Kollisampawhe Aayyappa Dhikkatte Thuusundhi
2
Naqharray hxumampawhe aayya qhamu perre lighghenna waarsho kitteʼita qaghe kula hunena kittatekka ihhaqna.
Usundhisakka Pogholhossi kʼeeqhte thuusuttay usundhe pithamiisi immarmannapa kollinko koro patisnaasi looxattay xullesonki,
husatakka olho tutuppe usundhe patisnaasi heema okaasonki.
2 He kisha kodhmo huusundhi palankitoosikki eemneppa isi nakala ashsha,
usundhisana haqati onke kristaaninko dhukatatenaasi isi meethuyasa.
3 Kollisampawhissa aayya pirraadhenu yuyuʼetakki kollinko huusundhi usundhe lihsadhe thorruyettay hune sarre.
Qhaqhitte thuusundhikka the kedhdhanu gharsamti,
karay patitte usundhe tiqadha.
4 Haallikko erkampatadhdhessi cʼuppo kodhesikki ye qhararsadhuppa thukankossi uuma koro ghaapisa hxohxnito kittatte qhaghasa shapuppa qhaqhitenu xawadhu paynippaa
5 Noohessi pare qaghunko thorruyaasi qhawho thaxan illay pehisuppa qhaatʼessi koro ye Haallikko ghaapi na qaakisa qandhe patitatte okaasu paynippab
6 kathama Sedhoomeppac Kemooray heye Haallikko ghaape kaasannu qhamu lighno kodhinennu haki tarqo kodhdhine saasa na qhaqhite qhaqhuppa dhillo paynippa
7 Lootʼessid pare qagha koro ye hikkenu eeʼe payi paalakunko ye dhikkatte sheeghittay lokmadhina kittatte cʼinkʼetttay qaakasi dhinisu payni,
8 kuyyaqko kuyyaqkoma kodhmo huusudhi maghana haqati iʼusundhena kittatte qaakana olho ihhiʼipa iʼapaqhittay irrakkadhakka payni,
9 Pogholho he dhukettay Uso kaanasapa isi qaakasi themmatatte qhamu mala usundhe pehisnipa maghampawheesi kʼatʼtʼaʼuppa kuyyaqko qhaqhitattenu usundhe gheyyasossa iʼara.
10 Karo ghulattay he dharraʼo lokmadhittay woʼo pishkito kala ashshapa isi ghulno dhafaasi qhaqhitenukki gheyyasni.
Usundhissa shahxawhepa peppolawhe qhooti kodhdhe maallay he ghulno sheeghasi ye ghaapemma idhdhaghghisa.
11 Naqharray erkampatadhdhe usundhena kaanta he dhikitoomapa he humna sheegha ikkodhdhekka payni,
Pogholho miinta ye usundhe dhaghghisse.
12 Kollisampawhissa aayya kapay olhu ye are kitteemi xulleppa isi dhaghghisama,
usundhissa he qhamo aaghessi ghapepa poghenu dhaladhe woʼo huusundhittay ye kʼalpe sheeghenna ashsha kula,
hu pannekka qhamo aagheete.
13 Hxaayye maghno huusundhinu gheeqasasikki akkanne.
Kuyyaqte maghno koodhettay hxasoodha,
idhdhawrepa lokme na qaghanakki hune qale yiʼo cʼiknito yiʼenu qakkanne.
14 Kʼalpe thuusudhi the palakunkottay hoqhqhiti qhooti kodhdhiti maallay cʼuppo kodheete kaalla yehe tiqadhe,
koro ye dhukkaysadhettay dhikituusi isi dhappisa,
he saqqe koqolunko kolladhe sheegha,
he qhiicʼame.
15 Onke dhukatteesi ihxhxureppa onkessi miʼaye Piʼooree hxaayye maghnito cʼikadhi ana payi Pala’ame kala ashshonkippa dhapponki,
16 usoosi qhoota dhapitte thuusu maallay aʼuso qheeri,
harre ye qalatti qhamo qhawhito qalladhippa sarnessi hxumampakkitoosi shikkarashi.
17 Kollisampawhissa aayya qeelle tʼoqheppa urraththe uruure dhukti,
honu gharsamikka thukkanko uuma kumma,
18 hessi qalliththe lathu illa dhoopapa isi dhappittetta qaakana kittatte pineppa lighonkiisikki qhamu cʼuppo paalakunkito kodhettay qaaknenukki tatake.
19 Usundhe pukaqte thuusundhina iʼayilladhdhe cʼuppito kodhdhenna tokkeete hasa lighinte inna payeppa isinnu kippo teexa,
qhawho olhu nu eeʼe payinu ayle.
20 Koro Ippogholho Dhinisampakko haani Iyyesus Kristooseesi aripa lokmessi hassa piyye qhatʼinna kaalla pinnu tupettakki lanka holli kollinko huusundhittay ghapamuppa putamoy payni,
qaakossi payyotattena kanta ho lankay ihholla ho magha na kodhdhu.
21 Iʼonke pare qaghunkito are tupettay hayossi kʼulkʼullawwi anu teexina kalla konankonnaye holete kanta xayna qharraʼithakki ye onke pare qaghunkito aronki payni innu woyinay.
22 Lighnidhessi dhukatte iyyana:
“Haro fatho huusu kulakki holif”
holuppa
“Luumitte ishshoxomti tupettay ihholay isi cʼoqhollito kankalati” kki na dhikkadhi.