Qaako Ahxke Manneetena
3
Hune xiske,
tʼiire thaahundhinu eeʼe paya;
yaxarakka onke hasa lighattay tookke tookke kʼaale Haalllikkito ye dhukkaysadhonki kakki payni kʼaalenu ye eʼe payonkinna kʼalpe xeesay xiske huusundhi sheeghettay poojuyame iʼalkasna.
2 Hu poojuyamnekka qagho haahundhi xeesapa Haallikko ghaape haahundhiisi eemettay.
3 Xeesno haahundhi urkuyte seettito armadhanu rakkadhettay hussakka kaso ghersadhepa workʼe siradhepa lalladhdhe shooshattay ikkodhdhe hxura;
4 naqharray xeesno haahundhi moʼonkussi haahundhi kittatte saqkooma bhadhamipa Haallikkito miinatte xortho isi uuma na shoosha kʼalpessi thaahundhi xeesnopa laaluntettay sirattipa isi ye patintittay ikkodhdha.
5 Moʼo maallay payni perre xayna qhareʼitha lighghenna xiske kʼulkʼullawe Haallikkooma kippo kodhe hu siradhekka onke hasa lighattay,
tʼiire huusundhinukka eeʼe payonki.
6 Saarakka Aprihaamena:
“Pogholho haayyu” kinna paytipa isinnu eeʼe paya,
huni ghaponkunnakka xeesno kotte payni hunekka miʼaadhe hiisi.
7 Hune tʼiirekka,
xiske haahundhi nu dhihadhettay na qale qaakindha.
Usundhe uumathana he lunthuqhqha qhooti kodhdheppa isi sake qaghitoosi hune qale tayna maallay usundhe kaanasa.
Onke hasa lighattay olho ghissoote thaahundhinu kuththumatte kodhdhina ye qaghniye.
Xeesno Kodhettay Rakko Akkadhe
8 Lammi hune kaasay ille xulettay ille qale qaakindha,
rakko qhawho pileetesi haahundhi kula dhihadhindha,
qhamo dhelle appa toʼokito kula ille cʼikadhindha,
xorxampawhepa laalawhe kodhdha.
9 Maghnoosi maghnottay olo holase,
dhakisto kapa olho dhaghghisame hussana kaanta nu sakindha,
moʼo maalla payni hune ho annu ooqamte olho hasa lighaasi kodhettay qhama sake taydhintennuye.
10 Hussa maallay qhamo matʼaafa kʼulkʼullo payina:
“Qhawho qhagho huusu cʼikadhapa isi kuyyaqqe xeesasikka hiʼe woʼa,
qarapko huususi maghnto kaalla,
pako huususikka dhohmunte qalladhatte kaalla ikkohxhxa.
11 Immaghnito sikaapuya,
xeesnosikka kodhu;
innakayho gheeqapa isi kodhakka;
12 moʼo maalla payni ehxhxe Haallikkito he pare qaghasikki eeme;
qhaame huusukka ghissoote thuusundhiisi apaqhasenu he qhaashame,
miinte Thuusu miira kapay karo he maghno kodha kula.” a
13 Olho xeesa kodhetakka kookisatte payni ho hune rakkisna yaxa?
14 Laadhdhi qhoota olho xeesa kotte maallakka rakko huna hxafni payni hune hehe poghatte,
nyarko koritoosi olo ghaape,
olo na rakkadhekka.
15 Kristooseesi Pogholho saqqe haahundhina kodhapa kaanasankuy.
He qhoota kippo sheeghte kaaʼitha hune kasqadhanu malse holase qhama alkasintennu kuyyaqko kaasay he gharsatte kodhdha,
naqharry hussa kaasay laaluntepa Haallikko ghaapettay ikkodhdha.
16 Koro moʼunko xeesa Akkristoosettay sheeghteessa maghno qalladha qhamu maghnusattay palamninu kʼalpe xeesa sheeghindha.
17 Woʼo Haallikkito kodhdhini payni,
olho xeesa akkodhinteppa rakko huna hxafo payni dhiisoy ho magha kodhinteppa rakko huuna hxafo payni pare qandhi.
18 Moʼo maallay payni Kristoose toʼonna malekki qhoota cʼuppito fari,
karo Haallikkito hune itʼtʼoosenukka Hossi pare qagha qhoota maghampawhatte maallay faru,
Uso sakankotakki fari dhiishoy nassotta kapa iqqagha,
19 nasusattakki ashshipa napsadhessi Siʼoolema shappamennub ote xeesay thurruyu,
20 hissa siʼooleema shappamekka hessi perre kedhdhay Noohe immarkape kodhdhana ini wooni payeppa Haallikko dhuupaythettay usundhe tiqadhoy,
he qandheta pehekka he qhacʼa,
usundhissakka qhawho sette patta.
21 Qandhisakka haantu lighno shoxatatti kodhdheppa hune dhinisonki,
hu hune dhinisnekka fartatte haqmakko Iyysus Kristoose kakkoru,
hussaka oskakko pishkito patise ye kodhdhunna ghissoote kʼalpe xeesattay ahaallikko kula itʼtʼoosittay,
22 Usokka moontho kulakki haadhdhipa Haallikkito miskkitto kaaqila isi qagha,
erkampatadhdhepa,
ghulnidhekka,
humnidhdhekka innu kaamadhe.