Lanka Okaye Pogholho Iyyesuse
3
Hune hessi cʼikathamte koro haayyu,
erku an hune tooxi ho lankay,
hisi lakki olho anna maalla hune tooxi olho hasa lighomaasi hela thayettay dhihadhe thaahundhi xeesasi qhama thayriste hune thaaysenuppa
2 kʼaalessi axayna qharaʼitha hxumapawhe kʼulkʼullawhe hune qalle pana hayo Pogholho Dhinisampakko haanina aʼerkampawhe haahundhittay hune teexisi qhama hela thayintekka woʼi.
3 Olho kaasanna inthoosapa husiisi aronku,
perre dhikkattatena he koro dhafapa he dhihadhe maghattay qaakakki okayna,
4 usundhissa hasi payne:
“Pogholho Iyyesuse okayna olo payuppa akkippo teexuy?
Emma xankanakki qaghi?
Xinke appadhdhe haani kedhdhay farrennu paayyatti olho kaasay qhamo xeeressi paayyotattena ummammi kulakki qaghi.”
5 Naqhqarray korussa qhamu perre kishana qharraʼitha monthidhdhe hayo Haallikkitottay ummammeppa piyyekka qandheete ummamippa isi qandheete kittatte qaghassaa inni aranakki marmadhe.
6 Piyye qhaatʼessi perisana qaghay qandhetakki loqhamtipa pati.
7 Hayusattay monthopa piyyi hantu qaghay kuyyaqkossi qhaqhitatte koro ye Haallikko ghaapi napaninu isi tiqthama.
8 Koro hayyu,
Pogholhito miinatte kuyyaqko toʼoko qhamu perko kuma kodhdhipa perko kumakka qhamo kuyyaqko toʼokko kodhdhussa olo thaymoodhe.
9 Qhamu tookenu ho oladhi nu lighi kula Pogholho kʼaale thuusu kippitoosi dhikkisenu ye olanni,
naqharray yaxakka qhamu ye panni qhooti woʼi maallay,
kaasay qhamu cʼuppito Haallikko kula holle nukki qhoota hahundhi dhuupadhi.
10 Kuyyaqako Pogholhito kapay qhamo kereqkitu okayni,
kuyyakusana monthidhdhe ikkitto dhammatakki panne,
umatha monthitokka thorno haththetakki liillipa patu,
piyyepa olho na qagha kaasakka ishshaʼina.
11 Lammi olho kaasakki onke hasa lighattay panna payni,
emma hune malakki kʼulkʼulnkopa Haallikko ghaapettay qaake ye hune gheeqasti?
12 Lammi he kuyyaqako Haallikko na okayniisi yorkottay tiqthadhapa he qhamu wadhettay okayninu kodhadha kodhdha,
kuyyaqakusana monthidhdhe ishshaʼinapa patonki,
umathakka thorno hathattettakki liillipa patu.
13 Naqharray ine kippossi aʼine teexittay montho qhawthitopa piyye qhawthittessi pare qaghunko naqaghisikki an tiqthanni.
14 Hussa maallay koro hayyu,
kuyyaqako oli kaasa nakodhdhamanisi he tiqthadha qhoota kodhdhite maallay Pogholho qhamu dhawrepa meethe male nakayhottay hune tayninu kokkisadha.
15 Dhupaythe Pogholho haanina qhamu dhinko haahundhinu kodhdhisa arindha;
qhawho haani cʼikathami Pawloosekka arnanessi anu teexittay olinna kaaʼitha ihhune tooxi.
16 Uso olinna kaaʼitha erkidhdhe huusu kaasassi tooxi;
olisakka hanay upadhe ikkoro rakkisay.
Koro arno na qhacʼipa dhukkaysadhettay isi ye kookisadhi qhamu matʼaffe kʼulkʼullawhe tookesi xongholoolisi kula erkidhiisikka xongholoolisettay patitteesikki heema okaasne.
17 Koro hayyu,
husiisi qhoota inthosteppa aronku maallay kiriththossi adhdhikkitteppa na shiikarankunna qhamu huni dhappitte korossi ye hikkenu eeʼe payittay tatakaminteppa ranankunnu he tiqthadhindha,
18 Naqharray teexakkopa arno Pogholho Dhinisampakko haani Iyyesus Kristoosettay ghoha.
Usoosi hantunuppa perre ye hume sheeghe saasa kaanaste innu kodhdhita!
Amen.