2
Lammi maghno kaasappa tatake kaasappa he paseesepa yokkunte maghappa hxashaththo kaasasi hela patisa.
2-3 Haallikko xorxito qhamu kodhdhisa aʼarteye dhinko haahundhittay qhama ghohintennu miʼaadhe hannay dhaladhe kula orxessi xeesa nasawnkitoosi yooka.
Awrukossi Qagho Sheeghapa Warshossi Qhollammi
4 Awurukossi qagho sheegha koro dhafi,
naqharray Haallikko qholladhi kaanasami ususakka Iyyesus Kristoose kula itʼtʼuya,
5 hunekka Uso kakkoruy teexakko nassawnkito Haallikko hxaseesa qhama itʼtʼoosintennu kʼeesadhdhe kʼulkʼullawe kodhdhenu awrughghe qagho sheegha kodhdhapa manne Haallikkito kodhdhenu isa ghupthamanku.
6 Moʼo maalla payni matʼaafama hasi payamtipa tooxamoy:
“Haadhi awrukkossi dhikita manne ghapa qhollamipa ho kanasami
an Tʼiyoonema xawwanni,
ho Uso dhukkaysadha moʼokakki payni ye palamni.a”
7 Lammi hune he dhukkaysadhanu awrukkussa kaanaste,
heye dhukkaysadhennu kapay,
“Awrukkossi he manne ghupadha dhafe,
Uso holippa awrugho dhikita manne ghapa kodhdhu.b”
8 Holuppa,
“Awrukkossi koro kuthumapa
awrukko simmikossi koro qhamu ranninu kuththuma ikkodhdhi.c”
Hu kuththumanekka qhooti ye kʼaale thuusunu eeʼe payonki maallay,
honu payamikka hussa.
9 Hune kapay dhalatha Haallikko thukkankonu karo hammakkossi huusu koro dhahxhxhisa kula hune ooqadhipa kodhmo huusu dhamma thorruyenu qhollamankuy;
kʼeesadhdhe nukasa warsho kʼulkʼullawi he Haallikko ghapatha huusunu hune reehadhi.
10 Xayna qharreʼitha hune waarsho Haallikkito qandhikka,
haantu kapay waarsho Huusu akkodhite,
xayina qharreʼitha hxurakko Haallikkito huni tayadhonuku,
haantu kapay hxurakko Huusu attayatte.d
Kodhampawhe Haallikkito Kula He Ghulno Sheeghanu Eeʼe Paye
11 Koro hayyu,
piyye qhaatʼinna qhama hayhiththopa okaayo kodhdhite kula,
woʼo sakankito napse qhipa kodheete kalla qhama sikapuyintennu an hune waathadha.
12 Ihhuneesi he kodhmo magha kodha kula hxashshekakki payni,
xinki Haallikko saqqe korito qhottosadhenu okaayina qhamu kodhmo haahundhi xeesa hiineppa Uso kaanasonkinnu koro ye dhukkaysadhina kitteʼiththa qaako xeesattay qaakindha.
13 Qhoota Pogholho Iyyesuse payapa he waarshito kittatte ghulno sheegha kaasannu eeʼe payanku:
nukusakka qhooti kaasanna ghulno sheeghi maallay nu eeʼe paya.
14 Rafisampawhe uso xawwaadhinu eeʼe paya.
Moʼo maallay payni he maghno kodhaasi qheerenu,
he xeesno kodhaasikka kaanasenukki xawthameyye.
15 Onke hasa lighattay heye arno sheeghenna qalladhana qallithe thuusundhi kʼampayase woʼo Haallikkito.
16 Qhamo kodhampawhe Haallikkito kula hxurransadhettay qaakindha dhiishoy hxurransadhe thaahundhi the maghno haahundhi bhadhay ikkodhdhe hxurta.
17 Qhawho kaasannu kaanaste uso gheeqasay nu teexa!
Hune he dhukkaysadha ille cʼikadhindha!
Haallikkoosi ghaapindha!
Nukusaasikka kaanasa!
18 Hune kodhampawhe,
rafisampawhe haahundhi xorxuntepa xeesnottay hune rafisanu patta ye kodhdhunna maghawhenukka Haallikko ghaapettay nu eeʼe paya.
19 Ho qhoota Haallikkito maallay dhappitte ye kodhunna rakko na dhaghghapaasi dhuupadha Haallikkito kaanta kaanasti tayanni.
20 Kodhmo magha akkodhinteppa rakko huna dhaghghapu payni kaanaste moyto tayadhinte?
Naqharray kodhmo xeesa akkodhinteppa rakko huna dhaghapuppa dhuupadhanku payni husi Haallikkito kaanta kaanasti hune tayasni.
21 Olho annu ooqhamtekka husinnu,
moʼo maalla payni Kristoose hu hune mallay rakko akkadhi qhamo huusu qhama qaaktenu lighno ihhune kodhdhi.
22 “Uso cʼuppo ye kodhu;
pako huusunakka dhohmunte yena tayamu.e”
23 Iʼuso dhaghghisana ye usundhe dhaghghisuy,
Aʼuso thubhbhanakka Hossi pare qaghunkottay qhaqhitte qhaqhanukki he teexi dhiishoy yenu nyaruy.
24 Qhama cʼuppito reehhaminaanippa pare qaghunkottay qaakoninnu Uso cʼuppo haanisi maskʼala sappeemi dhooqhadhi;
payshitte Thuusuttay hunekka dhinankku.
25 Ahxay hune he qeemmessi patte kula tuurasna,
hantu kapay karo Koshshitopa Tiqthampakko napse thaahundhina kulakka holte.