Waarsho Hallikkitoosi Pankadhe
5
Lammi anossi usundhe qale inthawampakkopa ho rakko Kristoose thorruya,
holuppa ho kaanastessi armananna qhottadhdhina kodhdhi inthawampawhessi manne kristaanay hune qale qaghaasi an dhihaama;
2 qeemmessi Haallikkito rafise thaahundhina kalla qaghaasi pankadha;
ho appankadhintekka kittettay ye kodhdhunna qhamo woʼo Haallikkito kula dhihadhe thaahundhi xeesattay;
pakirko tayadhenu yuyuʼettay ye kodhdhunna woʼossi dhikita akkodhmo kodhenu sheeghtettay ikkodhdha.
3 Laadhdhi qeemmissa aʼatarattay ahuna teexinu lighno xeesa kodhdhettay dhiishoy usundhe pirtawsadhettay ikkodhdhe hxurta.
4 Xinkessi Waanito koshnampawhatte okaayina shillimathessi kaanastatte ye lighghintippa patiisikki akkadhinteye.
5 Hune ponkorre,
qhamussa kula inthawampawhe manne kristaanannu eeʼe paya,
hune kaasay ille kaanasettay laalunkoosi urkuya,
moʼo maallay payni hasi payamti:
“Haallikko peppolawheesi ittoora,
laalawhenu kapay teexako innu teexi.a”
6 Hussa maallay xeeressi Uso puqasina qhamu qila hune paasninu xarghossi Haallikito dhikitana kalay he takoosa,
7 Uso ho qhoota haahundhi dhihadha maalla olho hune rakkisa kaasasi Usoma hxura.
8 Hehe pankadha kodhdha,
thayrakka,
moʼo maalla payni paarakara haahundhi Orriththo qhamo karmossi olhu loqhni gheeqa kulakki hune kaaʼitha lallaghamiye.
9 Koro dhukkaysadha piyye qhaatʼete qaghasakka rakko hasa ligha qhamu na dhaghghapisa arindhapa dhukkaysadhettay dhikitankuppa kodhmo Orrithitoosi hela iishonkuy.
10 Hossi Kristoosettay karo kaanaste thuusu ye hume sheeghe kula hune ooqipa teexakko kaasanna Haallikko kodhdhu,
ixxeere qhacʼa rakko huna hxafikka payni Uso ihholla hune hxaysisuy hune dhiktisuy,
kookisuppa hune shikkarashuy.
11 Perre ye hume sheeghennu haaka perre ye hume sheeghe saasa humna innu kodhdha.
Amen!
Ille Nakaysadhe
12 Hossi an qhamo qhawho hayyu dhukkaysathama kula dhihi Silwanoosetakki an erku takkassa hune eraki,
olho na maalla hune tooxikka hune dhihaamenuppa husi qhamu teexako Haallikkito dhukatte kodhdhisa hune arasenu.
Teexakku Haallikkitottay dhikitapa shikkarankuy.
13 Korossi qhollammi qhamo haahundhi kula dhukkaysadha piyye Paapilonenna qagha nakayho ihhunena payi,
holuppa miʼaye haayyu Markʼoosekka nakayho ihhunena payi.
14 Cʼiknottay ille xaxasindha.
Hune he Kristoose dhukkaysadha kaasannu nakayho ihhune kodhdha.