyok.
16 Tirigi ibou can ingon kwes kin yam bi lene ikwei ngat da ba, dibingon nok nikei di kos tut no di bon mun tunggwei leu api ditri tut Allah nicuk yokti kin niggai sertti nya biyok.>> 17 Lene Yitro pai <<Ayai midyai dima tug hon nisinati di igbit bi. 18 Gino ayai midyai nok gima kikau lene abindei ba, anghuisi jet lene ade limwa nya cem minghuisi wei nindig bibor. Midyai dima buhun bibor mem gima nangkom ayai kep hagom. 19 Ma angig atingou mem dipingok nati lene Allah mimpu na. Ningat ne gino aya hacan mem mben Israel ei Allah Noho bei ba, andat kep mun di srou yokti nya hagom bak Noni dima ne mun di igbit ri. 20 Suar angginau yok tut Allah nicuk yokti nya ba, apingok ingonti tut igyai munti di kei bibor cem di igbit cem. 21 Noro ma ayai bit leu dingon kanti dini. Ma adimig pinai di ingon ki nya ibou poi leu api ata yok nok nibou mem ade limwa di imangti ibou sribu gom kin ibou sratus gom kin ibou ningot muhwi kin ibou ningot gom lene nok. Ma ata yo di ittin tut Allah bibit nihyet kin yo dino aba angon com yok kin yo di ingon ya mem gima tungwatu ingot kep yok bi cem. 22 Lene ata yok nok nikei mem ide nimpung nya bibikwop nok. Lene yoni ikwei ngat na bihig ser na tut mun di buhun bibor noro yonti migwam nok nikei nya ba, ikos tut mun di buhun lai-lai de. Nok gima lene ade midyai nok nikei minggan lewo yo dima yahati tut na.
23 Gino ayai kep midyai dini ba, abit leu nok Allah nicuk nati lene midyai di buhun pima mibuhun tak na bi. Leu api bikwop tungwatu ingon micut hon nikei nya ide nikos tutti nya lene iba ingon di nggan bingkwei hanyen ug ei ide prak meng yati.>> 24 Lene Musa ce tut Yitro nipingok noti. 25 Ba, noni dimig pinai di ingon ki nya leu mben Israel ikieti ei bita yok nok nibou mem nimpung nya di imangti ibou sribu gom kin ibou sratus gom kin ibou ningot muhwi kin ibou ningot gom lene nok. 26 Nibou dini yok igyai inyeng nok nikei nya mem ide nimpung nya bibikwop nok. Lene ikwei ngat Musa bihig ser noni tut mun di buhun bibor he. Noro yonti rino ikos tut mun di buhun lai-lai de. 27 Jei bi lene Musa kes Yitro bipigo noni leu api Yitro ngkwei hanyen ug ei nitimieisi.