Qarapko Tiqthadhe
3
Koro hayyu,
hunena he kisha ikkollisampawhe kodhdhe hxure,
moʼo maalla payni ine he kollisampawhe kodhdhini qhaqhitte ghulay qhamu ine tiqattisa aʼaranku.
2 Ine kaasay olho kishattakki an dhappine,
yaxakka ho iqqalladhana ye dhappikki qagha payni,
qhawhussa ho moʼonko huusu kaasay tiqadhe alkasa qhawho dhukatte.
3 Qhamussa kula kanke qhamu eʼee payintinu pakooma anu luukama qadhdhipa xayto awwoʼi kula isa ashshattay.
4 Into markapeesi eemindha the mala dhammappa isi uruure dhammattay dhuukamay ikkodhdhitakka payni,
qhawhussa markapissay dhaana mare takkayattakki karu woʼi kula dhaani.
5 Qhamussa kula qarapko qhawhito melho takkaya,
naqharray olo kaanomattakki he peepi,
qhamu hoorro dhamma haththe takkayattay shaʼipa isi humisa hela thaaya.
6 Qarapkokka qhamo hathatte,
ho pishko haanina kittatte qagha maghno qhaatʼinna,
ho moʼunko qhawhitoosi xarkisha,
ho qhamo haththessi ye imti kula uumata kaasasi dhilla,
dhikkatatte usokka haththe Kahanematesa shaʼini.
7 Aaghe hinkakka,
he hoolottay haqapa he piyyeitha eerottay kuqamapa uumatha pasito kittatte qaakasi qhawho marraʼa,
usundhekka isi nu marraʼama.
8 Naqharray qhawho qarapko huusu tiqthadhe alkasna ye qaghi,
qarapko ho maghapa isi ye hxaysinko sheeghi,
kʼorishsha koro pogha na hoqhqhia.
9 Qarrapko hanittakki an Pogholhopa Haallikko Appaasi kaanasni,
holuppa ususattay isan korossi lighno Haallikkitottay ummammiisikka qhiicʼani.
10 Pako toʼokusanakki sakepa qhiicʼo lighe.
Koro hayyu,
olho hasa ligha ye gheeqasi!
11 Qelho toʼokito qandhe xeesapa heye xeese illigha inta?
12 Koro hayyu,
karko pelesatte awusho ekerkitoosi awshe iʼalkasna?
Taakki dhishshtakko woynatte awsho pelesatte awshe iʼalkasna?
Qhamussa kula xayto qandhe ye xeeseb lighenna qandhe xeesa ye lighe.
Arnaane Monthitopa He Piyyatte
13 Hunena kittatte arnanapakkopa ho thayho sheegha yaxa?
Kodhmossi arnaanepa laalunkottay kodhiisi iqaako xeesattay hiʼaasa.
14 Naqhqharray yokkunte maghappa pukkaqe thaahundhiisi patta cʼikadhe saqqe haahundhina kittatte qagha payni olo he peepe,
dhukeesikka olo marmadhe.
15 Arnane hasa ligha he monthito qandhi naqharray he piyyattepa he qhawhitopa he nasso maghana.
16 Xayto yokkunte maghappa he cʼikadhe patta qaghenna paqhtopa kodhmo magha kaasakki qagha.
17 Naqharray arnaanessi payyotatte Haallikkito kaanta tayama he meethe yena qaghe,
nakalakka he nakayho cʼikadha,
he dhuupadha,
he eeʼe paya,
he hxurrakkopa awusho xeesa na hoqhqhi,
he lighaththepa paseste yena qaghe.
18 Koro nakayho cʼikadha nakayhoosikki pooxipa isi awsho pare qaghunkito ghimadha.