Erko Akaro Piyye Iprawiyanennu Eraki
Miʼaye Haallikkito Erkampatadheete Ighghula
1
Haallikko perre kedhdhanu payyati xeere pile pileete iʼonke qawni qawnittay hxumampawhettay appadhe haaninu qalladhi,
2 perri hantu dhikkattatena kapay hossi olho kaasasanna tayampakko kodhdhipa Haallikko qhaatʼe kaasasi Usottay uummu Miʼaaye huusutakki ine qalladhi.
3 Uso hammakko kaanaste Haallikkitonapa lighno dhukatte kʼalpe Haallikkitonaki kodhdhipa kʼaale thuusu dhikitattay olho kaasasi heluppa ghapu.
Icʼcʼuppito alhesame tayasi tupettay moonthooma Haallikkossi kaanasamina miskkito kaaqqila qakkadhuy.
4 Hussa maallay makaxko Aʼisoosi teexi qhamu makaxkko erkampatadheetena ghuli kula Uso ho uuma usundhena ghula ikkodhdhi.
5 Haallikko erkampatadhdheete kittatte yaxanakki payi:
“Atho Miʼaaye haayyu anokka kuyyukki anho dhali.”a
Takki
“Ano Appa annu kodhini usokka Miʼaye iyye kodhini.”b
6 Holuppa Haallikko xinkessi Miʼaaye huusu qharithoosi piyye qhaatʼi kula okaasana hasi payi;
“Erkampatadhdhe Hayyu kaasay innu sakate.”c
7 Qhoota erkampatadheete kapay hasi payi:
“Erkampatadhdhe Huusuusi nasso kulakki konni,
kodhampawhe Huusuusikka halapko haththatte konni.”d
8 Qhoota Miʼaye Huusuna kapay hasi payi:
“Haallikko,
qakkatte thaahu poghluntatte perre ye hume sheeghennu haka perre ye hume sheeghe saasa iqqaakinti!
Pare qaghunkokka thollakko ahxase thaahunakki kodhdhini,
9 pare qaghunkoosi acʼcʼikatti maghnoosi shikkoy,
hussa maallay Haallikko haahu shiinanko hxasitottakki ho shiinipa kaasanna ghutay ho hxawadhu.” e
10 Holuppa hasi payamti;
“Haallikko!
Atho paayyottatte piyyesikka uumti,
monthidhekka kodhmo xarghe haahuna.
11 Usundhissa kaasay ippanna,
Atho kapay adhdhikitnappa qaakoy,
usundhe kaasay qhamo laallatti keshuyne,
12 qhamo kooratte aʼilla qhatʼinti,
qhamo lallate iʼoohamne.
Atho kapay xeere kaasakka qaakti,
perre haahukka dhikkatte ye sheeghe.”f
13 Haallikko erkampatadhdheete kittatte yaxanakki payina;
“Haka paarakaradhe haahusi luhhe haahu kala konni saasa,
misikkito haayyu kaaqqila qakkadh?”g
14 Lammi erkampathadhdhe kaasay he korossi dhinko tayanna kʼarkʼanenu erkame kodhampawhe Haallikkito nassidhdhe qandhi?