Erko Akaro Piyye Iprawiyanennu Eraki
Inthawte
Erkuusi qhawho toooxi makaxko huusu yearasukka payni ho korusa innu tooxisi pareema ara kulaki lighi. Ho anu erkuusi tooxikka korossi Iprawattea dhukkaysadha toorakko dhikita nahaqipa dhukkaysadhe hela hxureema itʼtʼuyonkinnu. Tooxampakusakka olhu koro dhukkayasadha piyye Iprawatena qaghanu pareema dhiktisipa isi qalla Iyyesus Kristoose qhamu dhukampakkopa armadhe Haallikkito dhikkatatte kodhdhisa ihhiʼaasi. Korussa qhamu dhukkaysadhettay kokisanenukki usundhe dhiktisi, ihhasa qallana olho isex dhuke kodhdhisiki pareema hiʼaasi.
1. Iyyesusesi rakku akkadhittay Haallikko Appanu dhukeema eeʼe payi Uso ho perre ye hume sheeghe qaakna miʼaye Haallikkito. Uso qhooti miʼaye Haallikkito kodhdhi maallay hxumampawhe katape paʼathattena, Muusepa Erkampaththadheete ho uuma ghula.
2. Iyyesuse ho Kʼeesahdhdhe katape paʼathattena uuma ghula Kʼeesitto perre ye hume sheeghenna qhamu kodhdhisa Haallikko Paappo qalli.
3. Qhawho Iyyesuse dhukkaysadhi cʼuppopa ghaapkopa fartatte idhdhina. Iyyesuse Kʼeesito Kʼeesadhdheete ghula kodhdhe huusuttay aata dhukkaysadhe koro Iprawatenapa dhinkosi teexakko aagheetena qhamo kaasatte xinpadhaasi ho dhukatte ikkodhi.
Qhawho erkuusi tooxi koro aata Issraʼeelattena makaxunte sheeghana dhukkaysadhe tuusudhisikki lighno kodhipa he nappapa qhotatte 11na dhukkaysadhe thuusundhittay qhamu kokkisanenu isinna thaayisi. Holuppa qhotatte 12na qhamu miinte thuusundhiisi Iyyesuse kula laaghneppa dhukkaysadhettay dhikitonkipa rakkopa qootʼo hunkakki na dhaghghapi payni dhuupadhe alkasokinukki usundhe dhihami. Dhikkatattekka qallite dhihamteetepa the qhamu he thiqthanne usundhe konnatakki dhikkisi.
Olho Matʼaafi Illa Ghapadhi
Inthawte: Haallikko qhamu Kristoosettay armadhi 1:1-3
Kristoose erkampaththadheete ighghula 1:4-2:18
Kristoose Muusepa Iyyasuna ighghula 3:1-4:13
Kʼeesinko Kristoose ighghula 4:14-7:28
Kristoose katapatte ighghulay 8:1-9:22
Kristoose teexakko kodhdhepa teexame thuusuttay qhamu teexakko ghula kodhdhi 9:23-10:39
Dhikitno dhukkaysadhatte 11:1-12:29
Haallikkoosi hxaseese 13:1-19
Ghissote dhikatate 13:20-21
Dhikkatte 13:22-25