4
Lammi Kristoose qhooti sakankottay rakko akkadhi maallay hunekka qhamussa kula rakko akkadhenu he gharte kodhdha.
Moʼo maalla payni qhawho sakanko huusuttay rakko akkadha cʼuppoosi ihxhxuri payyo.
2 Husana haqati lammi perre ixxayna tupettay qaaknina qhamo woʼo Haallikkito kula dhiishoy qhamo dharaʼo sakankito kula qandhikka.
3 Lammi perressi xayna qharraʼitha koro ye Haallikko dhukkaysdhi kula paalakunkonu ille ghaghapadhepa woʼo sakankitopa hxayyepa hiripkopa qukte naqsadhepa killankonu sakatettay anna qaakte ihxhxafna.
4 Qagho hasa lighattay qhoota huni usundhe qale herte maallay olho qhawthitto inna kodhdhinipa isi hune dhaghghisa.
5 Naqharray Hossi he qaghapa he farressa qhaqhitte qhaqhenu gharsadhi nukki malse holasne.
6 Hussa maallakki koro farri kakki ye haqhunna anu wonkele thorruyi,
lammi usundheemakka qhamo korito sakankottay inna qhaqhamnay,
nassottay kapay qhamo woʼo Haallikkito kulakki qaakne.
7 Dhikkatte olho kaasanna iʼitʼuyti,
lammi qhama ghissadhe alkasintennu,
kʼalpe olho upadha sheeghindha;
hehe pankadha kodhdha.
8 Cʼikno cʼuppo naqiisikki bhadhi,
hussa maallay olho kaasanna ghulasapa kuyyaqqe kaasay isa ille cʼikadhanku.
9 Huni qhurumrumonkunna hayhinko ille akkadha.
10 Teexakkidhdhessi Haallikkito qawni qawni teexameesi dhukkaysathamettay rafisettay tookko tookkonu teexakkossi Haallikko nu teexittay kodhadha.
11 Hunena yaxakka ho qalladha qagha payni,
iqhqhamo kʼaale Haallikkito kula qalladha,
ho kodhadhakka dhikitno Haallikko nu teexittay ikkodhadha,
hussakka Haallikko Iyyesus Kristoose kaakoru qhamu olho kaasattay kaanasamininu;
kaanastepa humna perre ye hume sheeghennu haaka perre ye hume sheeghe saasa innu kodhdhe.
Amen!
Rakkito Dhuupadhe
12 Koro haayyu,
xinke rakko qhamo haththatte kula koro themma huna hxafina qhamo olho apar olo aru kula olo kodheppa isa dhahxhxanku;
13 naqharray xinkessi kaanaste Kristoose ximpatina hxaso haahundhi ho dhamma qhamu kodhdhininu rakko qhoota Huusu huna hxafittay hxasoodhindha.
14 Qhoota makaxko Kristoose maallakki ahhune dhaghghisni payni Nassossi kaanasami hussakka Nassossi Haallikkito qhooti hunena kittatte qaakni maallay hune hehe poghatte.
15 Naqharray hunena yaxaamakka rakko inna hxafana qhawho poghettay takki kerquntettay takki maghno pile kodhettay takki olho korosa xullettay ikkodhe hxura.
16 Hussana kaanta kristaanito kodhdhe huusutakki rakko na hxafni payni qhoota makaxkusa kristaaninkito maallay Ihhaallikko kaanasa dhiishoy inni palamuy.
17 Xeere qhaqhitte manne Haallikkitona payyadhintikki dhaghghapi.
Lammi qhaqhitte ineema paayyanna payni,
saqqi he wonkele Haallikkitonu ye eeʼe payenna dhikkatte thuusundhi moʼo ikkodhdhinti?
18 Lammi qhamu matʼaafa Kʼulkʼullo payina:
“Qhawho pare qaghakki cʼinkʼettay dhinna payni,
hoye Hallikko ghaapipa cʼuppolakko saqqi maali payni?a”
19 Hussa maallay he qhamo woʼo Haallikkito kula rakko na hxafi kaasay napse thaahundhiisi Uumampakkossi dhukkaysathamanu atara teexettay xeesno kodheesi iththiyise.