Erko Petʼroose 1
Erko Erkampakko Petʼroose Paayyotatte
1
Ano hossi erkampako Iyyesus Kristoose kodhdhi Petʼroose.
Hune hessi piyye Pantʼooseppa Kalathiyappa Kʼeepedhokʼiyappa Iisiyappa Piththaniyassa pullamteppa okaayo kodhdhankuppa isa qaakanku,
2 Haallikko Pappo qharraʼitha qhamosi payi kula hune qhoolladhuppa Iyyesus Kristoosenu qhama eeʼe payintennu kʼeeqhte thuusu ahunena muxuppa alheesamenu Nasso Kʼulkʼullottay kʼulkʼullaawanku.
Teexakko Haallikkitopa nakayho ihhune naqa.
Kippo Ye Panni Tayadhenu Kʼulkʼullunkottay Qaake
3 Hossi hxurakko huusu dhammana haqti fartatte haqe Iyyesus Kristoosettay kippo ye panninnu dhaladhe qhawtitettay lanka ine dhali Pappo Pogholho haani Iyyesus Kristoose Haallikko ikkaanasama.
4 Holuppa Uso ghapatha monthito ye panni,
ye xarkishamnippa ye oohamnikki hune gharisi.
5 Hunekka dhinkossi kuyyaqko dhikkattattena haaki armanni saasa dhukkaysadhe kaakorukki ahhumna Haallikitottay tiqthamte.
6 Haantu kapay themmatte qawni qawninna kittatte akkodhinteppa isa xeere qhacʼa rakko akkadhanku kakki payni hussittay hxasodhindha.
7 Oli kaasay olhu na maallay huneema daghghapi dhukkaysadhessi thaahundhi warkʼessi pannay ahaththettay liilisina ghutay uuma kaanasamti the dhukatte qhamu kodhdhitipa kuyyaqko Iyyesus Kristoose armadhina kalatha,
kaanaste pana arame hune tayasni.
8 Ususasikka huni hiʼonkunakki acʼcʼikatte,
hantu huni hiite kakki payni Usosikka dhukkaysatte,
hxaso dhamma ho olo qalle alkasni kaanaste na hoqhqitittay hxasoodhonkuy,
9 moʼo maalla payni hossi dhukkaysadhe thahundhina dhikkatte kodhdhi dhinko napse thaahundhina aʼakkadhanku.
10 Hxuumampawhe teexaakkossi ahhuneesi teexni kaaʼitha hxuuma qalladhe qhoota dhinkussa kaaʼitha uumi gheeqeppa kokkisonkippa qhoththosadhonki.
11 Nassossi Kristoose usudhena kittatte qagha qhoota rakko Kristooseppa kaanastessi rakko tupettay kodhdhamannaasi qharriteema iʼinthoosipa nu qallu,
usundhekka olissa kaasay parappa mala qhmu dhikkanniisikki qhoththosadhe.
12 Hxuumampawhissa hu kodhadhe huneesi dhiishoy pukkaqte thuusundhinu qhamu ye kodhdhussa Haallikko innu ximpatheesi,
hu hune kodhadhekka Nasso Kʼulkʼullossi moonthonu erkami kaakoru olhossi he hantu hune ote xeesa qalle torruyeesi armateesettay,
olisaasi erkampatadhdhe kakki hiʼenu kippadhi,
naqharray ye hiʼonki.
13 Hussa mallay saqqe haahundhi gharsadhapa he thiqthadhoku,
qhamu gheeqasti kula qaakindha,
kippo haahundhi muloosi teexakossi Haallikkito xeere Iyyesus Kristoose armadhina ahhune teexnisa kodha.
14 Qhama dhelle eeʼe paya kodhdhite kula maghnossi qharo huni Haallikko artenna akkotte kala olo ashshe.
15 Naqharray ho hune ooqi Uso kʼulkʼullitho qhooti kodhdhi maallay hunnekka qaako haahundhi kaasattay kʼulkʼullawhe kodhdha.
16 Moʼo maallay payni hasi payamtipa tooxamoy “Ano kʼulkʼullithoye hunekka kʼulkʼullawhe kodhdha.a”
17 Hossi lighghaththe maale qhawho kaasannu qhamo kodhmo huusu kula qhaqhitte qhaqhasiki hunekka Appa haahundhi kottepa akkadhanku payni apiyyinna hayhunkottay qaakankuna Usoosi ghaapettay qaakindha.
18 Aatassi lathu aʼappadhdheete kollattena kalla ho ahune yuki pirrettay taakki warkʼettay qhamu ye kodhdhussa aʼarankuy.
19 Naqharray kʼeeqhtessi orpito lokmepa adhawra yena qaghi kula kʼeeqhtessi kaanasamti Kristoosetakki Haallikko hune yuki.
20 Uso piyye qhaatʼe ye uummammonkinna qharaʼitha iʼarami,
hantu kapay qhoota haahudhi maallay perre dhikkattattena armadhu.
21 Uso kakkoru Haallikkossi Usoosi fartatte haqisipa kaanaste nu teexusi adhdhukkaysadhanku,
hussa maallay dhukkaysadhepa kippo haahundhikka Haallikko.
22 Lammi dhukenu eeʼe paye haahundhittay napse thaahundhiisi qhoota alheesite maallay koro dhukkaysadhanu cʼikno xeesa hiʼaasa,
kokkisapa saqkottay qhamo miʼaadhe appa toʼokito kula ille cʼikadhonku.
23 Sanynye anna laanka dhalatte thessi pannanna qandhimma kʼaalesi Haallikkito qaghay dhikitnappa qaakoy ye patintinna.
24 Moʼo maalla payni matʼaafa iʼiyana:
“Ho sakanko urukuyi kaasay qhamo qashkito,
kaanaste thuusukka qhamo piso liqqakito kula,
qashkokka ixxaxxawna pisokka inna hayyina,
25 kʼaale Haallikkito kapay peere ye hume sheeghe saasa dhiktintipa qaakoy.b”
Kʼaalessi ote xeesanna ahune thorruyi haadhi thisi.