Erko Erkampakko Petʼiroose Lankay
Qholladhdhe Haallikkitopa Ooqmaththo Huusu
1
Ano hossi kodhampakkopa erkampakko Iyyesus Kristoose kodhdhi Simiʼon Petʼirose.
Hune hessi pare qaghunko Haallikkitopa ho Dhinisanpakko haani Iyyesus Kristoosettay tayama ine tayanni kula dhukkaysadhessi kaanasamti tayatte,
2 Haallikkopa Pogholho haani Iyyesusesi are haahundhittay nakayhopa teexako huusu ihhune naqa.
3 Haallikkossi kaanastepa horxunte thuusuttay ine ooqisi qhootan arre maallay,
qhama Uso ghaapnaaninnu olho qaghonuppa qaako nassawinko dhukattenu ine gheeqasa kaasasi humna huusu waakunkitottay iʼine teexi.
4 Hussattay qhama qaghossi hassa piyinna dharraʼo maghattay xarkishamina kaalla pinninteppa kʼaalessi kippitottay kʼalpe Waakunkito qhootadhankunnukki kippo dhamma kaanasamisi ine teexi.
5 Hussa maallay kokkisadhettay dhukkaysadhe thaahundhisa xeesno padhawa,
xeesnomattekka arnoosi,
6 arnomattekka he pankadheesi,
he pankadheematekka dhuupaythettettay kookkisadheesi,
dhuupaythetettay kookkisadheemattekka Haallikko ghaapeesi,
7 Haallikko ghaapemakka miʼaadhe appa thoʼokito kula ille dhihadheesi,
ille dhihadheemakka cʼiknoosi padhaawa.
8 Hisi kaasakki hune qaghnapa hune puronki payni Pogholho haani Iyyesus Kristoose arenu he koro pakirapa he awsho sheegha akkodhdhinte.
9 Qhawho hisi kaasasi ye sheeghi ho sikapnooma ye xayto hiʼi taakki taafakko.
Cʼuppo huusu qharrona qhamu alhesammisa ihhela iththaymoodhi.
10 Hussa maallay koro haayyu,
ooqamepa qhollamme thaahundhi dhiktisenu ho qharrona kaanta uuma kookkisadha,
hisisikka kotte payni huni kuththumadhinteye.
11 Hissattay karo Ahxasessi perre ye hume sheeghe Pogholho Dhinisampakko haani Iyyesus Kristoose kula xulle hxasotakki hune teexamti.
12 Hussa maallay olho hasa lighaasi aʼarteppa dhukessi aghghapattettay dhikitankuppa shikkaranku kakki payni,
oliisi kuyyaqkooma hunena thaayisesi anu hxurri.
13 Haka piyyinna qaghi saasa hunena thathayiseesi anu hxurri,
14 moʼo maalla payni qhamo Pogholho haani Iyyesus Kristoose ye armaatheesi kula xeere itʼtʼana qhama sakanku haayyu hxurripa ashshosa an upadhi.
15 Olho anna maallay kookisadhikka an hunena rehhammi tupettay olho hasa lighaasi qhama kuyyaqakooma dhihadhintenu.
Kaanaste Kristoose
16 Qhoota humna Pogholho haani Iyyesus Kristooseppa laanka okaaye thuusu an hune qallini kulay kaanaste thuusu dhammaasikki an ehxhxe haanitay hiini qhari dhiishoy,
tharathe lathu arno koritottay kodhdhamadheesi apaqhasettay qandhikka.
17-18 Xinkessi an Iyyesus Kristoose qale ghupo kʼulkʼullawina qaghninna ikkitto monthikki kaanaste dhammattay iyyana “Miʼayessi haayyu an Usottay hxasoodhipa isan cʼikadhi husi” a qhaskadhipa apaqhaani.
Xinkisana Haallikko Appa Iyyesus Kristoosenu kaanastepa dhamunte innu teexi.
19 Lammi kʼaalessi hxuumay iʼine aramtiye haki awnisa qhayneppa xuskittessi xayto qhayana lighay saqqe haahundhisa hxusi saasa qhamossi hammakko xayto kummana hxusanu ahe tiqthadhi kula hunekka kʼaalisanukka he tiqthatte payni olho xeesa kotte.
20 Olho kaasanna husiisi inthoosepa are gheeqasa,
hussakka hxuumassi Matʼaafa Kʼulkʼullito kittatte qaghasi yaxakka qhamu woʼi kula ishighe ye alkasni.
21 Moʼo maalla payni hxuumissa ho koro Haallikkottay erkami Nasso Kʼulkʼullottay marra’amipa thorruyu dhiishoy ho woʼo qhawhitottay okay qandhikka.